അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വെർമോണ്ടിലെ ബർലിംഗ്ടണിൽ പലസ്തീൻ വംശജരായ മൂന്ന് കോളേജ് വിദ്യാർത്ഥികൾക്ക് നേരെ വെടിവയ്പ്പ് . ഇസ്രയേൽ ഹമാസ് യുദ്ധത്തിന്റെ സാഹചര്യത്തിലെ വിദ്വേഷ വധശ്രമം ആകാമെന്ന വിലയിരുത്തലിലാണ് പൊലീസ്. ശനിയാഴ്ച വൈകുന്നേരം വെർമോണ്ട് സർവകലാശാലയ്ക്ക് സമീപമുള്ള തെരുവിൽ വെച്ചാണ് സംഭവം നടന്നത്. വെടിവച്ച ശേഷം പ്രതി ഓടിരക്ഷപ്പെട്ടതായും ബർലിംഗ്ടൺ പോലീസ് പ്രസ്താവനയിൽ പറഞ്ഞു. പരിക്കേറ്റ മൂന്ന് പേരിൽ രണ്ട് പേർ യുഎസ് പൗരന്മാരും മൂന്നാമൻ നിയമപരമായ യുഎസ് റസിഡന്റുമാണ്. ഹിസാം അവർത്ഥാനി, കിന്നൻ അബ്ഡേൽ ഹമീദ്, തസീം അഹമ്മദ് എന്നിവർക്കാണ് വെടിയേറ്റത്. ഇവരിൽ രണ്ട് പേർ ഐസിയുവിൽ ചികിത്സയിൽ തുടരുകയാണ്.
ആക്രമിക്കപ്പെടുമ്പോൾ ഇരകൾ അറബി സംസാരിച്ചിരുന്നതായി റിപ്പോർട്ട് ചെയ്യപ്പെട്ടിട്ടുണ്ട്. മൂന്ന് പേർക്ക് നേരെ ആക്രോശിക്കുകയും ശല്യപ്പെടുത്തുകയും ചെയ്ത ശേഷം അക്രമി വെടിയുതിർക്കുകയായിരുന്നുവെന്നാണ് പലസ്തീൻ അനുകൂല അഭിഭാഷക സംഘടനയായ ഇൻസ്റ്റിറ്റ്യൂട്ട് ഫോർ മിഡിൽ ഈസ്റ്റ് അണ്ടർസ്റ്റാൻഡിംഗ് പറയുന്നത്. ഒക്ടോബർ ഏഴിന് പൊട്ടിപ്പുറപ്പെട്ട ഇസ്രായേൽ-പലസ്തീൻ രക്തച്ചൊരിച്ചിലിന് ശേഷം യുഎസിൽ റിപ്പോർട്ട് ചെയ്യപ്പെട്ട ഇസ്ലാമിക വിരുദ്ധ, യഹൂദ വിരുദ്ധ സംഭവങ്ങൾക്ക് ഇടയിലാണ് പുതിയ വെടിവയ്പ്പ് നടന്നത്.
“വിദ്വേഷം മൂലമാണോ വെടിവയ്പ്പ് നടന്നതെന്ന് സംശയമുണ്ട്, ഈ സംശയത്തെ മുൻനിർത്തിയാണ് പോലീസ് അന്വേഷണം നടത്തുന്നത്” ബർലിംഗ്ടൺ പോലീസ് മേധാവി ജോൺ മുറാദ് പ്രസ്താവനയിൽ പറഞ്ഞു. വെടിവയ്പ്പ് വിദ്വേഷ കുറ്റകൃത്യമായി നിലനിർത്തികൊണ്ട് അന്വേഷിക്കണമെന്ന് ഇരകളുടെ കുടുംബങ്ങൾ അധികാരികളോട് ആവശ്യപ്പെട്ടിരുന്നു. താങ്ക്സ് ഗിവിംഗ് അവധിക്ക് വിദ്യാർത്ഥികളിൽ ഒരാളുടെ ബർലിംഗ്ടണിലെ വീട്ടിലെത്തിയതാണ് മറ്റ് രണ്ട് പേരും.
