അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മക്ക നഗരത്തിന്റെ നിരോധിത വ്യോമപരിധിയിലേക്ക് പ്രവേശിക്കാൻ ശ്രമിച്ച ഡ്രോൺ സൗദി വ്യോമ പ്രതിരോധസേന വിജയകരമായി തകർത്തു. യെമനിലെ ഹൂതി വിഭാഗമാണ് ഡ്രോൺ വിക്ഷേപിച്ചതെന്ന് സൗദി സഖ്യസേന ആരോപിച്ചു.
സെപ്റ്റംബർ 15 ചൊവ്വാഴ്ച വൈകിട്ട് 6.50ഓടെയാണ് ഡ്രോൺ കണ്ടെത്തി തകർത്തതെന്ന് സഖ്യസേനാ വക്താവ് മേജർ ജനറൽ തുർക്കി അൽ മാലികി അറിയിച്ചു.
മക്ക നഗരത്തിന്റെ തെക്കുഭാഗത്ത് വെച്ചാണ് ഡ്രോൺ തടഞ്ഞതെന്നും, വിശുദ്ധ നഗരത്തിന്റെ നിരോധിത വ്യോമപരിധിയിൽ പ്രവേശിക്കുന്നതിന് മുമ്പ് തന്നെ അത് നശിപ്പിച്ചതായും അദ്ദേഹം വ്യക്തമാക്കി.
2017 ജൂലൈ 27ന് ബാലിസ്റ്റിക് മിസൈൽ ഉപയോഗിച്ച് മക്കയെ ലക്ഷ്യമിട്ടതായി സൗദി ആരോപിച്ച സംഭവത്തിന് ശേഷം മക്കയ്ക്കെതിരായ രണ്ടാമത്തെ ശ്രമമാണിതെന്നാണ് സൗദി അധികൃതരുടെ വിശദീകരണം.
വിശുദ്ധ നഗരത്തിന്റെയും ഹറമുകളുടെയും സുരക്ഷയ്ക്ക് വിട്ടുവീഴ്ചയില്ലെന്നും ആവശ്യമായ പ്രതിരോധ നടപടികൾ സ്വീകരിക്കുമെന്നും അൽ മാലികി മുന്നറിയിപ്പ് നൽകി.
