അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.1957 മുതല് കേരളത്തിന്റെ മണ്ണിന് ഒരേയൊരു നിറത്തോടു മാത്രമാണ് അടങ്ങാത്ത ആര്ത്തിയുണ്ടായത്. അത് ചുവന്ന മണ്ണിനോടും ചുവന്ന രാഷ്ട്രീയത്തോടുമാണ്. മണ്ണില് പണിയെടുക്കുന്നവരും, തൊഴിലാളികളും, കൂലിവേലക്കാരും എന്നും ഭൂരിപക്ഷമുള്ള കേരളത്തിന്റെ മനസ്സും ചുവന്നു തുടുത്തു തന്നെയിരിക്കും. കാലങ്ങളെടുക്കും ഇതില് നിന്നൊരു ചിന്ത ഉയരാന്. എന്നാല്, സ്വാതന്ത്ര്യ സമരത്തെയും, അതിനുവേണ്ടി പ്രവര്ത്തിക്കുകയും ചെയ്ത അഹിംസാ രാഷ്ട്രീയത്തെയും കൈവിടാതെയാണ് കേരളം നില്ക്കുന്നതെന്ന് പറയൊതെ വയ്യ. കമ്യൂണിസ്റ്റ് മനസ്സുണ്ടെങ്കിലും കേരളത്തിന്റെ ശരീരം ത്രിവര്ണ്ണ പതായ പുതച്ചാണ്. കോണ്ഗ്രസ്സിന്റെ അംഹിംസയില് ഊന്നിയ, തൂ വെള്ള വസ്ത്രം ധരിച്ച ശരീരം തന്നെയാണ്. രാജ്യ സ്നേഹിയും, ദേശ സ്നേഹിയുമായ മഹാത്മാഗാന്ധിയുടെ പിന്മുറക്കാരാണ് ഓരോ കേരളീയനും.
കാരണം, കമ്യൂണിസ്റ്റും കമ്യൂണിസ്റ്റു നേതാക്കളും കോണ്ഗ്രസിന്റെ പാതയില് നടന്നു വന്നവരാണ്. വ്യത്യസ്ത ആശങ്ങളില് വിശ്വാസം അര്പ്പിച്ചു മാറിപ്പോയെന്നേയുള്ളൂ. അതുകൊണ്ടുതന്നെ തെരഞ്ഞെടുപ്പു രാഷ്ട്രീയത്തില് കോണ്ഗ്രസിനോളം പ്രതീക്ഷയും വിശ്വാസവും മറ്റൊന്നിനുണ്ടോ എന്ന് സംശയം. എന്നാല്, കേരളത്തിന് ഇപ്പോള് ഒരു മോഹം ഉദിച്ചിട്ടുണ്ട് എന്നു പറയാതെ വയ്യ. ബി.ജെ.പിയാണ് ആ മോഹം. തദ്ദേശ സ്വയം ഭരണ സ്ഥാപനങ്ങളില് അത് പ്രതിഫലിച്ചു തുടങ്ങിയിട്ട് കാലങ്ങളായി. തലസ്ഥാനത്ത് ഒരു പ്രധാനമന്ത്രിയെ സ്വീകരിക്കാന് ബി.ജെ.പി മേയര് ഉണ്ടാകുമെന്ന് പറഞ്ഞപ്പോള് കഴിഞ്ഞ ടേമിലെ മേയറായിരുന്ന ആര്യാ രാജേന്ദ്രന് ആ പ്രസ്താവനയെ കളിയാക്കിയത് ഇന്നും സോഷ്യല് മീഡിയയില് ട്രോളായും പ്രചാരണമായും ഉപയോഗിക്കപ്പെടുന്നുണ്ട്. പക്ഷെ, അത് സത്യമായെന്നത് വസ്തുതയാണ്.
