അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
തിരുവനന്തപുരം: സംസ്ഥാന സര്ക്കാര് ആവിഷ്ക്കരിച്ച ‘വിശപ്പ് രഹിത കേരളം’ പദ്ധതിയുടെ ഭാഗമായി കുടുംബശ്രീ മുഖേന സംസ്ഥാനത്ത് നടപ്പാക്കി വരുന്ന ജനകീയ ഹോട്ടലുകളുടെ ഗ്രേഡിങ്ങ് പൂര്ത്തീകരിച്ചു. ഇവയുടെ പ്രവര്ത്തനക്ഷമതയും നിലവാരവും മെച്ചപ്പെടുത്തി മികവിന്റെ അടുത്തഘട്ടത്തിലേക്ക് ഉയര്ത്തുക എന്നതാണ് ഗ്രേഡിങ്ങിലൂടെ ലക്ഷ്യമിടുന്നത്. ഇത് പ്രകാരം നിലവില് സംസ്ഥാനത്ത് സൂക്ഷ്മസംരംഭ മാതൃകയില് പ്രവര്ത്തിക്കുന്ന 1095 ജനകീയ ഹോട്ടലുകളുടെയും ഗ്രേഡിങ്ങ് പ്രത്യേകം നിര്ണയിക്കപ്പെട്ട സൂചികകളുടെ അടിസ്ഥാനത്തില് പൂര്ത്തീകരിച്ചിരിക്കയാണ്.
ഇന്സ്റ്റിറ്റ്യൂട്ട് ഓഫ് ഹോട്ടല് മാനേജ്മെന്റ് ആന്ഡ് ടെക്നോളജിയുമായി സഹകരിച്ചുകൊണ്ടാണ് ഗ്രേഡിങ്ങിനാവശ്യമായ സൂചികകള് തയ്യാറാക്കിയത്. ഇതുപ്രകാരം ശുചിത്വം, വിഭവങ്ങളുടെ വൈവിധ്യം, ഭക്ഷണത്തിന്റെ ഗുണമേന്മ, പ്രവര്ത്തന സമയം, പ്രതിമാസ വിറ്റുവരവ്, സ്ഥാപനം പ്രവര്ത്തിക്കുന്ന കെട്ടിടത്തിന്റെയും ചുറ്റുപാടുകളുടെയും അവസ്ഥ എന്നീ മാനദണ്ഡങ്ങളുടെ അടിസ്ഥാനത്തിലാണ് ഗ്രേഡിങ്ങ് പൂര്ത്തീകരിച്ചത്. ഇതുപ്രകാരം 266 ജനകീയ ഹോട്ടലുകള് എപ്ളസ് ഗ്രേഡും 359 എണ്ണം ‘എ’ ഗ്രേഡും 285 എണ്ണം ‘ബി’ ഗ്രേഡും 185 എണ്ണം ‘സി’ ഗ്രേഡും നേടിയിട്ടുണ്ട്. ഉയര്ന്ന ഗ്രേഡിങ്ങ് കൈവരിക്കാന് കഴിയാതെ പോയ ജനകീയ ഹോട്ടലുകള് നടത്തുന്ന സംരംഭകര്ക്ക് അത് ലഭ്യമാക്കുന്നതിന് ആവശ്യമായ പരിശീലനങ്ങളും സാമ്പത്തിക സഹായമടക്കമുള്ള പിന്തുണകളും ലഭ്യമാക്കും.
പ്രതിദിനം 1. 80 ലക്ഷം ഉച്ചയൂണ് വരെയാണ് ജനകീയ ഹോട്ടലുകള് വഴിയുള്ള വില്പന. ജനകീയ ഹോട്ടലുകളുടെ പ്രവര്ത്തനം കൂടുതല് മെച്ചപ്പെടുത്തുന്നതിനൊപ്പം പൊതുജനങ്ങള്ക്ക് ഏറെ പ്രയോജനകരമാകുന്ന രീതിയില്, പ്രാദേശിക സാധ്യതക്കനുസൃതമായി കൂടുതല് ഇടങ്ങളിലേക്ക് വ്യാപിപ്പിക്കുവാനും ലക്ഷ്യമിടുന്നുണ്ട്. ഇതിലൂടെ കാന്റീന്, കാറ്ററിങ്ങ് തുടങ്ങിയ മേഖലകളില് പ്രവര്ത്തിക്കുന്ന നിരവധി വനിതകള്ക്ക് ഈ രംഗത്തേക്ക് കടന്നു വരാനും വരുമാനം നേടാനും അവസരമൊരുങ്ങും. പദ്ധതിക്കായി 2020-21 സാമ്പത്തിക വര്ഷം അനുവദിച്ച 23.64 കോടി രൂപ പൂര്ണമായും വിനിയോഗിച്ചു. ഈ വര്ഷം അനുവദിച്ച 20 കോടിയില് 18.20 കോടി രൂപ സബ്സിഡിയും റിവോള്വിങ്ങ് ഫണ്ടുമായി സംരംഭകര്ക്ക് നല്കിയിട്ടുണ്ട്.
