അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഹൃദ്രോഗികള്ക്കും വ്യായാമം ചെയ്യാം;ഹൃദയാഘാതം വന്നവര് തീവ്രവ്യായാമങ്ങള് അരുത് കൃത്യവും ചിട്ടയുമായ വ്യായാമപദ്ധതി നടപ്പാക്കിയാല് ഹൃദ്രോഗസാധ്യത പകുതിയോളം കുറയുമെന്നാണു പഠനങ്ങള് സൂചിപ്പിക്കുന്നത്.വ്യായാമമില്ലായ്മ ഹൃദ്രോഗസാധ്യത പതിന്മടങ്ങു കൂട്ടുമത്രേ. ആഗോളതലത്തില് ഏതാണ്ട് നാലിലൊന്നു ഹൃദ്രോഗികള്ക്കും രോഗമുണ്ടാകുന്നതു വ്യായാമത്തിന്റെ അഭാവം കൊണ്ടാണെന്നു കണ്ടെത്തലുകള്.
പ്രമേഹം, കൊളസ്ട്രോള്, രക്തസമ്മര്ദം തുടങ്ങിയ ജീവിതശൈലീ രോഗമുള്ളവര്ക്ക് ക്രിയാത്മകവും, ഊര്ജസ്വലവുമായ വ്യായാമപദ്ധതി അത്യാവശ്യമാണ്. ഹൃദ്രോഗമുണ്ടാകാതിരിക്കാനും ഉണ്ടായാല് അവയുടെ കാഠിന്യം കുറയ്ക്കാനും വ്യായാമത്തിനു കഴിയും. രോഗം വീണ്ടും ആവര്ത്തിക്കാതിരിക്കാനും വ്യായാമം ചെയ്യേണ്ടത് അത്യാവശ്യമാണ്. ഹൃദയത്തെ സമ്മര്ദത്തിലാക്കുന്ന മാനസികപ്രശ്നങ്ങള് അകറ്റാന് വരെ വ്യായാമംകൊണ്ടു സാധിക്കും. വ്യായാമമായി വീട്ടില് ദിവസവും ചെയ്യുന്ന ജോലികള് മതിയെന്നു കരുതുന്നവരുണ്ട്. എന്നാല് അതു പര്യാപ്തമല്ല. വ്യായാമത്തിനു മാത്രമായി അല്പം സമയം നീക്കി വയ്ക്കാന് ശ്രദ്ധിക്കണം.
ഹൃദ്രോഗമുള്ളവരും വളരെ കാലമായി പ്രമേഹബാധിതരും വ്യായാമപരിപാടി തുടങ്ങുന്നതിനു മുമ്ബ് ഹൃദയത്തിന്റെ കാര്യക്ഷമത മനസിലാക്കുള്ള ടി. എം. ടി. ടെസ്റ്റ് ചെയ്യുന്നതു നല്ലതാണ്.ടെസ്റ്റ് നടത്തിയതിനു ശേഷം ഡോക്ടറുമായി കൂടിയാലോചിച്ച് ശരീരത്തിനു ചേരുന്ന വ്യായാമമുറകള് ചിട്ടപ്പെടുത്താം. കൃത്യനിഷ്ഠയോടു കൂടിയുള്ള വ്യായാമം രക്തത്തിലെ നല്ല കൊളസ്ട്രോളായ എച്ച്ഡിഎല് അളവു വര്ധിപ്പിക്കുന്നു.
ഇത്തരക്കാര്ക്ക് എയറോബിക് വ്യായാമങ്ങളാണ് (എസോടോണിക്) പ്രയോജനകരം. നടത്തം, ഓട്ടം, സൈക്കിളിങ്, നീന്തല്, ഡാന്സ് എന്നിവ എയ്റോബിക് വ്യായാമങ്ങളാണ്. ഇതില് തന്നെ നിഷ്ഠയോടും കൃത്യമായ വേഗതയോടും കൂടിയുള്ള നടപ്പാണ് ഏറ്റവും അനുയോജ്യം. വ്യായാമം ശരീരത്തിന്റെ ഉപാപചയ നിരക്ക് വര്ധിപ്പിക്കുന്നതു കൊണ്ട് ധാരാളം കാലറിയും ചെലവാക്കപ്പെടുന്നു. അമിതഭാരം ഉയര്ത്തുക തുടങ്ങിയ ശാരീരിക ശക്തി വളരെയേറെ വേണ്ടി വരുന്ന അനെയ്റോബിക് വ്യായാമങ്ങള് (എസോമെട്രിക്) ഹൃദയത്തിന് അപകടകാരികളാണ്.
ദിവസം അരമണിക്കൂറെങ്കിലും വ്യായമത്തിനായി നീക്കി വയ്ക്കണം. വ്യായാമം ആദ്യമായി ചെയ്യുന്ന വ്യക്തി ആദ്യദിനം തന്നെ ഒരു മണിക്കൂര് കഠിന വ്യായാമങ്ങള് ചെയ്യരുത്. പതിയെ വേണം വ്യായാമത്തിലേക്കു കടക്കാന്. ആദ്യദിനങ്ങളില് പത്തോ പതിനഞ്ചോ മിനിറ്റ് വ്യായാമം ചെയ്യാം. എപ്പോഴും മിതമായ വേഗതയില് വ്യായാമം ആരംഭിക്കാന് ശ്രദ്ധിക്കുക. ആഴ്ചയില് കുറഞ്ഞത് നാലോ അഞ്ചോ ദിവസം വരെ വ്യായാമം ചെയ്യാന് ശ്രമിക്കണം.
