അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ന്യൂയോർക്ക്∙ കഴിഞ്ഞ 51 വർഷമായി ന്യൂയോർക്കിൽ പ്രവർത്തിച്ചു വരുന്ന മലയാളി സംഘടനയായ ‘കേരളാ സമാജം ഓഫ് ഗ്രെയ്റ്റർ ന്യൂയോർക്കിന്‍റെ’ 2023-ലെ വാർഷിക ഫാമിലി ഡിന്നർ മീറ്റിങ് വർണ്ണാഭമായി നടത്തപ്പെട്ടു. ഫ്ലോറൽ പാർക്കിലുള്ള ടൈസൺ സെന്റർ ഓഡിറ്റോറിയത്തിൽ നൂറുകണക്കിന് അംഗങ്ങളുടെയും സുഹൃത്തുക്കളുടെയും നിറസാന്നിധ്യത്തിൽ നടത്തപ്പെട്ട കുടുംബ സംഗമം വിവിധ കലാപരിപാടികളോടെ ആഘോഷമാക്കി. സമാജം പ്രസിഡന്‍റ് ഫിലിപ്പോസ് ജോസഫിന്‍റെ (ഷാജി) അധ്യക്ഷതയിൽ ചേർന്ന യോഗത്തിൽ സെക്രട്ടറി ജോൺ കെ. ജോർജ് (ബിജു) സ്വാഗതം ആശംസിക്കുകയും, ട്രസ്റ്റീ ബോർഡ് ചെയർമാൻ വർഗീസ് പോത്താനിക്കാട് ആദ്യകാല സമാജം പ്രസിഡന്‍റുമാരെ യോഗത്തിനു പരിചയപ്പെടുത്തി ആശംസകൾ അർപ്പിക്കുകയും ചെയ്തു.
51 വർഷം മുൻപ് സമാജം ആരംഭിച്ചപ്പോഴുള്ള പ്രഥമ പ്രസിഡന്‍റ് പ്രഫ. ജോസഫ് ചെറുവേലിയുടെ സാന്നിധ്യം യോഗത്തിൽ പ്രത്യേകം ശ്രദ്ധിക്കപ്പെട്ടു. പ്രഫ. ചെറുവേലിയെ ആദരിച്ചതിനു ശേഷം, ഈ വർഷത്തെ സമാജം സുവനീറിന്‍റെ പ്രകാശന കർമ്മം പ്രഫ. ചെറുവേലി നിർവഹിച്ചു. കഴിഞ്ഞ ഒരു വർഷം സമാജത്തിന്‍റെ പ്രസിഡന്‍റായി പ്രവർത്തിക്കുവാൻ അവസരം ലഭിച്ചതിലുള്ള സന്തോഷം പങ്ക് വച്ചും വിവിധപ്രവർത്തനങ്ങളിലും സാമൂഹിക സേവനങ്ങളിലും എല്ലാ കമ്മറ്റി അംഗങ്ങളുടെയും, സമാജം അംഗങ്ങളുടെയും സഹായ സഹകരണങ്ങൾക്ക് നന്ദി പറഞ്ഞുമാണ് ഷാജി പ്രസംഗിച്ചത്.
ചുരുങ്ങിയ സമയത്തെ പൊതുസമ്മേളനത്തിനു ശേഷം വിവിധ കലാ പരിപാടികൾ അരങ്ങേറി. ന്യൂയോർക്കിലെ പ്രശസ്ത ഗായകരായ ജോഷി ജോസ്, സൂസൻ വർഗീസ്, ലിയാ റെയ് ഐസൻ തുടങ്ങിയവരുടെ ശ്രവണ സുന്ദര ഗാനങ്ങളും, ഡാൻസ് ട്രൂപ്പിന്‍റെ അതി മനോഹര ഗ്രൂപ്പ് ഡാൻസും ഫാമിലി സന്ധ്യക്ക് കൊഴുപ്പേകി. വൈസ് പ്രസിഡന്‍റ് സിബി ഡേവിഡ് മാസ്റ്റർ ഓഫ് സെറിമണിയായി യോഗം നിയന്ത്രിച്ചു. ട്രഷറർ ഷാജി വർഗീസ് കൃതജ്ഞത പ്രകാശിപ്പിച്ചു. ജോയിന്‍റ് സെക്രട്ടറി ഹേമചന്ദ്രൻ, കമ്മറ്റി അംഗങ്ങളായ ലീലാ മാരേട്ട്, ബെന്നി ഇടിയേര, സജി എബ്രഹാം, ജോർജു കുട്ടി, വർഗീസ് കോരസൺ, മാമ്മൻ എബ്രഹാം, സിജു സെബാസ്റ്റ്യൻ, സജി തോമസ്, ജോസി സ്കറിയ, സണ്ണി പണിക്കർ, വിൻസെന്റ് സിറിയക്, വർഗീസ് ജോസഫ്, പോൾ ജോസ് തുടങ്ങിയവരുടെ കൂട്ടായ പ്രവർത്തനമാണ് കുടുംബ സംഗമം വർണ്ണാഭമാകാൻ സഹായിച്ചത്.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