ഇനിയുള്ള അഞ്ചു വര്ഷവും പ്രധാനമന്ത്രിയോ കേന്ദ്രമന്ത്രിമാരോ തിരുവനന്തപുരത്ത് വന്നാല്, എതിരേല്ക്കാന് ബി.ജെ.പി മേയറുണ്ടാകും. ഇത് നല്കിയത്, ജനങ്ങളാണ് എന്ന് മറന്നു പോകാനാവുമോ. എങ്്കിലും നിയമസഭയില് ഒരു ചരിത്രം കിടപ്പുണ്ട്. അത് ഇടതു-വലതു രാഷ്ട്രീയത്തിന്റെ ചരിത്രമാണ്. അതു മാത്രമാണ് ഇന്നും ജനങ്ങള്ക്കു വിശ്വാസവും. അതുകൊണ്ടു തന്നെ കേരളത്തിലെ തിരഞ്ഞെടുപ്പ് ഫലങ്ങള് പലപ്പോഴും നിര്ണ്ണയിക്കപ്പെടുന്നത് പാര്ട്ടികളുടെ ഉറച്ച കോട്ടകളിലല്ല, മറിച്ച് വോട്ടര്മാരുടെ മുന്ഗണനകള് ഇടയ്ക്കിടെ മാറിമറിയുന്ന ഒരു ചെറിയ വിഭാഗം ‘സ്വിങ് സീറ്റുകളിലാണ്. ഈ മണ്ഡലങ്ങളിലുണ്ടാകുന്ന ചെറിയ വോട്ട് മാറ്റങ്ങള് പോലും ആര് സര്ക്കാര് രൂപീകരിക്കണം എന്ന് നിശ്ചയിക്കുന്നതില് നിര്ണ്ണായക പങ്കുവഹിക്കുന്നു.
ഈ വിശകലനത്തിനായി, കഴിഞ്ഞ രണ്ട് നിയമസഭാ തിരഞ്ഞെടുപ്പുകളില് മുന്നണി മാറി വോട്ട് ചെയ്ത മണ്ഡലങ്ങളെയാണ് സ്വിങ് സീറ്റുകളായി പരിഗണിച്ചിരിക്കുന്നത്. കേരളത്തിലെ 140 നിയമസഭാ സീറ്റുകളില് 27 എണ്ണം ഈ വിഭാഗത്തില് പെടുന്നു. കളമശ്ശേരി, തൃപ്പൂണിത്തുറ, ചാലക്കുടി, പാലാ, കോന്നി, വട്ടിയൂര്ക്കാവ് എന്നിവ പ്രധാനപ്പെട്ട സ്വിങ് സീറ്റുകളാണ്. ഈ മണ്ഡലങ്ങളില് പലപ്പോഴും പോരാട്ടം അതിശക്തമാകാറുണ്ട്, പലപ്പോഴും വളരെ ചെറിയ ഭൂരിപക്ഷത്തിലാണ് ഇവിടെ വിജയികള് തീരുമാനിക്കപ്പെടുന്നത്. പത്തനംതിട്ട, വയനാട്, കോട്ടയം, കോഴിക്കോട്, എറണാകുളം തുടങ്ങിയ ജില്ലകളിലാണ് ഇത്തരം സീറ്റുകള് കൂടുതലായി കേന്ദ്രീകരിച്ചിരിക്കുന്നത്. ഭരണത്തിലേറാന് ഈ മേഖലകളില് ഭൂരിഭാഗവും നേടുക എന്നത് ഏതൊരു മുന്നണിക്കും അത്യന്താപേക്ഷിതമാണ്.