2019-20 സാമ്പത്തിക വര്ഷത്തില് സര്ക്കാര് ബജറ്റില് അവതരിപ്പിച്ച ജനക്ഷേമ പദ്ധതിയാണ് ‘വിശപ്പുരഹിത കേരളം’. സാമ്പത്തികമായി പിന്നാക്കം നില്ക്കുന്നവരും അഗതികളും വയോജനങ്ങളും നിരാലംബരും ഉള്പ്പെടെയുള്ളവര്ക്ക് എല്ലാ ദിവസവും മിതമായ നിരക്കിലോ സൗജന്യമായോ ഉച്ചഭക്ഷണം വിതരണം ചെയ്യുക എന്നതാണ് പദ്ധതിയുടെ ലക്ഷ്യം. കോവിഡ് 19 പ്രതിരോധ പ്രവര്ത്തനങ്ങളുടെ ഭാഗമായി എല്ലാവര്ക്കും ഭക്ഷണ ലഭ്യത ഉറപ്പുവരുത്തുന്നതിനായി ആദ്യഘട്ടത്തില് കമ്യൂണിറ്റി കിച്ചന് എന്ന നിലയ്ക്കാണ് പ്രവര്ത്തനം ആരംഭിച്ചത്. തുടര്ന്ന് ‘കുടുംബശ്രീ ജനകീയ ഹോട്ടലുകള്’ ഭക്ഷണ ലഭ്യത ഉറപ്പുവരുത്തി. തദ്ദേശ സ്വയംഭരണ സ്ഥാപനങ്ങള് ഭക്ഷ്യ സിവില് സപ്ളൈസ് വകുപ്പുമായി ചേര്ന്നുകൊണ്ടാണ് പ്രവര്ത്തനം സംഘടിപ്പിക്കുന്നത്. നിലവില് ഇരുപത് രൂപയ്ക്കാണ് ഇവിടെ നിന്നും ഉച്ചയൂണ് ലഭിക്കുന്നത്. പദ്ധതി വഴി 4895 കുടുംബശ്രീ വനിതകള്ക്ക് സ്ഥിര വരുമാനം നേടാന് കഴിയുന്നുണ്ട്.
നവകേരളം 2021 പുരസ്കാരം
തദ്ദേശ സ്വയംഭരണ പ്രദേശങ്ങളിലെ ഖരമാലിന്യ സംസ്കരണത്തിന് ഫലപ്രദമായ സൗകര്യങ്ങളൊരുക്കിയ തദ്ദേശ സ്വയംഭരണ സ്ഥാപനങ്ങള്ക്കുള്ള നവകേരള പുരസ്കാരം മുഖ്യമന്ത്രിയുടെ നൂറുദിന കര്മപരിപാടിയില് പ്രഖ്യാപിച്ച കാര്യമാണ്. ഹരിത കേരള മിഷനും ശുചിത്വമിഷനും പരിശോധിച്ച് ജില്ലാ ശുചിത്വ സമിതി നോമിനേറ്റ് ചെയ്ത തദ്ദേശ സ്വയംഭരണ സ്ഥാപനങ്ങളുടെ ലിസ്റ്റ് അംഗീകരിച്ചുകൊണ്ടാണ് പുരസ്കാര ജേതാക്കളെ തെരഞ്ഞെടുത്തിരിക്കുന്നത്. വിധി നിര്ണയത്തിനുള്ള എല്ലാ ഘടകങ്ങളിലും 70 ശതമാനത്തിന് മുകളില് മാര്ക്ക് നേടിയിരിക്കുന്നവരെയാണ് പുരസ്കാരത്തിന് പരിഗണിച്ചിരിക്കുന്നത്.
