അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.തെന്നിന്ത്യന്‍ സിനിമയിലെ ക്യൂട്ട് ഗേളാണ് തൃഷ. തെന്നിന്ത്യന്‍ സിനിമാപ്രേമികളുടെ പ്രിയങ്കരിയുമാണ് തൃഷ കൃഷ്ണന്‍. അഭിനയിച്ച സിനിമയെല്ലാം സൂപ്പര്‍ ഹിറ്റുകളും. സ്വന്തം വീട്ടിലെ ഒരംഗത്തെപ്പോലെ തോന്നിക്കുന്ന പ്രകൃതമാണ് തൃഷയുടേത്. അഭിനയിച്ച പടങ്ങളിലെല്ലാം ആരാധകരെ വല്ലാതെ ഇഷ്ടപ്പെടുത്തിയ ക്യൂട്ട് താരം കൂടിയാണ് തൃഷ. തെന്നിന്ത്യന്‍ സിനിമയിലെ എല്ലാ പ്രധാന നായകന്‍മാരോടുമൊപ്പം തൃഷ അഭിനയിച്ചിട്ടുണ്ട്. വിജയ്‌യുടെ ഗില്ലി വന്‍ഹിറ്റായിരുന്നു. ലിയോയിലും നായികയായി അഭിനയിച്ചു. ചിയാംഗ് വിക്രത്തിനൊപ്പം സാമി, ഭീമ സിനിമകളിലും തകര്‍ത്തഭിനയിച്ചു.
അജിത്തിനൊപ്പവും, സൂര്യയ്‌ക്കൊപ്പവും തൃഷ അഭിനയിച്ചിട്ടുണ്ട്. മലയാള മണ്ണിന്റെ സ്വന്തം പുത്രിയായ തൃഷ പ്രശസ്ത തമിഴ്, തെലുഗു ചലച്ചിത്ര താരമായാണ് അറിയപ്പെടുന്നത്. കൃഷ്ണന്റെയും ഉമ കൃഷ്ണന്റെയും മകളായി പാലക്കാടാണ് ജനിച്ചത്. ചെന്നൈയിലായിരുന്നു പഠനം. 1999ല്‍ മിസ്സ് ചെന്നൈ, 2001ല്‍ മിസ്സ് ഇന്ത്യ തുടങ്ങിയ മത്സരങ്ങളില്‍ പങ്കെടുത്തിരുന്നു. പരസ്യചിത്രങ്ങളിലൂടെയാണ് ചലച്ചിത്രരംഗത്തേക്ക് കടക്കുന്നത്. ജോഡി എന്ന ചിത്രത്തില്‍ ഒരു കാമിയോ വേഷത്തിലാണ് ആദ്യമായി അഭിനയിച്ചത്. പിന്നീട് പ്രിയദര്‍ശന്‍ സംവിധാനം ചെയ്ത ലേയ്സ ലേയ്സ എന്ന ചിത്രത്തില്‍ അഭിനയിച്ചു. സൂര്യയോടൊപ്പം അഭിനയിച്ച മൗനെ പേസിയാതെ എന്ന ചിത്രത്തിലൂടെയാണ് തൃഷ ചലച്ചിത്രരംഗത്ത് പ്രശസ്തയാവുന്നത്.
പിന്നീട് വിക്രം അഭിനയിച്ച സാമി എന്ന ചിത്രത്തില്‍ അഭിനയിച്ചു. ചിത്രം മികച്ച വിജയം നേടി. അതിനുശേഷം വിജയ് നായകനായി എത്തിയ ഗില്ലി എന്ന ചിത്രത്തില്‍ അഭിനയിച്ചു. ആ ചിത്രവും വാണിജ്യപരമായി മികച്ച വിജയം നേടി. പിന്നീട് നിരവധി ചിത്രങ്ങളില്‍ നായികയായി തൃഷ തിളങ്ങി. അജിത്തിന്റെ വരാനിരിക്കുന്ന വിടാ മുയര്‍ച്ചിയിലും തൃഷയാണ് നായികയെന്ന് റിപ്പോര്‍ട്ടുകള്‍ ഉണ്ടായിരുന്നു. മണി രത്‌നത്തിന്റെ പൊന്നിയിന്‍ സെല്‍വനിലെ കുന്ദവൈ എന്ന കഥാപാത്രത്തിലൂടെ തൃഷയ്ക്ക് സമീപകാലത്ത് പാന്‍ ഇന്ത്യന്‍ ശ്രദ്ധയും ലഭിച്ചു.
ഹേയ് ജൂഡ്, റാം തുടങ്ങിയ മലയാള ചലച്ചിത്രങ്ങളില്‍ അഭിനയിച്ചിട്ടുണ്ട്. ഇപ്പോഴിതാ വീണ്ടും മലയാള സിനിമയില്‍ അഭിനയിക്കാന്‍ പോവുകയാണ്. ഇതിന്റെ ഷൂട്ടിംഗിനായി തൃഷ കേരളത്തില്‍ വന്നിരുന്നു. അതും തലസ്ഥാനത്ത്. അഞ്ചു ദിവസത്തെ ഷൂട്ടിംഗിനാണ് എത്തിയത്. ചിത്രാഞ്ജലി സ്റ്റുഡിയോയില്‍ വെച്ചായിരുന്നു ഷൂട്ടിംഗ്. വന്നിട്ടു പോയത് ആരും അറിഞ്ഞില്ല. കഴിഞ്ഞ 8, 9, 10, 11, 12 തീയതികളിലായിരുന്നു ഷൂട്ടിംഗിന്റെ ആദ്യ ഷെഡ്യൂള്‍ നടന്നത്. വലിയ പബ്ലിസിറ്റി കൊടുക്കാതെയാണ് തൃഷ എത്തിയതു പോലും. ടൊവിനോ നായകനാകുന്ന ഐഡന്റിറ്റി എന്ന സിനിമയുടെ ഷൂട്ടിംഗിനായിരുന്നു തൃഷ എത്തിയത്. സിനിമയുടെ സെക്കന്റ് ഷെഡ്യൂളിനായി ടൊവിനോയും തൃഷയും തലസ്ഥാനത്ത് എത്തുന്നുണ്ട്.
സെക്കന്റ് ഷെഡ്യൂള്‍ എന്നാണെന്ന് തീരുമാനിച്ചിട്ടില്ല. പക്ഷെ, വരുമെന്നുറപ്പാണ്. അടുത്ത സമയത്താണ് സൂപ്പര്‍സ്റ്റാര്‍ രജനികാന്ത് ശംഖുമുഖത്ത് എത്തിയത്. അതും സിനിമാ ഷൂട്ടിംഗിനു വേണ്ടിയായിരുന്നു. ആരാധകരുടെ അമിതാവേശം പല സന്ദര്‍ഭങ്ങളിലും ഗതാഗത തസ്സം ഉണ്ടാക്കിയിരുന്നു. ഇതിനുശേഷം വന്ന വിജയ് തലസ്ഥാനമാകെ നിശ്ചലമാക്കിക്കളഞ്ഞു. കേരളമൊട്ടാകെയുള്ള ആരാധകരാണ് വിജയിനെ കാണാന്‍ തലസ്ഥാനത്തേക്ക് എത്തിയത്. ആരാധകരുടെ തള്ളിക്കയറ്റം മുന്‍കൂട്ടി മനസ്സിലാക്കിയാണ് തൃഷ വന്നതും പോയതും ആരെയും അറിയിക്കാതിരുന്നതെന്നാണ് സിനിമാ പ്രവര്‍ത്തകര്‍ പറയുന്നത്.
