അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.1995 ബാച്ച് മുതൽ ബിരുദ– ബിരുദാനന്തര ബിരുദ പരീക്ഷകളിൽ തോൽക്കുകയും സപ്ലിമെന്ററി അവസരം നഷ്ടപ്പെടുകയും ചെയ്തവർക്കായി കാലിക്കറ്റ് സർവകലാശാല പുതിയ തീരുമാനം പ്രഖ്യാപിച്ചു. ഇത്തരക്കാർക്കും ഇതുവരെ പരീക്ഷ എഴുതാത്തവർക്കും പഴയ സിലബസിൽ തന്നെ ഒറ്റത്തവണ റഗുലർ സപ്ലിമെന്ററി പരീക്ഷ നടത്താൻ സിൻഡിക്കറ്റ് യോഗത്തിൽ വിസി ഡോ. പി. രവീന്ദ്രൻ ആണ് തീരുമാനമെടുത്തത്.
കാൽനൂറ്റാണ്ടിനിടെ പഠിച്ചിറങ്ങി ഡിഗ്രി പൂർത്തിയാക്കാൻ കഴിയാതെ വിഷമിച്ച പതിനായിരക്കണക്കിന് വിദ്യാർത്ഥികൾക്ക് ഈ തീരുമാനം വലിയ ആശ്വാസമാകും. പ്രോ വൈസ് ചാൻസലർ ഡോ. പി. റഷീദ് അഹമ്മദ് സമർപ്പിച്ച റിപ്പോർട്ടിന്റെ അടിസ്ഥാനത്തിലാണ് ഈ നടപടി.
പഴയ സിലബസുകൾ പലതും ലഭ്യമല്ലാതിരുന്നതും, ചോദ്യപ്പേപ്പർ തയ്യാറാക്കാൻ അധ്യാപകരെ കണ്ടെത്താനുള്ള ബുദ്ധിമുട്ടും കാരണം ഈ പദ്ധതി അസാധ്യമാണെന്ന് പരീക്ഷാ ഭവൻ ആദ്യം റിപ്പോർട്ട് നൽകിയിരുന്നു.
എന്നാൽ എല്ലാ വെല്ലുവിളികളും അതിജീവിച്ചാണ് സർവകലാശാല ഈ നിർണായക തീരുമാനമെടുത്തത്. വൺ-ടൈം റഗുലർ സപ്ലിമെന്ററി പരീക്ഷകൾ പുനരാരംഭിച്ച് ആറു മാസത്തിനകം പൂർത്തിയാക്കാനാണ് ലക്ഷ്യമിടുന്നത്. ഇതിനായി സപ്ലിമെന്ററി പരീക്ഷാ വിഭാഗത്തിൽ കൂടുതൽ ഉദ്യോഗസ്ഥരെ നിയമിക്കും.
പഴയ സിലബസുകൾ കണ്ടെത്താനും അവ ഡിജിറ്റൈസ് ചെയ്യാനുമായി പ്രത്യേകം സെക്ഷൻ തുറക്കുമെന്നും അധികൃതർ അറിയിച്ചു. മൊത്തം 40 വ്യത്യസ്ത കോഴ്സ് ഗ്രൂപ്പുകളിലെ പരീക്ഷകൾ സമയബന്ധിതമായി പൂർത്തിയാക്കും.
സിലബസ് ലഭ്യമല്ലാത്ത കോഴ്സുകൾക്ക് അനുയോജ്യമായ തത്തുല്യ സിലബസ് തീരുമാനിക്കാൻ പഠന ബോർഡ് അധ്യക്ഷരുടെ പ്രത്യേക യോഗവും വിളിക്കും. കൂടാതെ, ഇതിനകം അപേക്ഷിക്കാൻ കഴിയാത്തവർക്ക് അതിനുള്ള അവസരവും സർവകലാശാല നൽകും.
