അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സംസ്ഥാനത്തെ ബാറുകളുടെ പ്രവർത്തന സമയത്തിൽ മാറ്റം വരുത്താൻ നിർദേശം. നിലവിൽ രാവിലെ 10 മുതൽ രാത്രി 12 വരെയാണ് ബാറുകളുടെ പ്രവർത്തന സമയം. ഇത് രാവിലെ 11 മുതൽ രാത്രി 11 വരെയാക്കി പുനഃക്രമീകരിക്കാനാണ് പുതിയ കരട് ശുപാർശ ചെയ്യുന്നത്.
വീര്യം കുറഞ്ഞ മദ്യത്തിന്റെ നികുതി ഘടന നിശ്ചയിച്ചിട്ടുണ്ടെങ്കിലും അതിന്റെ വിൽപന അനുവദിക്കേണ്ടതില്ലെന്നാണ് എക്സൈസ് വകുപ്പിന്റെ നിലപാട്.
15 ശതമാനം വരെ വീര്യമുള്ള ഹോർട്ടി വൈൻ ബേക്കറികളിലൂടെ വിൽക്കാമെന്ന എൽഡിഎഫ് സർക്കാരിന്റെ നിർദേശവും പുതിയ കരടിൽ ഒഴിവാക്കും.
മദ്യം വാങ്ങാനെത്തുന്നവരുടെ പ്രായം 23 വയസ് പിന്നിട്ടെന്ന് ഉറപ്പാക്കാതെ മദ്യം വിതരണം ചെയ്താൽ ബാർ ലൈസൻസികൾക്കും ബവ്കോ ജീവനക്കാർക്കുമെതിരെ കർശന നടപടി സ്വീകരിക്കണമെന്നും കരട് നിർദേശിക്കുന്നു.
എലപ്പുള്ളിയിൽ എൽഡിഎഫ് സർക്കാർ അനുമതി നൽകിയ സ്വകാര്യ മദ്യനിർമാണ പ്ലാന്റിന്റെ അനുമതി റദ്ദാക്കാനും ശുപാർശയുണ്ട്. മേനോൻപാറയിൽനിന്ന് വിപണിയിലെത്തിക്കാൻ ലക്ഷ്യമിട്ട മിന്നൽ മാജിക് ബ്രാൻഡിയുടെ ഉൽപാദനം വിദഗ്ധ സമിതിയുടെ പരിശോധനയ്ക്കുശേഷം മാത്രമേ ആരംഭിക്കൂവെന്നും കരടിൽ വ്യക്തമാക്കുന്നു.
എക്സൈസ് മന്ത്രി എം. ലിജു മദ്യവിരുദ്ധ സംഘടനകൾ, ജനപ്രതിനിധികൾ, മുൻ എക്സൈസ് മന്ത്രിമാർ എന്നിവരുമായി നടത്തിയ ആശയവിനിമയത്തിന്റെ അടിസ്ഥാനത്തിലാണ് കരട് തയ്യാറാക്കിയതെന്നാണ് വിവരം.
മന്ത്രിസഭാ ഉപസമിതി കരട് ചർച്ച ചെയ്ത് ഒരാഴ്ചയ്ക്കുള്ളിൽ മുഖ്യമന്ത്രിക്ക് സമർപ്പിക്കും. തുടർന്ന് യുഡിഎഫിൽ ചർച്ച നടത്തിയശേഷം നവംബർ 30നകം മദ്യനയം അന്തിമമാക്കാനാണ് നീക്കം.
