അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വ്യത്യസ്ത കഥാപാത്രങ്ങളിലൂടെ പ്രേക്ഷകരെ അത്ഭുതപ്പെടുത്തുന്ന ഇന്ദ്രന്സ്, ‘അനന്തന് കാട്’ എന്ന ചിത്രത്തിലും ശ്രദ്ധേയ പ്രകടനവുമായി കൈയടി നേടുകയാണ്. ചിത്രത്തില് കൃഷ്ണന്കുട്ടി അണ്ണന് എന്ന കഥാപാത്രമായാണ് താരം എത്തുന്നത്. പുറത്തേക്ക് പരുക്കനും ഉള്ളില് ഒട്ടേറെ വികാരങ്ങള് ഒളിപ്പിച്ചിരിക്കുന്ന ഈ കഥാപാത്രം സിനിമയിലെ പ്രധാന ആകര്ഷണങ്ങളിലൊന്നായി മാറുകയാണ്. സംവിധായകന് ജിഎന് കൃഷ്ണകുമാര് ഒരുക്കിയ ചിത്രത്തിന് തിരക്കഥ ഒരുക്കിയിരിക്കുന്നത് മുരളി ഗോപിയാണ്. തിരുവനന്തപുരം പശ്ചാത്തലമാക്കി കഥ പറയുന്ന സിനിമയില് ചെങ്കല്ചൂള കോളനിയിലെ ഗാനമേള സംഘത്തിന്റെ നേതാവായാണ് ഇന്ദ്രന്സ് എത്തുന്നത്. ഒരുകാലത്ത് അക്രമലോകവുമായി ബന്ധമുണ്ടായിരുന്നെങ്കിലും ജീവിതം മാറ്റാന് ശ്രമിക്കുന്ന ഒരാളുടെ സംഘര്ഷങ്ങളാണ് കഥാപാത്രത്തിലൂടെ അവതരിപ്പിക്കുന്നത്.
ആക്ഷനും വികാരവും ഒരുപോലെ ആവശ്യപ്പെടുന്ന രംഗങ്ങളില് ഇന്ദ്രന്സ് മികച്ച പ്രകടനമാണ് കാഴ്ചവയ്ക്കുന്നത്. കടുപ്പമുള്ള ഡയലോഗുകളും വൈകാരിക മുഹൂര്ത്തങ്ങളും ഒരുപോലെ കൈകാര്യം ചെയ്ത താരം, കഥാപാത്രത്തിന് ആവശ്യമായ തീവ്രത പകര്ന്നിട്ടുണ്ട്. സിനിമയുടെ ആദ്യഭാഗം മുതല് അവസാന രംഗം വരെ കൃഷ്ണന്കുട്ടി അണ്ണന് കഥയുടെ പ്രധാന ശക്തിയായി നിലകൊള്ളുന്നു. ചിത്രത്തില് മുരളി ഗോപി, ആര്യ, അപ്പാനി ശരത്, ദേവ് മോഹന്, വിജയരാഘവന്, സുനില്, നിഖില വിമല്, ശാന്തി ബാലചന്ദ്രന് എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. ഓരോരുത്തരും തങ്ങളുടെ കഥാപാത്രങ്ങള്ക്ക് അനുയോജ്യമായ പ്രകടനമാണ് കാഴ്ചവച്ചിരിക്കുന്നതെന്ന് പ്രേക്ഷക പ്രതികരണങ്ങള് സൂചിപ്പിക്കുന്നു.
ദൃശ്യഭംഗിയും പശ്ചാത്തല സംഗീതവും സിനിമയുടെ തീവ്രത വര്ധിപ്പിക്കുന്ന ഘടകങ്ങളാണ്. ക്യാമറയും സംഗീതവും കഥയുടെ അന്തരീക്ഷം പ്രേക്ഷകരിലേക്ക് എത്തിക്കുന്നതില് പ്രധാന പങ്കുവഹിക്കുന്നു. വ്യത്യസ്ത കഥാപാത്രങ്ങള് തിരഞ്ഞെടുക്കുന്നതില് എപ്പോഴും ശ്രദ്ധ പുലര്ത്തുന്ന ഇന്ദ്രന്സിന്റെ കരിയറിലെ മറ്റൊരു ശ്രദ്ധേയ കഥാപാത്രമായി കൃഷ്ണന്കുട്ടി അണ്ണന് മാറുമോയെന്ന ചര്ച്ചയും സിനിമ കണ്ടിറങ്ങുന്നവര്ക്കിടയില് സജീവമാണ്.
