അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ട്രെന്റിനൊപ്പം സഞ്ചരിക്കുകയാണ് സര്ക്കാരും സോഷ്യല് മീഡിയയും. ട്രെന്റെന്നാല് ജനങ്ങള്ക്ക് ഇഷ്ടമാകുന്ന കണ്ടെന്റുകള് ക്രിയേറ്റ് ചെയ്യുക എന്നതാണെങ്കില് KSRTC ഇപ്പോള് ചെയ്തിരിക്കുന്ന കണ്ടെന്റ് കിടിലമാണ്. ഇത് ജനങ്ങള് ഏറ്റെടുക്കുമെന്നതില് തര്ക്കമില്ല. കാരണം, KSRTCയുടെ കണ്ടെന്റില് പിറന്ന വീഡിയോ ചെയ്തിരിക്കുന്നത് മലയാളത്തിന്റെ പ്രിയ നടന് മോഹന്ലാലാണ്. ലാലേട്ടന്റെ ശബ്ദവും സാമീപ്യവും മാത്രം. പിന്നെ കൂടെയുള്ളത് KSRTCയുടെ ആന വണ്ടിയും. ചെയ്തിരിക്കുന്നത് പരസ്യത്തിനു വേണ്ടിയാണെന്ന് കണ്ടാല് അറിയാം. ആ ആനവണ്ടിയില് ലാലേട്ടനല്ലാതെ മറ്റാരുമില്ല. തിരുവനന്തപുരത്തു നിന്നും ആലപ്പുഴയിലേക്ക് ഒറ്റയ്ക്കു പോകാന് ഒരു ആനവണ്ടി വിട്ടു കൊടുക്കുമെന്ന് ജനങ്ങള് വിശ്വസിക്കില്ല.
പക്ഷെ, ലാലേട്ടന് അവിടെ പറഞ്ഞുവെയ്ക്കുന്നത്, തന്റെ അഭിനയ ജീവിതത്തെ കെട്ടിവലിച്ച KSRTC ആന വണ്ടിയുടെ പ്രാധാന്യത്തെയാണ്. അതാണ്, KSRTCയുടെ ഇനിയുള്ള വരുമാന ഭാവിയെ നിശ്ചയിക്കുന്നതെന്ന് പറയാം. ഇതുവരെയുള്ളതും ഇനിയുള്ളതും എന്ന് KSRTCയുടെ ടിക്കറ്റ് വരുമാനത്തെ രണ്ടായി ഭാഗിക്കാം. ഒരു നടന്, തന്റെ ജീവിതത്തെ ആനവണ്ടിയില് നിക്ഷേപിക്കുമ്പോള്, അതും താര മൂല്യമുള്ള നടന് ചെയ്യുമ്പോള് അത് ഗണം ചെയ്യേണ്ടതു തന്നെയാണ്. യാത്രക്കാരെ എത്രത്തോളമാണ് ലാലേട്ടന്റെ അഭിനയ ജീവിതവും ആനവണ്ടിയും സ്വാധീനിക്കുകയെന്നതാണ് അറിയേണ്ടത്. മോഹന്ലാലിന്റെ ഫേസ്ബുക്കില് റിലീസ് ചെയ്തിരിക്കുന്ന വീഡിയോ ഒരുമണിക്കൂര് കൊണ്ട് കണ്ടത് മൂന്നുലക്ഷത്തോളം പേരാണ്.
മലയാളികളുടെ സ്വകാര്യ അഹങ്കാരങ്ങളാണ് ഈ രണ്ടു പേരും. ഒന്ന് KSRTCയും മറ്റൊന്ന് ലാലേട്ടനും. രണ്ടുപേരും ചേരുമ്പോള് ഉണ്ടാകുന്ന ഒരു ഇംപാക്ട്, അത് ഈ വീഡിയോയില് ഉടനീളമുണ്ട്. ബാക്ക്ഗ്രൗണ്ട് മ്യൂസിക്കും പഴകാല ഓര്മ്മകളെ തൊട്ടുണര്ത്തുന്നതാണ്. മലകയറി വരുന്ന മഞ്ഞയും ചുവപ്പും നിറമുള്ള ബസിന് ഇടതു കൈ കാട്ടുന്നു. കൈ മാത്രമാണ് വീഡിയോയില് കാണുന്നത്. കൈയ്യില് വാച്ചുണ്ട്. ആ KSRTC ബസിനു കൈ കാണിക്കുന്നതാണ് ലാലേട്ടന്റെ അഭിനയ ജീവിതം തുടങ്ങുന്ന സമയമെന്ന് മനസ്സിലാക്കാനാകും. പിന്നെയെല്ലാം ലാലേട്ടന്റെ ശബ്ദത്തിലൂടെയാണ് കേള്ക്കാന് കഴിയുന്നത്. അഭിനയ ജീവിതത്തിന്റെ യാത്രകളെയും KSRTCയുടെ ആനവണ്ടിയുടെ ഇഷ്ടത്തെയും ഒരുപോലെ ചേര്ത്തു കെട്ടിയിട്ടൊരു യാത്ര.
