അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അങ്ങേയറ്റം നിഗൂഢതയിൽ പൊതിഞ്ഞ ഒരു കഥയാണിത്. കഴിഞ്ഞ വർഷം അറസ്റ്റിലായ ഇന്ത്യൻ നാവികസേനയിൽ നിന്ന് വിരമിച്ച എട്ട് പേർക്ക് ഖത്തർ കോടതി വ്യാഴാഴ്ച വധശിക്ഷ വിധിച്ചു. ഖത്തറിന്റെ രഹസ്യാന്വേഷണ ഏജൻസി നാവികസേന ഉധ്യോഗസ്ഥരെ അവരുടെ വീടുകളിൽ നിന്ന് പിടികൂടി. ഖത്തറിലെ ദഹ്റ ഗ്ലോബൽ ടെക്‌നോളജീസ് എന്ന ഡിഫൻസ് സർവീസ് പ്രൊവൈഡർ കമ്പനിയിൽ ജോലി ചെയ്യുകയായിരുന്നു ഇവർ. അന്നുമുതൽ, അവരെ ഏകാന്തതടവിൽ പാർപ്പിച്ചു, ജാമ്യം നിഷേധിക്കപ്പെട്ടു, ഇപ്പോൾ വധശിക്ഷയ്ക്ക് വിധിച്ചു. അതേസമയം, എട്ട് പേരുടെ കുടുംബങ്ങൾക്ക് തടങ്കലിൽ വച്ചതിന്റെ കാരണം ഖത്തർ അധികൃതർ വ്യക്തമാക്കിയിട്ടില്ല. ഖത്തർ നാവികസേനയുടെ പരിശീലനത്തിൽ ദഹ്റ ഗ്ലോബൽ ടെക്‌നോളജീസ് ഉൾപ്പെട്ടിരുന്നു.
ഖത്തറിൽ അറസ്റ്റിലായ എട്ട് മുൻ ഇന്ത്യൻ നേവി ഉദ്യോഗസ്ഥർക്ക് വധശിക്ഷ വിധിച്ച തീരുമാനത്തിൽ ആശ്ചര്യം പ്രകടിപ്പിച്ച് ഇന്ത്യൻ സർക്കാർ രംഗത്തെത്തി. ഇന്ത്യൻ ഉദ്യോഗസ്ഥർക്ക് വധശിക്ഷ വിധിച്ച ഖത്തറിൻ്റെ തീരുമാനത്തിൽ തങ്ങൾ ഞെട്ടിപ്പോയെന്നാണ് ഇന്ത്യൻ വിദേശകാര്യമന്ത്രാലയം പുറത്തിറക്കിയ പ്രസ്താവനയിൽ വ്യക്തമാക്കുന്നത്. തീരുമാനത്തിൻ്റെ വിശദമായ പകർപ്പിനായി തങ്ങൾ കാത്തിരിക്കുകയാണെന്നും വധശിക്ഷ വിധിക്കപ്പെട്ട ഉദ്യോഗസ്ഥരുടെ കുടുംബാംഗങ്ങളുമായും നിയമവിദഗ്ധരുമായും ആശയവിനിമയം നടത്തി വരികയാണെന്നും വിദേശകാര്യമന്ത്രാലയം പറഞ്ഞു. ഇന്ത്യൻ ഉദ്യോഗസ്ഥരുടെ മോചനം ഉറപ്പാക്കാൻ എല്ലാ നിയമ സാധ്യതകളും പരിശോധിച്ച് വരികയാണെന്നും അവർ അറിയിച്ചു.
നാവിക സേനയിൽ ക്യാപ്റ്റൻമാരായിരുന്ന നവ തേജസിംഗ് ഗിൽ, വീരേന്ദ്രകുമാർ വർമ്മ, സൗരഭ് വസിഷ്ഠ, കമാൻഡർമാരായിരുന്ന അമിത് നാഗ്പാൽ, പൂർണേന്ദു തിവാരി, സുഗുണാകർ പകല, സഞ്ജീവ് ഗുപ്ത, മറ്റൊരു ഉദ്യോഗസ്ഥനായ രാകേഷ് എന്നിവരെയാണ് ഖത്തർ കോടതി വധശിക്ഷയ്ക്ക് വിധിച്ചത്.
