അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.‘രക്തദാനത്തെക്കാൾ വലിയ ദാനമില്ല’ എന്ന ഓർമപെടുത്തലുമായി ഇന്ന് ലോക രക്തദാന ദിനം.”രക്തം ദാനം ചെയ്യുന്നത് ഐക്യദാർഢ്യമാണ്. ജീവൻ രക്ഷിക്കുന്നതിലും കമ്മ്യൂണിറ്റികൾക്കുള്ളിൽ ഐക്യദാർഢ്യം വർധിപ്പിക്കുന്നതിലും സ്വമേധയാ ഉള്ള രക്തദാനം വഹിക്കുന്ന പങ്കുകളിലേക്ക് ശ്രദ്ധ ആകർഷിക്കുന്നതിനായി പരിശ്രമത്തിൽ ചേരൂ, ജീവൻ രക്ഷിക്കൂ” എന്നതാണ് 2022ലെ ലോക രക്തദാന ദിനത്തിലെ തീം.
ആദ്യമായി രക്തഗ്രൂപ്പുകളെ തിരിച്ചറിഞ്ഞ കാള്ലാന്റ് സ്റ്റെയിനര് എന്ന ശാസ്ത്രജ്ഞന്റെ ജന്മദിനമാണ് രക്തദാന ദിനമായി ആചരിക്കുന്നത്. 2005 മുതലാണ് ലോകം രക്തദാന ദിനം ആചരിച്ച് തുടങ്ങിയത്. ജീവൻ രക്ഷിക്കാനുള്ള ഉപാധിയായി രക്തദാനത്തിന്റെ ആവശ്യകതയെക്കുറിച്ച് അവബോധം സൃഷ്ടിക്കുന്നതിനായി എല്ലാ വർഷവും ജൂൺ 14 ന് ലോക രക്തദാന ദിനം ആചരിച്ച് വരുന്നു.രക്തദാനത്തിന്റെ ആവശ്യകത, മഹത്വം എന്നിവയെക്കുറിച്ച് ജനങ്ങളിൽ അവബോധം വളർത്തുക, ദശലക്ഷക്കണക്കിന് പേരുടെ ജീവൻ രക്ഷിക്കാനായി പ്രതിഫലമില്ലാതെ സന്നദ്ധ രക്തംദാനം ചെയ്തവരെ ആദരിക്കുക തുടങ്ങിയ ലക്ഷ്യത്തോടെയാണ് ലോകമെമ്പാടും രക്തദാന ദിനം ആചരിക്കുന്നത്.
ആർക്കൊക്കെ രക്തദാനം ചെയ്യാം
നാഷണൽ ബ്ലഡ് ട്രാൻസ്ഫ്യൂഷൻ കൗൺസിലിന്റെ അഭിപ്രായത്തിൽ ആരോഗ്യമുള്ള ഏതൊരു മുതിർന്നവർക്കും, പുരുഷനും സ്ത്രീക്കും രക്തം ദാനം ചെയ്യാം. പുരുഷന്മാർക്ക് മൂന്ന് മാസത്തിലൊരിക്കലും സ്ത്രീകൾക്ക് നാല് മാസത്തിലൊരിക്കലും രക്തദാനം ചെയ്യാം. പ്രായം 18 നും 65 നും ഇടയില് ആയിരിക്കണം. ഭാരം 45-50 കിലോഗ്രാമില് കുറയാതിരിക്കുകയും ശരീര താപനില നോര്മലായിരിക്കുകയും വേണം. രക്തത്തിലെ ഹീമോഗ്ലോബിന്റെ അളവ് 12.5 ശതമാനത്തില് കുറയരുത്. മൂന്ന് മാസത്തില് ഒരിക്കല് മാത്രമേ ഒരാള്ക്ക് രക്തം ദാനം ചെയ്യാന് അനുമതിയുള്ളൂ.
രക്തദാതാവിനു ലഭിക്കുന്ന ഗുണങ്ങള്
രക്തദാനത്തിലൂടെ അനേകം ജീവന് രക്ഷിക്കാന് കഴിയുന്നതിനോടൊപ്പം രക്തദാതാവിനും നിരവധി ഗുണങ്ങള് ലഭിക്കുന്നു.ഇടയ്ക്കിടെ രക്തം ദാനം ചെയ്യുന്നത് വഴി രക്ത ദാദാവിന് ലഭിക്കുന്ന ആരോഗ്യ ഗുണങ്ങളും നിരവധിയാണ്. പതിവായി രക്തദാനം ചെയ്യുന്നത് ഇരുമ്പിന്റെ അളവ് തുലനാവസ്ഥയിൽ നിലനിർത്തുന്നു, ഇത് ഹൃദ്രോഗ സാധ്യത കുറയ്ക്കുന്നു.ശരീരത്തിലെ ഉയർന്ന അളവിലുള്ള ഇരുമ്പ് അംശം കാൻസർ ബാധിക്കുന്നതിനുള്ള ക്ഷണമാണ്. രക്തം ദാനം ചെയ്യുന്നതിലൂടെ, രക്തത്തിൽ ആരോഗ്യകരമായ ഇരുമ്പിന്റെ അളവ് നിലനിർത്താൻ കഴിയും, അതുവഴി കാൻസർ ബാധിക്കാനുള്ള സാധ്യതയും കുറയ്ക്കും.