ലാലേട്ടന്റെ വാക്കുകള് ഇങ്ങനെ
തിരുവനന്തപുരത്തു നിന്നും ആലപ്പുഴയിലേക്കു പോകുന്ന ആ KSRTC ബസില് അന്ന് വലതുകാല് വെച്ചു കയറുമ്പോള്, ഞാനറിഞ്ഞിരുന്നില്ല ആ യാത്ര എന്റെ ജീവിതത്തെ മാറ്റി മറിക്കുമെന്ന്. മഞ്ഞില് വിരിഞ്ഞ പൂക്കള് എന്ന സിനിമയില് അഭിനയിക്കാനുള്ള അവസരം തേടി പോവുകയായിരുന്നു ഞാന്. യാത്രകളുടെ വിരസത മാറ്റാന് കൂടെയുള്ള യാത്രക്കാരുടെ അനക്കങ്ങളും ഭാവങ്ങളും ശ്രദ്ധിക്കുക, അവരുടെ മനസ്സിനുള്ളില് എന്താവും എന്നൊക്കെ വേറുതേ ചിന്തിക്കുക, എന്നൊരു സ്വഭാം അന്നും എനിക്കുണ്ടായിരുന്നു. ഒരുപക്ഷെ, അതായിരിക്കാം ഞാന് പഠിച്ച അഭിനയകലയുടെ ആദ്യ പാഠം. ആലപ്പുഴ ബസ് ഡിപ്പോയിലിറങ്ങി നവോദയ സ്റ്റുഡിയോയിലേക്കു നടക്കുമ്പോള് ആ ആനവണ്ടിയും അതിലെ മനുഷ്യരും എനിക്ക് ആശംസ പറയുന്നതു പോലെ തോന്നി. അഭിനയ പരീക്ഷ കഴിഞ്ഞ് ഞാന് മടങ്ങിയതും പ്രിയപ്പെട്ട ആ വണ്ടിയില്ത്തന്നെ. പോയ ഞാനല്ല, തിരിച്ചു വന്നതും. പിന്നീടുള്ള മോഹന്ലാലിന്റെ ജീവിതം എന്നേക്കാള് നിങ്ങള്ക്കറിയാം. എന്റെ ജീവിതത്തിലേക്ക് ഐശ്വര്യത്തിന്റെ ചിന്നം വിളിച്ചെത്തിയ ആനവണ്ടീ..നിനക്കു നന്ദി. ഇതുപോലുള്ള ശുഭയാത്രകള് സമ്മാനിക്കാന് മലയാളിക്കൊപ്പം KSRTCയും എന്നെന്നും ഉണ്ടാകട്ടെ എന്നു ഞാന് പ്രാര്ത്ഥിക്കുന്നു.
ലാലേട്ടന്റെ ഈ ഡയലോഗും വീഡിയോയും മലയാളികളുടെ മനസ്സിലെ നൊസ്റ്റാള്ജിയയെ തൊട്ടുണര്ത്തുമെന്നതില് തര്ക്കമില്ല. അത്രമാത്രം KSRTCയെ മനസ്സിലേക്കടുപ്പിച്ചാണ് വീഡിയോ ചെയ്തിരിക്കുന്നതും. വീഡിയോയ്ക്ക് ഒടുവില് സര്ക്കാരിന്റെ കാര്ഡുമുണ്ട്. അതിലെ വരികളും ഹൃദ്യമാണ് ‘ഇടതുവശം ചേര്ന്ന് സുരക്ഷിതം സുഖകരം’. ഈ പരസ്യത്തിന്റെ പിന്നാമ്പുറങ്ങളില് പണിയെടുത്ത വകുപ്പുമന്ത്രി ഗണേഷ്കുമാറിനും ടീമിനും അഭിനന്ദനങ്ങള്. ഇതിലൂടെ KSRTCക്ക് വരുമാനം ഉയരുമെന്ന പ്രതീക്ഷയുണ്ട്. ആറ്റുകാല് പൊങ്കാലയും ശബരിമല ആഘോഷങ്ങളുമല്ലാതെ, ലാലേട്ടന്റെ പരസ്യം കൊണ്ട് കൂടി യാത്രക്കാര് KSRTCയിലേക്ക് ആകര്ഷിക്കപ്പെടട്ടേ. വരുമാനം ഉയരുമ്പോള് KSRTCയിലെ ജീവനക്കാരുടെ ആനുകൂല്യങ്ങള് കൊടുക്കാനുള്ള നീക്കം നടക്കട്ടെ.