ഈ എട്ട് മുൻ ഉദ്യോഗസ്ഥരെ കഴിഞ്ഞവർഷം ഓഗസ്റ്റിലാണ് ഖത്തർ കസ്റ്റഡിയിൽ എടുത്തതെന്ന് ഇന്ത്യൻ വിദേശകാര്യമന്ത്രാലയം വ്യക്തമാക്കുന്നു. ഇന്ത്യൻ നാവികസേനയിലെ എട്ട് മുൻ ഉദ്യോഗസ്ഥർ ഖത്തറിൻ്റെ തലസ്ഥാനമായ ദോഹയിൽ 57 ദിവസമായി അനധികൃത തടവിലാണെന്ന് കഴിഞ്ഞവർഷം ഒക്ടോബർ 25ന് മിതു ഭാർഗവ എന്ന സ്ത്രീ ട്വീറ്റ് ചെയ്തിരുന്നു. കമാൻഡർ പൂർണ്ണേന്ദു തിവാരിയുടെ സഹോദരിയാണ് മിതഒ ഭാർഗവ.
ഖത്തറിൻ്റെ പിടിയിലായ ഈ മുൻ ഇന്ത്യൻ ഉദ്യോഗസ്ഥർ ഇസ്രായേലിന് വേണ്ടി ചാരവൃത്തി നടത്തിയെന്നാണ് ആരോപണം. ഖത്തർ നടപ്പിലാക്കുന്ന അന്തർവാഹിനി പദ്ധതിയുമായി ബന്ധപ്പെട്ട വിവരങ്ങൾ ഇവർ ഇസ്രായേലിന് ചേർത്തി നൽകിയെന്നാണ് ഖത്തർ ആരോപിക്കുന്നതെന്ന് ഖത്തറിൻ്റെ വാർത്ത വെബ്സൈറ്റ് അൽ ജസീറ റിപ്പോർട്ട് ചെയ്യുന്നു. അതേസമയം നാവിക ഉദ്യോഗസ്ഥർക്കെതിരെ ഖത്തർ ഉന്നയിച്ച ആരോപണങ്ങളെ സംബന്ധിച്ച് ഇന്ത്യൻ സർക്കാർ മറ്റു വിവരങ്ങളൊന്നും പുറത്തുവിട്ടിട്ടില്ല. നാവിക ഉദ്യോഗസ്ഥർക്കെതിരായ വിചാരണ ഈ മാസം മാർച്ച് 29നാണ് ആരംഭിച്ചതെന്ന് വിദേശകാര്യ മന്ത്രാലയ വക്താവ് അരിന്ദം ബാഗ്ചി വ്യക്തമാക്കി. കേസിലെ ഏഴാമത്തെ വാദം 2023 ഒക്ടോബർ മൂന്നിനാണ് നടന്നത്.
നാവികസേനയിൽ നിന്നും വിരമിച്ച ഈ ഉദ്യോഗസ്ഥർ ദോഹ ആസ്ഥാനമായുള്ള അൽ ദഹ്റ കമ്പനിയിലാണ് ജോലി ചെയ്തു വന്നിരുന്നത്. സാങ്കേതികവിദ്യയും കൺസൾട്ടൻസി സേവനങ്ങളും നൽകിയിരുന്ന കമ്പനിയായിരുന്നു അൽ ദഹ്റ. ഖത്തർ നാവികസേനയ്ക്ക് ആവശ്യമായ പരിശീലനവും ഉപകരണങ്ങളും ഇവർ നൽകിയിരുന്നതായും വിവരങ്ങളുണ്ട്. ഒമാൻ എയർഫോഴ്സിൽ നിന്ന് വിരമിച്ച സ്ക്വാഡ്രൺ ലീഡറായ ഖമീസ് അൽ ആസ്മിയാണ് ഈ കമ്പനി നടത്തിയിരുന്നത്. കഴിഞ്ഞവർഷം ഇയാളും ഈ എട്ട് നാവികസേന ഉദ്യോഗസ്ഥർക്കൊപ്പം അറസ്റ്റിലായിരുന്നു. എന്നാൽ നവംബർ മാസത്തിൽ ഇയാൾ മോചിതനാവുകയും ചെയ്തു.
2023 മെയ് മാസം 31ന് ഈ കമ്പനി അടച്ചുപൂട്ടി. ഏകദേശം 75 ഇന്ത്യൻ പൗരന്മാർ ഈ കമ്പനിയിൽ ജോലി ചെയ്തിരുന്നു. അവരിൽ ഭൂരിപക്ഷവും ഇന്ത്യൻ നാവികസേനയിലെ മുൻ ഉദ്യോഗസ്ഥരായിരുന്നു. കമ്പനി പൂട്ടിയതോടെ ഇന്ത്യക്കാരെ എല്ലാം ജോലിയിൽനിന്ന് പിരിച്ചുവിടുകയായിരുന്നു.
