അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
തിരുവനന്തപുരം: സംസ്ഥാനത്ത് ലോക്ഡൗൺ മാനദണ്ഡങ്ങളിൽ മാറ്റം. പ്രതിവാര ഇന്ഫക്ഷന് പോപ്പുലേഷന് റേഷ്യോ (WIPR)8 ന് മുകളിലുള്ള സ്ഥലങ്ങളിൽ ലോക്ഡൗൺ ഏർപ്പെടുത്തണമെന്ന് മുഖ്യമന്ത്രി പിണറായി വിജയന് കൊവിഡ് അവലോകന യോഗത്തില് നിർദ്ദേശിച്ചു. ഡബ്ല്യുഐപിആര് നിരക്ക് 14 ല് കൂടുതലുള്ള ജില്ലകളില് മൈക്രോ കണ്ടയ്ന്മെന്റ് സോണുകള് 50 ശതമാനത്തിലധികം വര്ദ്ധിപ്പിക്കും.
ഇതുവരെ വാക്സിന് ലഭ്യമാകാത്തവര്ക്കും ചില അസുഖങ്ങള് കാരണം വാക്സിന് സ്വീകരിക്കാന് കഴിയാത്തവര്ക്കും അവശ്യസാധനങ്ങള് വാങ്ങുന്നതിനു കടകളില് പോകാന് അനുവദിക്കണമെന്ന ആവശ്യം ഉയര്ന്നിട്ടുണ്ട്. കടകളിലും മറ്റും പോകാന് അര്ഹതാ മാനദണ്ഡമുള്ള ആരും തന്നെ വീട്ടിലില്ലെങ്കില് അവശ്യസാധനങ്ങള് വാങ്ങാന് കടകളില് പോകാവുന്നതാണ്.
വാക്സിന് സ്വീകരിക്കാന് കഴിയാത്തവര്ക്ക് അവശ്യസാധനങ്ങള് വാങ്ങാന് പുറത്തിറങ്ങാന് കഴിയുന്നില്ലെന്ന പരാതി ഉയര്ന്നതിനെ തുടര്ന്നാണ് വിവാദ തീരുമാനം തിരുത്താന് സര്ക്കാര് തയ്യാറായിരിക്കുന്നത്. ഇത്തരത്തിലുള്ള വീടുകളില് ഹോം ഡെലിവറി ചെയ്യാന് വ്യാപാരികള് ശ്രദ്ധിക്കണമെന്നും അവര്ക്ക് കടകളില് പ്രത്യേക പരിഗണന നല്കണമെന്നും അവലോകന യോഗത്തില് ആവശ്യമുയര്ന്നു.
ഓണത്തിന് ആൾക്കൂട്ടം ഉണ്ടാകുന്ന പരിപാടികൾ അനുവദിക്കില്ല. ബീച്ചുകളില് നിയന്ത്രണമുണ്ടാകും. ലൈസന്സ് ഉള്ളവര്ക്കു മാത്രമാകും വഴിയോരക്കച്ചവടം അനുവദിക്കുക. തദ്ദേശ സ്വയംഭരണ സ്ഥാപനാടിസ്ഥാനത്തില് വ്യാപാരികളുടെ യോഗം വിളിക്കും. ഒരു പൊലീസ് സ്റ്റേഷന് പരിധിയില് വ്യത്യസ്ത തദ്ദേശ സ്ഥാപനങ്ങളുണ്ടെങ്കില് ഓരോ സ്ഥാപനത്തിന്റെയും യോഗം വെവ്വേറെ വിളിക്കും. തദ്ദേശ സ്ഥാപന അധ്യക്ഷന്മാര് കൂടി പങ്കെടുത്തുകൊണ്ടാകും യോഗം.
ശബരിമലയില് മാസപൂജക്ക് പ്രതിദിനം 15,000 പേര്ക്ക് പ്രവേശനം അനുവദിക്കാനും തീരുമാനമായി. ഓഗസ്റ്റ് 15 ന് നട തുറക്കുമ്ബോള് രണ്ടു ഡോസ് വാക്സിനോ 72 മണിക്കൂറിനകമുള്ള കോവിഡ് നെഗറ്റീവ് സര്ട്ടിഫിക്കറ്റോ ഉള്ളവര്ക്ക് വെര്ച്വല് ക്യൂ വഴി ദര്ശനം അനുവദിക്കും.
വിമാനത്താവളങ്ങളില് എത്തുന്ന പ്രവാസികള്ക്ക് ആര് ടി പി സി ആര് ടെസ്റ്റ് നടത്തുന്നതിനു ഏകീകൃത നിരക്ക് നിശ്ചയിക്കും. 20 ലക്ഷം ഡോസ് വാക്സിന് വാങ്ങി സ്വകാര്യ ആശുപത്രികള്ക്കു നല്കും. ഇതിനുള്ള നടപടികള് പൂര്ത്തിയായി.
