അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ലൈംഗികാസക്തി മലയാളികള്ക്ക് അല്പ്പം കൂടുതലാണോ എന്ന് സംശയച്ചു പോകും. കാരണം, ഡേറ്റിംഗ് ആപ്പുകള് മലയാളത്തില് ഇപ്പോള് കൂടുതലാണ്. മറ്റു ഭാഷകളിലും രാജ്യങ്ങളിലുമൊക്കെയുണ്ടെങ്കിലും ഇവിടെ ഇത്തിരി കൂടുതല് തന്നെയാണ്. ഇത്തരം ഡേറ്റിംഗ് ആപ്പുകള് രഹസ്യമായും പരസ്യമായും ഉപയോഗിക്കുന്നവരുടെ എണ്ണമെടുത്താല് ഞെട്ടിപ്പോകും. തട്ടിപ്പായാലും തലവെയ്ക്കാന് തയ്യാറായുള്ളവര് നിരവധി പേരാണ്. സ്ത്രീയും നഗ്നതയും, സ്ത്രീയുടെ സംസാരവുമെല്ലാം സ്വകാര്യമായി കാണാനും ആസ്വദിക്കാനും കഴിയുന്ന തരത്തിലുള്ള ആപ്പുകള് നിലവില് മലയാളികള്ക്ക് ആര്രായിരിക്കുകയാണ്.
ഡേറ്റിംഗ് ആപ്പുകളുടെ പരസ്യമാണ് ഇതിലേക്ക് ആദ്യം ആകര്ഷിക്കുന്നത്. ഒറ്റയ്ക്കിരിക്കുകയാണോ. നിങ്ങള്ക്കൊരു കൂട്ടു വേണോ. എന്തും സംസാരിക്കാന് ആലുവേണോ. നിങ്ങളുടെ മനസ്സില് തോന്നുന്ന പോലെ കൂടെ നില്ക്കാന് ഒരാള്. ഈ ആപ്പ് ഡൗണ്ലോഡ് ചെയ്യൂ. മതിയാവോളം സംസാരിക്കൂ. വീഡിയോ, ഓഡിയോ ചാറ്റിംഗ് അവയിലബിള്. ഇതാണ് പരസ്യ വാചകങ്ങള്. അതു പറയുന്നതും ഒരു പെണ്കുട്ടിയായിരിക്കും. ഇതെല്ലാം കണ്ട് മോഹിച്ച് ആഗ്രഹിച്ചു കയറുന്നവര് പിന്നെ തിരിച്ചിറങ്ങുമ്പോള് കൈയ്യില് ഒരുരൂപ പോലും ഉണ്ടാകില്ലെന്നു മാത്രം. തട്ടിപ്പും വെട്ടിപ്പും മാത്രം നടക്കുന്ന സ്ഥലമാണീ ആപ്പെട്ട് മനസ്സിലാക്കുന്നവര് ഓരോരുത്തരായി പിന്മാറും അപ്പോഴേക്കും അവരുടെ ഉടുതുണ മാത്രം ബാക്കിയാക്കിയിരിക്കും ഈ ആപ്പ്.
അടുത്തിടെ ബെംഗളൂരുവില് ഒരു പൊലീസുകാരന് ഡേറ്റിങ് ആപ്പില് ഇണയെത്തേടി പോയപ്പോള് 28 ലക്ഷം രൂപയാണ് പോക്കറ്റില് നിന്ന് പൊടിഞ്ഞത്. സമാനമായി, വെഞ്ഞാറമൂട്ടില് ഒരു യുവാവിന്റെ കയ്യിലുണ്ടായിരുന്ന സ്വര്ണവും പണവും നഷ്ടമായി. കഥകള് രണ്ടാണെങ്കിലും, രണ്ടിനും ഒരേ ക്ലൈമാക്സ്. പണവും പോയി, മാനവും പോയി. വെഞ്ഞാറമൂട്ടിലെ ഒരു യുവാവാണ് ഏറ്റവും പുതിയ ഇര. ഓണ്ലൈന് ഡേറ്റിങ് ആപ്പിലൂടെ സൗഹൃദം സ്ഥാപിച്ച പെണ്കുട്ടിയെ കാണാന് പോയതായിരുന്നു. എന്നാല്, അവിടെ കാത്തിരുന്നത് പെണ്കുട്ടിയായിരുന്നില്ല, ഒരു സംഘം തട്ടിപ്പുകാരായിരുന്നു. അവര് യുവാവിനെ കാറില് കയറ്റി ആളൊഴിഞ്ഞ സ്ഥലത്തേക്ക് കൊണ്ടുപോയി മര്ദ്ദിക്കുകയും, കത്തികാട്ടി ഭീഷണിപ്പെടുത്തി സ്വര്ണാഭരണങ്ങള് കവര്ന്നെടുക്കുകയും ചെയ്തു.