വോട്ടര്മാരുടെ മാറിമറിയുന്ന താല്പ്പര്യങ്ങള് ഫലങ്ങളെ എങ്ങനെ ബാധിക്കുന്നു എന്നതിന് വ്യക്തമായ ഉദാഹരണമാണ് വയനാട്. കോണ്ഗ്രസ് നേതാവ് രാഹുല് ഗാന്ധി വലിയ ഭൂരിപക്ഷത്തില് ലോക്സഭാ സീറ്റ് ഇവിടെ നേടിയെങ്കിലും, നിയമസഭാ തലത്തില് മാനന്തവാടി, സുല്ത്താന് ബത്തേരി, കല്പ്പറ്റ എന്നീ മൂന്ന് മണ്ഡലങ്ങളിലും വലിയ മാറ്റങ്ങളാണ് പ്രകടമായത്. പ്രത്യേകിച്ച് കല്പ്പറ്റ ഒരു സ്വിങ് സീറ്റായി ഉയര്ന്നുവന്നു, അവിടെ സി.പി.എമ്മും കോണ്ഗ്രസും വിവിധ സമയങ്ങളില് വിജയിച്ചിട്ടുണ്ട്. 2011, 2016, 2021 തിരഞ്ഞെടുപ്പുകളെ അടിസ്ഥാനമാക്കി സംസ്ഥാനത്തെ എല്ലാ നിയമസഭാ സീറ്റുകളും വിശകലനം ചെയ്യുമ്പോള് ഉറച്ച കോട്ടകളും മത്സര സ്വഭാവമുള്ള സീറ്റുകളും തമ്മിലുള്ള വ്യക്തമായ വ്യത്യാസം കാണാം.
തുടര്ച്ചയായി മൂന്ന് തിരഞ്ഞെടുപ്പുകളിലും ഒരു പാര്ട്ടി വിജയിച്ച സീറ്റിനെ ‘വളരെ ശക്തമായ’ (Very Strong) സീറ്റായും, മൂന്നില് രണ്ടെണ്ണം വിജയിച്ചതിനെ ‘ശക്തമായ’ (Strong) സീറ്റായും കണക്കാക്കുന്നു. ഒരു തവണ മാത്രം ജയിച്ച മണ്ഡലങ്ങള് ‘ദുര്ബലമായ’ (Weak) സീറ്റുകളാണ്. കഴിഞ്ഞ മൂന്ന് തവണയും ഒരിയ്ക്കല് പോലും ജയിക്കാത്ത ഇടങ്ങള് ‘വളരെ ദുര്ബലമായ’ (Very Weak) സീറ്റുകളുമാണ്. സിപിഐ(എമ്മിനാണ്) സംസ്ഥാനത്ത് ഏറ്റവും വലിയ അടിത്തറയുള്ളത്. പാര്ട്ടിക്ക് 39 വളരെ ശക്തമായ സീറ്റുകളും 18 ശക്തമായ സീറ്റുകളുമുണ്ട്. അതായത് ആകെ 57 മണ്ഡലങ്ങളില് സിപിഐ(എമ്മിന്) വ്യക്തമായ മുന്തൂക്കമുണ്ട്. കോണ്ഗ്രസിന് ഇത്തരത്തില് 24 സീറ്റുകളാണുള്ളത്. ഇന്ത്യന് യൂണിയന് മുസ്ലിം ലീഗിന് (IUML) 18 സീറ്റുകളുണ്ട്, ഇവയില് ഭൂരിഭാഗവും വടക്കന് കേരളത്തിലാണ്. ഒരു പ്രധാന ദേശീയ പാര്ട്ടിയാണെങ്കിലും ഭാരതീയ ജനതാ പാര്ട്ടിക്ക് (ബിജെപി) സംസ്ഥാനത്ത് ‘വളരെ ശക്തമായ’ സീറ്റുകളൊന്നുമില്ല.
ഈ കോട്ടകള് വിവിധ മേഖലകളിലായി വ്യാപിച്ചു കിടക്കുന്നു. ഉദുമ, തൃക്കരിപ്പൂര്, പയ്യന്നൂര്, കല്ല്യാശ്ശേരി തുടങ്ങിയ മണ്ഡലങ്ങള് ഉള്പ്പെടെ വടക്കന്, മധ്യ, തെക്കന് കേരളത്തില് സിപിഐ(എമ്മിന്) ശക്തമായ സാന്നിധ്യമുണ്ട്. മുസ്ലിം ലീഗ് വടക്കന് കേരളത്തിലെ മലപ്പുറം മേഖലയില് ആധിപത്യം പുലര്ത്തുന്നു, അതേസമയം എറണാകുളം പോലുള്ള നഗര-മധ്യ മേഖലകളില് കോണ്ഗ്രസ് സ്വാധീനം നിലനിര്ത്തുന്നു.
