അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ആലപ്പുഴ: ഇടവേളയ്ക്ക് ശേഷം സംസ്ഥാനത്ത് വീണ്ടും മസ്തിഷ്കജ്വരം സ്ഥിരീകരിച്ചതിന് പിന്നാലെ മരണം റിപ്പോർട്ട് ചെയ്തു. അമ്പലപ്പുഴ നീർക്കുന്നം സ്വദേശി ആര്യമോൾ (26) ആണ് ചികിത്സയിലിരിക്കെ മരണപ്പെട്ടത്. നേഴ്സ് ആയി ജോലി ചെയ്തിരുന്ന ആര്യ ഇന്ന് രാവിലെ തിരുവനന്തപുരം മെഡിക്കൽ കോളേജിൽ വെച്ചാണ് അന്തരിച്ചത്.
അമ്പലപ്പുഴ നീർക്കുന്നം കളത്തിൽ വിജയന്റെയും അമ്പിളിയുടെയും മകളാണ് ആര്യ. ബംഗളൂരുവിൽ നേഴ്സ് ആയി ജോലി ചെയ്തിരുന്ന ആര്യ, വിദേശത്ത് ജോലി ലഭിച്ചതിനെത്തുടർന്ന് രണ്ട് മാസം മുൻപാണ് നാട്ടിലെത്തിയത്. ഒരു മാസം മുൻപാണ് രോഗലക്ഷണങ്ങൾ പ്രകടമായത്. ആദ്യം ആലപ്പുഴ മെഡിക്കൽ കോളേജിൽ ചികിത്സ തേടിയെങ്കിലും രോഗം വീണ്ടും കഠിനമായി. തുടർന്ന് പരുമലയിലെ സ്വകാര്യ ആശുപത്രിയിലും പിന്നീട് അതീവ ഗുരുതരാവസ്ഥയിൽ തിരുവനന്തപുരം മെഡിക്കൽ കോളേജിലേക്കും മാറ്റുകയായിരുന്നു. വിദഗ്ധ ചികിത്സകൾ നൽകിയെങ്കിലും ഇന്ന് രാവിലെ മരണം സംഭവിക്കുകയായിരുന്നു.
സംസ്ഥാനത്ത് വീണ്ടും മസ്തിഷ്കജ്വരം റിപ്പോർട്ട് ചെയ്ത സാഹചര്യത്തിൽ ആരോഗ്യവകുപ്പ് നിരീക്ഷണം ശക്തമാക്കിയിട്ടുണ്ട്. വൈറസ് ബാധയുടെ ഉറവിടം കണ്ടെത്താനുള്ള പരിശോധനകൾ നടന്നുവരികയാണ്. പനി, കഠിനമായ തലവേദന തുടങ്ങിയ ലക്ഷണങ്ങൾ കണ്ടാൽ ഉടനടി വൈദ്യസഹായം തേടണമെന്ന് അധികൃതർ നിർദ്ദേശിച്ചു.