ഖത്തർ അന്തർവാഹിനി പദ്ധതി
അറസ്റ്റിലായ ഇന്ത്യക്കാരായ മുൻ നാവിക ഉദ്യോഗസ്ഥർ ഇസ്രായേലിന് വേണ്ടി ചാരവൃത്തി നടത്തിയതായാണ് ഖത്തർ ആരോപിക്കുന്നത്. തങ്ങൾ നടപ്പിലാക്കാൻ ഉദ്ദേശിക്കുന്ന അന്തർവാഹിനി പദ്ധതിയുടെ കാര്യത്തിൽ ഖത്തർ ഇറ്റലിയുമായി കരാർ ഉണ്ടാക്കുന്നു എന്ന് ഈ ഉദ്യോഗസ്ഥർ ഇസ്രായേലിന് വിവരം നൽകി എന്നാണ് ആരോപണം. ഖത്തർ നടപ്പിലാക്കുന്ന പദ്ധതിയുമായി ബന്ധപ്പെട്ട അന്തർവാഹിനികൾ `യു 212 നിയർ ഫ്യൂച്ചർ´ അന്തർവാഹിനിയുടെ ചെറിയ പതിപ്പാണെന്ന് ഇവർ ഇസ്രായേലിന് ചോർത്തി നൽകിയതായി അൽ ജസീറ റിപ്പോർട്ട് ചെയ്യുന്നു. ജർമ്മനിയുടെ സഹായത്തോടെയാണ് ഇറ്റലി അത്യാധുനിക അന്തർവാഹിനികൾ നിർമ്മിക്കുന്നത്. മിഡിൽ ഈസ്റ്റിൽ ഉടനീളം സൈനിക മേധാവിത്വം നിലനിർത്താൻ ആഗ്രഹിക്കുന്ന ഇസ്രായേൽ ഖത്തറിൻ്റെ പുതിയ പദ്ധതിയെ ആശങ്കയോടെയാണ് കണ്ടത്. ഖത്തർ നടപടി തങ്ങളുടെ സൈനിക മേധാവിത്വത്തിന് ഭീഷണിയാകുമെന്ന് ഇസ്രായേൽ കരുതിയിരുന്നു എന്നാണ് അൽ ജസീറ പറയുന്നതും. എന്നാൽ ഇത് സംബന്ധിച്ചോ ഇന്ത്യൻ ഉദ്യോഗസ്ഥർക്ക് വധശിക്ഷ വിധിച്ചത് സംബന്ധിച്ചോ ഇസ്രായേൽ ഇതുവരെ പ്രതികരിച്ചിട്ടില്ല.
കഴിഞ്ഞ വർഷം ഡിസംബറിൽ വിദേശകാര്യ മന്ത്രി എസ് ജയശങ്കർ ഖത്തർ ഗവൺമെന്റുമായി നിരന്തരം ബന്ധപ്പെടുന്നുണ്ടെന്നും അറസ്റ്റിലായ ഇന്ത്യക്കാർക്ക് രാജ്യത്തിന് മുൻഗണനയുണ്ടെന്ന് അദ്ദേഹം ഉറപ്പുനൽകിയതായും എഎൻഐ റിപ്പോർട്ട് ചെയ്തു. ഇത് വളരെ സെൻസിറ്റീവായ കേസാണ്. അവരുടെ താൽപ്പര്യങ്ങളാണ് ഞങ്ങളുടെ മനസ്സിൽ പ്രധാനം. അംബാസഡർമാരും മുതിർന്ന ഉദ്യോഗസ്ഥരും ഖത്തർ സർക്കാരുമായി നിരന്തരം സമ്പർക്കം പുലർത്തുന്നു. അവർക്കാണ് ഞങ്ങളുടെ മുൻഗണന, ഞങ്ങൾ ഉറപ്പുനൽകുന്നുവെന്നും വിദേശകാര്യ മന്ത്രാലയം.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
നിങ്ങൾ അറിയാൻ ആഗ്രഹിക്കുന്ന വാർത്തകൾ നിങ്ങളുടെ Facebook Feed ൽ Anweshanam
നിങ്ങൾ അറിയാൻ ആഗ്രഹിക്കുന്ന വാർത്തകൾ നിങ്ങളുടെ ടെലിഗ്രാമിൽ അന്വേഷണം
അന്വേഷണം വാർത്തകൾ അറിയാൻ Threads– ൽ Join ചെയ്യാം
