അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
ഉമ്മുൽഖുവൈൻ: യുഎഇയിലുണ്ടായ വാഹനാപകടത്തിൽ (Road accident in UAE) യുവാവ് മരിച്ചു. ഒപ്പമുണ്ടായിരുന്ന മകൾക്ക് ഗുരുതരമായി പരിക്കേറ്റു (One died and One injured). ഉമ്മുൽഖുവൈനിൽ (Umm Al Quwain) ഞായറാഴ്‍ച രാത്രിയായിരുന്നു ദാരുണമായ അപകടമുണ്ടായത്. മരണപ്പെട്ടയാൾ അറബ് വംശജനാണെന്നാണ് റിപ്പോർട്ടുകൾ.
ശൈഖ് മുഹമ്മദ് ബിൻ സായിദ് റോഡിലായിരുന്നു അപകടം. വാഹനം പലതവണ കീഴ്‍മേൽ മറിഞ്ഞുവെന്ന് പൊലീസ് അറിയിച്ചു. ഞായറാഴ്‍ച രാത്രി 10.50നാണ് പൊലീസ് ഓപ്പറേഷൻസ് റൂമിൽ അപകടം സംബന്ധിച്ച വിവരം ലഭിച്ചത്. വാഹനം തലകീഴായി മറിഞ്ഞുവെന്നും വാഹനത്തിനുള്ളിൽ രണ്ട് പേർ കുടുങ്ങിക്കിടക്കുകയാണെന്നും പൊലീസിന് വിവരം ലഭിക്കുകയായിരുന്നു. ഉടൻ പൊലീസ്, രക്ഷാപ്രവർത്തക സംഘങ്ങൾ സ്ഥലത്തേക്ക് കുതിച്ചു. അപകടമുണ്ടായ സമയത്ത് തന്നെ യുവാവ് മരണുപ്പെട്ടിരുന്നു.
ഗുരുതരമായി പരിക്കേറ്റ മകളെ ആശുപത്രിയിലേക്ക് മാറ്റി. റോഡ് സുരക്ഷാ നിയമങ്ങൾ കർശനമായി പാലിക്കണമെന്ന് ഡ്രൈവർമാരോട് പൊലീസ് ആവശ്യപ്പെട്ടു. റോഡിലെ വേഗപരിധി ശ്രദ്ധിക്കുന്നതിന് പുറമെ വാഹനം ഓടിക്കുമ്പോൾ പൂർണശ്രദ്ധയും ഡ്രൈവിങിലായിരിക്കണമെന്നും ഇടയ്‍ക്ക് ക്ഷീണമോ ഉറക്കമോ അനുഭവപ്പെടുകയാണെങ്കിൽ വാഹനം നിർത്തിയിട്ട് വിശ്രമിക്കണമെന്നും പൊലീസ് അഭ്യർത്ഥിച്ചു.