രക്തദാനം ശരീരഭാരം കുറയ്ക്കാൻ സഹായിക്കുകയും ശാരീരികക്ഷമത മെച്ചപ്പെടുത്തുകയും ചെയ്യുന്നു. ഹീമോക്രോമറ്റോസിസിനെ തടയുന്നു:രക്തം ദാനം ചെയ്യുന്നത് വഴി ശരീരത്തിൽ ഇരുമ്പിന്റെ അമിത ആഗിരണം നടക്കുന്ന ഹെമോക്രോമറ്റോസിസ് ഉണ്ടാകുന്നത് തടയാം. പതിവായി രക്തദാനം ചെയ്യുന്നത് ഇരുമ്പിന്റെ അളവ് കുറയ്ക്കും, അതിനാൽ ഇത് ഹീമോക്രോമറ്റോസിസ് ഉള്ളവർക്ക് ഗുണം ചെയ്യും.
രക്തദാനം പുതിയ രക്താണുക്കളുടെ ഉൽപാദനത്തെ ഉത്തേജിപ്പിക്കുന്നു. രക്തം ദാനം ചെയ്ത ശേഷം, 48 മണിക്കൂറിനുള്ളിൽ ശരീരത്തിന്റെ സിസ്റ്റം പ്രവർത്തിക്കുന്നു. ഇതുവഴി പുതിയ രക്താണുക്കൾ ഉൽപാദിപ്പിക്കപ്പെടുകയും നഷ്ടപ്പെട്ട എല്ലാ ചുവന്ന രക്താണുക്കളും 30 മുതൽ 60 ദിവസത്തിനുള്ളിൽ വീണ്ടും രൂപപ്പെടുകയും ചെയ്യുന്നു. അതിനാൽ, രക്തം ദാനം ചെയ്യുന്നത് ശരീരത്തിന് എല്ലാ തരത്തിലും അനുകൂല ഗുണങ്ങൾ നൽകുകയും ചെയ്യുന്നു. കൂടാതെ മൂന്നുമാസത്തിലൊരിക്കല് വിവിധ രോഗങ്ങള്ക്കുള്ള പരിശോധനയും ഇതിലൂടെ നടത്തപ്പെടുന്നു.പ്രതിഫലേച്ഛയില്ലാതെ കൃത്യമായ ഇടവേളകളില് ആവര്ത്തിച്ച് രക്തം ദാനം ചെയ്യുന്നതിലൂടെ മാത്രമേ രക്തത്തിന്റെ ലഭ്യതയും, സുരക്ഷിതത്വവും ഉറപ്പാക്കാന് കഴിയൂ.
സാങ്കേതിക വളര്ച്ചയുടെ ഫലമായി ദാനം ചെയ്യപ്പെടുന്ന ഓരോ യൂണിറ്റ് രക്തവും പ്ലാസ്മ, പ്ലേറ്റ്ലെറ്റ്, പി.ആര്.ബി.സി., ക്രയോപെസിപ്പിറ്റേറ്റ് എന്നീ ഘടകങ്ങളായി വേര്തിരിച്ച് 4 പേരുടെ വരെ ജീവന് രക്ഷിക്കാന് ഉപയോഗിക്കുന്നു.
രക്തം ദാനം ചെയ്യാൻ പാടില്ലാത്ത സാഹചര്യങ്ങൾ
എന്നാൽ എല്ലാവർക്കും രക്തം ദാനം ചെയ്യാൻ കഴിയില്ല . എച്ച്ഐവി/എയ്ഡ്സ് ഹെപ്പറ്റൈറ്റിസ് ബി/സി എന്നിവയോ രക്തത്തിലൂടെ പകരുന്ന രോഗങ്ങളോ ഉള്ളവര്ക്ക് രക്തം ദാനം ചെയ്യാന് പാടുള്ളതല്ല, മലേറിയ വന്നിട്ടുള്ളവര് അതിനു ശേഷം 12 മാസത്തിനുള്ളില് രക്തം ദാനം ചെയ്യാന് പാടില്ല, മഞ്ഞപ്പിത്തം പിടിപ്പെട്ടു ഒരു വര്ഷത്തേക്ക് രക്തദാനം പാടില്ല,മദ്യം, മയക്കുമരുന്ന് ഇവ ഉപയോഗിച്ചവര് രക്തം ദാനം ചെയ്യാന് പാടില്ല, ഉയര്ന്ന രക്തസമ്മര്ദ്ദം ഉള്ളവര്, പ്രമേഹ രോഗത്തിന്റെ പാര്ശ്വഫലങ്ങള് ഉളവായിട്ടുള്ള വ്യക്തികള് പൊതുവേ രക്തദാനതിനു യോഗ്യരല്ല, സ്ത്രീകള് ഗര്ഭധാരണ സമയത്തും മുലയൂട്ടുന്ന അവസരത്തിലും രക്തദാനം നടത്താന് പാടില്ല, ടാറ്റൂ, ബോഡി പിയേഴ്സിങ് ഇവ ചെയ്തവര് ആറുമാസത്തേക്ക് രക്തദാനം ചെയ്യരുത്.
അതാവശ്യ സമയത്ത് സഹജീവികളെ സഹായിക്കാൻ രക്തദാനം പുണ്യപ്രവൃത്തിയാണ്. സ്വീകരിക്കുന്നയാൾക്കും കൊടുക്കുന്ന ആൾക്കും ഒരുപോലെ ഗുണകരമാണ് രക്ത ദാനം. ഓർക്കുക രക്തദാനം മഹാദാനം.
