അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മരുഭൂമിയും കടൽത്തീരങ്ങളും ദ്വീപുകളും ഉൾപ്പെടെയുള്ള പ്രകൃതി വൈവിധ്യങ്ങൾ പ്രയോജനപ്പെടുത്തി ഇക്കോ ടൂറിസം മേഖല വികസിപ്പിക്കാൻ ഒരുങ്ങി കുവൈത്ത്. പ്രകൃതി സംരക്ഷണത്തോടൊപ്പം രാജ്യത്തെ വിനോദസഞ്ചാര സാധ്യതകൾ വർധിപ്പിക്കുകയാണ് ഇതിലൂടെ ലക്ഷ്യമിടുന്നത്.
കുവൈത്തിലെ മരുഭൂമികളും തീരപ്രദേശങ്ങളും ദ്വീപുകളും ഇക്കോ ടൂറിസത്തിന് വലിയ അവസരങ്ങളാണ് ഒരുക്കുന്നത്. 250-ലധികം പക്ഷി ഇനങ്ങളെ കണ്ടെത്തിയ ജഹ്റ റിസർവ് രാജ്യത്തെ പ്രധാന ആകർഷണ കേന്ദ്രങ്ങളിലൊന്നാണ്. ബുബിയാൻ ദ്വീപും മുബാറക് അൽ-കബീർ റിസർവും പക്ഷിനിരീക്ഷണത്തിനും പ്രകൃതി പഠനത്തിനും അനുയോജ്യമായ മേഖലകളാണ്.
ഫൈലാക്ക ദ്വീപിനെ ചരിത്ര-പൈതൃക കേന്ദ്രങ്ങളുമായി ബന്ധിപ്പിച്ച് ഇക്കോ ടൂറിസം കേന്ദ്രമാക്കാനും കഴിയും. ജൽ അൽ-സൂർ, ഖൈറാൻ, വാദി അൽ-ബാത്തിൻ, അൻജഫ ബീച്ച് എന്നിവ ജിയോടൂറിസത്തിനും അനുയോജ്യമായ ഇടങ്ങളാണ്.
പ്രകൃതി സംരക്ഷണ കേന്ദ്രങ്ങളെയും ദ്വീപുകളെയും തീരപ്രദേശങ്ങളെയും ബന്ധിപ്പിച്ച് ദേശീയ ഇക്കോ ടൂറിസം ഭൂപടം തയ്യാറാക്കണമെന്നാണ് നിർദേശം. പ്രകൃതി സംരക്ഷണവും ഉത്തരവാദിത്ത ടൂറിസവും ഉറപ്പാക്കുന്ന സുസ്ഥിര പദ്ധതികൾക്ക് പ്രാധാന്യം നൽകണമെന്നും വിദഗ്ധർ വ്യക്തമാക്കി.