ജില്ലയില് ഉയര്ന്ന മാര്ക്ക് നേടിയ ഒരു ഗ്രാമപഞ്ചായത്തിനും ഒരു നഗരസഭയ്ക്കും നവകേരളം 2021 പുരസ്കാരവും പ്രശംസാ പത്രവും 2 ലക്ഷം രൂപ പുരസ്കാര തുകയായും സമ്മാനിക്കും.
പുരസ്കാരത്തിന് അര്ഹരായ തദ്ദേശ സ്വയംഭരണ സ്ഥാപനങ്ങളെ പ്രഖ്യാപിക്കുകയാണ്.
1) തിരുവനന്തപുരം ജില്ലയില് പൂവച്ചല് ഗ്രാമപഞ്ചായത്തും ആറ്റിങ്ങല് നഗരസഭയും നവകേരളം 2021 പുരസ്കാരത്തിന് അര്ഹരായി.
2) കൊല്ലം ജില്ലയില് ശാസ്താംകോട്ട ഗ്രാമപഞ്ചായത്തും പുനലൂര് നഗരസഭയും നവകേരളം 2021 പുരസ്കാരത്തിന് അര്ഹരായി.
3) പത്തനംതിട്ട ജില്ലയില് തുമ്പമണ് ഗ്രാമപഞ്ചായത്തും തിരുവല്ല നഗരസഭയും നവകേരളം 2021 പുരസ്കാരത്തിന് അര്ഹരായി.
4) ആലപ്പുഴ ജില്ലയില് ആര്യാട് ഗ്രാമപഞ്ചായത്തും ആലപ്പുഴ നഗരസഭയും നവകേരളം 2021 പുരസ്കാരത്തിന് അര്ഹരായി.
5) ഇടുക്കിയില് രാജക്കാട് ഗ്രാമപഞ്ചായത്ത് നവകേരളം 2021 പുരസ്കാരത്തിന് അര്ഹരായി. ജില്ലയിലെ നഗരസഭകള് പുരസ്കാരത്തിന് അര്ഹരായിട്ടില്ല.
6) കോട്ടയത്ത് അയ്മനം ഗ്രാമപഞ്ചായത്ത് നവകേരളം 2021 പുരസ്കാരത്തിന് അര്ഹരായി. ജില്ലയിലെ നഗരസഭകള് പുരസ്കാരത്തിന് അര്ഹരായിട്ടില്ല.
7) എറണാകുളത്ത് ചോറ്റാനിക്കര ഗ്രാമപഞ്ചായത്തും ഏലൂര് നഗരസഭയും നവകേരളം 2021 പുരസ്കാരത്തിന് അര്ഹരായി.
8) തൃശൂര് ജില്ലയില് തെക്കുംകര ഗ്രാമപഞ്ചായത്തും കുന്നംകുളം നഗരസഭയും നവകേരളം 2021 പുരസ്കാരത്തിന് അര്ഹരായി.
9) പാലക്കാട് ജില്ലയില് വെള്ളിനേഴി ഗ്രാമപഞ്ചായത്തും ചിറ്റൂര് -തത്തമംഗലം നഗരസഭയും നവകേരളം 2021 പുരസ്കാരത്തിന് അര്ഹരായി.
10) മലപ്പുറത്ത് കീഴാറ്റൂര് ഗ്രാമപഞ്ചായത്തും തിരൂര് നഗരസഭയും നവകേരളം 2021 പുരസ്കാരത്തിന് അര്ഹരായി.
11) കോഴിക്കോട് ജില്ലയില് അഴിയൂര് ഗ്രാമപഞ്ചായത്തും വടകര നഗരസഭയും നവകേരളം 2021 പുരസ്കാരത്തിന് അര്ഹരായി.
12) വയനാട് മീനങ്ങാടി ഗ്രാമപഞ്ചായത്ത് നവകേരളം 2021 പുരസ്കാരത്തിന് അര്ഹരായി. അവിടെ നഗരസഭകളൊന്നും പുരസ്കാരത്തിന് അര്ഹരായിട്ടില്ല.
13) കണ്ണൂര് ജില്ലയില് ചെമ്പിലോട് ഗ്രാമപഞ്ചായത്തും ആന്തൂര് നഗരസഭയും നവകേരളം 2021 പുരസ്കാരത്തിന് അര്ഹരായി.
14) കാസര്ഗോഡ് ജില്ലയില് ബേഡഡുക്ക ഗ്രാമപഞ്ചായത്തും നീലേശ്വരം നഗരസഭയും നവകേരളം പുരസ്കാരത്തിന് അര്ഹരായി.
