അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ആറ്റിങ്ങൽ ∙ ഒന്നാം തീയതി സ്കൂൾ തുറക്കാനിരിക്കെയാണ് എല്ലാവരെയും ഞെട്ടിച്ചുകൊണ്ട് ഇങ്ങനെയൊരു സംഭവം ലംകോട് ഗവ. വി ആൻഡ് എച്ച് എസ് എസ്സിലെ ഹൈസ്കൂൾ വിഭാഗവും ഓഫിസും പ്രവർത്തിച്ചിരുന്ന ബഹുനില മന്ദിരത്തിന്റെ ഒരുഭാഗം ഇടിഞ്ഞു വീണു. മൂന്ന് നിലകളുള്ള കെട്ടിടത്തിന്റെ മുകൾ നിലയുടെ ടെറസിലെ പുറത്തേക്ക് തള്ളി നിൽക്കുന്ന ഭാഗം ആണ് തകർന്നത്. വ്യാഴാഴ്ച രാവിലെ കെട്ടിടം ഇടിഞ്ഞു കിടക്കുന്നത് ശ്രദ്ധയിൽ പെട്ട സമീപവാസിയാണ് വിവരം സ്കൂൾ അധികൃതരെ അറിയിച്ചത്. ബുധനാഴ്ച രാത്രി കെട്ടിടം ഇടിഞ്ഞ് വീണെന്നാണ് കരുതുന്നത്. സ്കൂൾ തുറക്കുമ്പോൾ ക്ളാസ് നടത്താനിരുന്ന ഭാഗമാണ് ഇടിഞ്ഞത്.
38 വർഷം പഴക്കമുള്ള കെട്ടിടമാണ് തകർന്നതെന്നു സ്കൂൾ അധികൃതർ പറഞ്ഞു. 1984 ലാണ് 21 ക്ലാസ് മുറികളോട് കൂടിയ കെട്ടിടം ഉദ്ഘാടനം ചെയ്തത്. ഹൈസ്കൂൾ വിഭാഗത്തിന്റെ മുഴുവൻ ക്ലാസുകളും ,ഓഫിസ്, ലാബ് , എന്നിവയും ഈ കെട്ടിടത്തിലാണ് പ്രവർത്തിക്കുന്നത്. പത്ത് വർഷം മുൻപ് കെട്ടിടത്തിലെ ടെറസിലെ ചോർച്ച മാറ്റുന്നതിനായി ഷീറ്റു മേഞ്ഞിരുന്നു. എന്നാൽ ഇതും വർഷങ്ങളായി നശിച്ച അവസ്ഥയിലായിരുന്നു.
കെട്ടിടത്തിന്റെ പിൻഭാഗത്ത് ഏകദേശം പകുതിയോളം ഭാഗമാണ് കൈവരിയും കോൺക്രീറ്റും അടക്കം ഇടിഞ്ഞത്. ഇവ താഴേക്ക് പതിക്കാതെ ഭിത്തിയോട് ചേർന്ന് ഏത് സമയവും നിലംപതിക്കാവുന്ന സ്ഥിതിയിൽ തൂങ്ങി നിൽക്കുന്ന അവസ്ഥയിലാണ് . കെട്ടിടത്തോടു ചേർന്നാണ് കുട്ടികളുടെ ശുചിമുറികൾ സ്ഥിതി ചെയ്യുന്നത്. ശുചിമുറി ഉപയോഗിക്കാൻ എത്തുന്നവർക്കും അപകട ഭീഷണി ഉയർത്തുകയാണ് .ഹയർ സെക്കൻഡറി വിഭാഗം പ്രവർത്തിക്കുന്ന കെട്ടിടത്തിൽ പത്താം ക്ലാസിലെ കുട്ടികളെ ഇരുത്തി ക്ലാസ് എടുക്കുന്നതിനുള്ള താൽക്കാലിക സൗകര്യം ഒരുക്കിയിട്ടുണ്ട്.എത്രയും പെട്ടെന്ന് തന്നെ കുട്ടികൾക്ക് ആവശ്യസൗകാര്യങ്ങൾ ഒരുക്കി കൊടുക്കാനുള്ള ഓട്ടത്തിലാണ് സ്കൂൾ ഡിപ്പാർട്ട്മെന്റ്
പ്ലസ് വൺ , എട്ട് ഒൻപത് ക്ലാസുകൾ അടുത്ത മാസം പതിനഞ്ചിന് ആരംഭിക്കും . മറ്റു ക്ലാസുകൾ കൂടി ആരംഭിക്കുന്നതോടെ പ്രശ്നം സങ്കീർണമാകുമെന്നു സ്കൂൾ അധികൃതർ പറഞ്ഞു. തകർന്ന കെട്ടിടം ഉപയോഗയോഗ്യമല്ല എന്ന് പഞ്ചായത്തധികൃതർ അറിയിച്ചിട്ടുണ്ട്. ഓഫിസ്, ലാബ് , തുടങ്ങിയവയും അടിയന്തരമായി സുരക്ഷിത സ്ഥാനത്തേക്ക് മാറ്റാനും നിർദേശിച്ചുണ്ട്. ത്രിതല പഞ്ചായത്ത് പ്രതിനിധികളടക്കം ജനപ്രതിനിധികൾ സ്കൂൾ സന്ദർശിച്ചു