അതേസമയം 14 ഇസ്രായേലികളും മൂന്ന് വിദേശികളും ഉൾപ്പെടെ 17 ബന്ദികളെ പലസ്തീൻ സംഘടനയായ ഹമാസ് മോചിപ്പിച്ചു. ഒരു അമേരിക്കൻ ബന്ദിയും മോചിപ്പിക്കപ്പെട്ടവരിൽ ഉൾപ്പെടുന്നു. നാലു വയസ്സുള്ള പെൺകുട്ടിയാണ് ഇതെന്ന് യുഎസ് പ്രസിഡന്റ് ജോ ബൈഡൻ പറഞ്ഞു. വെടിനിർത്തൽ കരാർ പ്രകാരം ഹമാസ് മോചിപ്പിക്കുന്ന മൂന്നാമത്തെ ബാച്ച് ബന്ദികളാണിത്. ഒക്ടോബർ ഏഴിന് യുദ്ധം ആരംഭിച്ചത് മുതൽ ഇവർ ഗാസ മുനമ്പിൽ തടവിലായിരുന്നു. ഇസ്രയേലിനെതിരെ ഹമാസ് അപ്രതീക്ഷിത ആക്രമണം നടത്തിയ 240 പൗരന്മാരെ ബന്ദികളാക്കുകയായിരുന്നു. നാലു മുതൽ 84 വയസ്സുവരെയുള്ള ബന്ദികളെ മാനുഷിക സംഘടനയായ റെഡ് ക്രോസിലേക്ക് മാറ്റുകയും, പിന്നീട് അവരെ ഇസ്രായേൽ സേനയ്ക്ക് കൈമാറുകയുമായിരുന്നു.
“ഇന്ന് ഇസ്രായേലിലേക്ക് മടങ്ങുന്ന 17 ബന്ദികളെ ഇസ്രായേൽ സർക്കാർ ആലിംഗനം ചെയ്യുന്നു, ഞങ്ങളുടെ
14 പൗരന്മാരെയും മൂന്ന് വിദേശ പൗരന്മാരെയും ഉത്തരവാദിത്തപ്പെട്ട ഉദ്യോഗസ്ഥർ അവരുടെ കുടുംബങ്ങളിലേക്ക് എത്തിക്കുന്നതിനുള്ള തയ്യാറെടുപ്പുകൾ നടത്തിയിട്ടുണ്ട്.”-ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ ഓഫീസ് എക്സിൽ കുറിച്ചു.
READ ASLO…നവകേരള സദസ്സിന് വിദ്യാർഥികൾക്ക് പകരം സ്കൂൾ ബസിൽ ജനങ്ങൾ
ഇന്ന് മോചിപ്പിക്കപ്പെട്ട ഇസ്രായേലി ബന്ദികളിൽ ഒമ്പത് കുട്ടികളും രണ്ട് അമ്മമാരും രണ്ട് സ്ത്രീകളും ഒരു പുരുഷനും ഉൾപ്പെടുന്നുവെന്ന് ടൈംസ് ഓഫ് ഇസ്രായേൽ റിപ്പോർട്ട് ചെയ്തു. പ്രാഥമിക വൈദ്യപരിശോധനയിൽ ബന്ദികളാക്കിയ എല്ലാവരുടെയും ആരോഗ്യനില തൃപ്തികരമാണ്. പ്രായമായ ഇസ്രായേലി ബന്ദികളിൽ ഒരാളെ ഹെലികോപ്റ്ററിൽ മെഡിക്കൽ സെന്ററിലേക്ക് മാറ്റി. പ്രായമായ സ്ത്രീ രോഗിയാണെന്നും അടിയന്തര വൈദ്യസഹായം ആവശ്യമാണെന്നും ജോ ബൈഡൻ പറഞ്ഞു.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