സംഭവിച്ച നാണക്കേട് കാരണം ആദ്യം സ്വര്ണം മോഷ്ടിച്ചെന്ന പേരില് പരാതി നല്കിയെങ്കിലും, പൊലീസ് ചോദ്യം ചെയ്തപ്പോള് മാത്രമാണ് ഡേറ്റിങ് ആപ്പ് കഥ പുറത്തുവന്നത്. ഇങ്ങനെ പുറത്തു പറഞ്ഞും പറയാത്തതുമായി നിരവധി കഥകളുണ്ട്. ആളെ മയക്കുന്ന ഡേറ്രിംഗ് ആപ്പുകള് കണ്ട് മയങ്ങിപ്പോകുന്നവര് സൂക്ഷിക്കുക. നിങ്ങള് കണ്ടു മയങ്ങുന്നതൊന്നും ഈ ആപ്പില് ഉണ്ടാകില്ല. പകരം കിട്ടുന്നത് മാനഹാനി മാത്രമായിരിക്കും. ധനനഷ്ടം ഉറപ്പായും ുണ്ടാകും. ഇത്തരം സംഭവങ്ങള് ഒറ്റപ്പെട്ടതല്ല. ഡേറ്റിങ് ആപ്പുകളും സോഷ്യല് മീഡിയ പ്ലാറ്റ്ഫോമുകളും ഇന്ന് വന് തട്ടിപ്പുകേന്ദ്രങ്ങളായി മാറിയിരിക്കുന്നു. ‘ലവേഴ്സ് വേള്ഡ് ഡേറ്റിങ് കമ്പനി’ എന്നൊരു കമ്പനിയുടെ പരസ്യം കണ്ട് അതില് വീണുപോയ ഒരു പൊലീസ് ഉദ്യോഗസ്ഥന് ഒരു മാസത്തിനുള്ളില് നഷ്ടമായത് 28.2 ലക്ഷം രൂപയാണ്.
ഓണ്ലൈനില് ‘ഇണയെ’ തേടി തുടങ്ങിയ ഇദ്ദേഹത്തിന് പല കാരണങ്ങള് പറഞ്ഞ് പണം ചോദിച്ച് കോളുകള് വന്നുകൊണ്ടിരുന്നു. അവസാനം, സുഹൃത്തുക്കളില് നിന്നും വായ്പയെടുത്ത് നല്കിയ പണം വരെ ഇദ്ദേഹത്തിന് നഷ്ടമായി. നാണക്കേട് കാരണം ഒരു മാസത്തോളം ഇദ്ദേഹം സംഭവം പുറത്തുപറഞ്ഞില്ല. ഇതൊന്നും അവസാനിക്കുന്നില്ല. അടുത്തകാലത്തായി ആരാധകര്ക്ക് മാത്രമായി എക്സ്ക്ലൂസിവ് നടത്താവുന്ന ഓണ്ലൈന് സ്ട്രീമിങ് പോലുള്ള പ്ലാറ്റ്ഫോമുകളും, ഓണ്ലൈന് സ്ട്രീമിങ് സേവനങ്ങളും നഗ്നതാ പ്രദര്ശനത്തിനും, ബ്ലാക്ക്മെയിലിങിനും ഉപയോഗിക്കപ്പെടുന്നുണ്ട്. അത്തരത്തിലുള്ള ഒരു സേവനത്തില് പണം നഷ്ടപ്പെട്ടതിനെക്കുറിച്ചും ചിലര് പരാതിപ്പെടുന്നു.
ലൈംഗിക താല്പര്യമുള്ള ആളുകളെ കണ്ടെത്തി അവരെ ബ്ലാക്ക്മെയില് ചെയ്യുന്ന തട്ടിപ്പുകളും വ്യാപകമാണ്. ഇങ്ങനെയുള്ള സംഭവങ്ങള് വര്ധിക്കുമ്പോഴും, എന്തുകൊണ്ടാണ് ആളുകള് വീണ്ടും വീണ്ടും ഇത്തരം ചതിക്കുഴികളില് വീഴുന്നത്? ആധുനിക കാലത്തെ ഒറ്റപ്പെടലുകളും, മനുഷ്യബന്ധങ്ങള്ക്ക് ഓണ്ലൈന് ഇടങ്ങളെ ആശ്രയിക്കേണ്ടിവരുന്ന സാഹചര്യവുമാണ് ഇതിന് പ്രധാന കാരണം. സൈബര് സുരക്ഷയെക്കുറിച്ചുള്ള ധാരണ ഇനിയെങ്കിലും ഇത്തരം ആളുകള്ക്ക് ഉണ്ടാകേണ്ടതുണ്ട്.