വ്യായാമം ചെയ്യുമ്ബോള് പള്സ് എത്രയാണെന്നു മനസിലാക്കുകയാണെങ്കില് വളരെ നന്ന്. ഇതു സാധാരണഗതിയില് ഒരു മിനിറ്റില് എഴുപതോ എഴുപത്തഞ്ചോ ആണ്. ഈ നിരക്ക് നിശ്ചിത തോതില് വര്ധിക്കാത്ത രീതിയില് വേണം വ്യായാമം ചെയ്യാന്. നാഡിമിടിപ്പ് കൈത്തണ്ട് പിടിച്ചു കൊണ്ടു പരിശോധിച്ചറിയാം.
ദിവസവും വ്യായാമത്തിനായി സമയം മാറ്റിവയ്ക്കണം. അതു രാവിലെയോ വൈകിട്ടോ ആകാം. ആഹാരം കഴിഞ്ഞ ഉടനെ വ്യായാമത്തില് ഏര്പ്പെടരുത്. വ്യായാമം ചെയ്തു തുടങ്ങിയാല് അതു കൃത്യമായി തുടരുന്നുണ്ടോ എന്നു സ്വയം പരിശോധിക്കുന്നതു നല്ലതാണ്. വ്യായാമം തടസപ്പെട്ടിട്ടുണ്ടെങ്കില് അതു പരിഹരിക്കണം. അമിതഭാരമുള്ളവരിലും ഹൃദ്രോഗവും ഹൃദയാഘാതവും കൂടിവരുന്നതായി കണ്ടുവരുന്നു. ഇവര്ക്ക് വ്യായാമം ചെയ്യുവാനും മടിയുണ്ടാകും. ഈ മടി ഉപേക്ഷിച്ചില്ലെങ്കില് ഹൃദയത്തിന്റെ ആയുസ് പരുങ്ങലിലാകും.
ഹൃദയാഘാതം വന്നവര് തീവ്രവ്യായാമങ്ങള് അരുത്
ഒരു തവണ ഹൃദയാഘാതം വന്ന വ്യക്തി കൃത്യമായി വ്യായാമം ചെയ്യുകയാണെങ്കില് തുടര്ന്ന് ഹൃദയാഘാതം ഉണ്ടാകാനുള്ള സാധ്യത 25 ശതമാനം കുറയും. ഹൃദയാഘാതം വന്നവര്ക്കും എയ്റോബിക് വ്യായാമങ്ങള് തന്നെയാണ് ഉത്തരം. അനെയ്റോബിക് വ്യായാമങ്ങള് പാടെ ഉപേക്ഷിക്കണം.
ഡോക്ടറുടെ നിര്ദേശപ്രകാരം മാത്രമേ വ്യായാമം ആരംഭിക്കാന് പാടുള്ളൂ. വ്യക്തിയുടെ ഹൃദയക്ഷമതയനുസരിച്ചുള്ള വ്യായാമമുറകള് ഡോക്ടര് നിര്ദേശിക്കും.ഹൃദയാഘാതം വന്നവര് അധികം ഭാരം ഉയര്ത്താന് പാടില്ല. രണ്ടു കിലോയില് കൂടുതല് ഭാരം ഉയര്ത്തരുത്. ഭാരം ഉയര്ത്തുമ്ബോഴും അനെയ്റോബിക് വ്യായാമങ്ങള് ചെയ്യുമ്ബോഴും ഹൃദയസ്പന്ദനനിരക്കും ശ്വാസോച്ഛ്വാസവേഗതയും ഉയരുന്നു. ഇതു ഹൃദയത്തിനു ദോഷമാണ്.
ഹൃദയാഘാതം വന്നവര് ടെന്നിസ്, ഷട്ടില് പോലുള്ള കളികളില് ഏര്പ്പെടാം. പക്ഷേ, മത്സരത്തിന് ഇറങ്ങരുത്. പ്രത്യേകിച്ച് 50 വയസു കഴിഞ്ഞവര്. അതു അപകടമാണ്. ഒരു തവണ അറ്റാക്ക് വന്നു എന്നു കരുതി ജിമ്മില് പോയി വ്യായാമം ചെയ്യേണ്ട ആവശ്യമില്ല. വീട്ടില് തന്നെ ചെയ്യാവുന്ന ധാരാളം വ്യായാമങ്ങള് ഉണ്ട്. പുറത്തു പോയി നടക്കാന് പ്രയാസമുള്ളവര്ക്ക് വീട്ടില് ട്രെഡ്മില്ല് ഉപയോഗിക്കാം. വീടിനുള്ളില് തന്നെ അല്പസമയം നടക്കുന്നത് നല്ലതാണ്.
