അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ലോക്‌സഭാ തെരഞ്ഞെടുപ്പിലുണ്ടായ കനത്ത തോല്‍വിക്കു പിന്നാലെ സി.പി.എം നിയമസഭാ ഉപതെരഞ്ഞെടുപ്പിന്റെ മുന്നൊരുക്കങ്ങളിലേക്ക് കടന്നിരിക്കുകയാണ്. ഇതിന്റെ സൂചനയാണ് പ്രമുഖ ദൃശ്യമാധ്യമ പ്രവര്‍ത്തകനും റിപ്പോര്‍ട്ടര്‍ ടി.വി എഡിറ്റര്‍ ഇന്‍ ചീഫുമായ എം.വി നികേഷ് കുമാറിന്റെ പൂര്‍ണ്ണ സമയ രാഷ്ട്രീയ പ്രവര്‍ത്തനത്തിലേക്കുള്ള വരവ്. നികേഷ് കുമാറിനെ പാലക്കാട് നിയമസഭാ ഉപതിരഞ്ഞെടുപ്പിലെ സ്ഥാനാര്‍ത്ഥി പട്ടികയിലേക്ക് സി.പി.എം പരിഗണിച്ചേക്കുമെന്ന് ഉറപ്പിക്കാനാകും.
കാരണം, പാര്‍ട്ടിയില്‍ നിന്നും യാതൊരുറപ്പും കിട്ടാതെ നികേഷ് കുമാര്‍ മാധ്യമ പ്രവര്‍ത്തനം പൂര്‍ണ്ണമായി വിടില്ല. അങ്ങനെ പൂര്‍ണ്ണസമയ രാഷ്ട്രീയ പ്രവര്‍ത്തകനാകുമായിരുന്നു എങ്കില്‍ അഴീക്കോട് മത്സരിക്കുമ്പോള്‍ തന്നെ ഉണ്ടായേനെ. പക്ഷെ, അന്നതുണ്ടായില്ല. തിരികെ മാധ്യമ പ്രവര്‍ത്തകനാവുകയും, റിപ്പോര്‍ട്ടര്‍ ചാനലിനൊപ്പം പ്രവര്‍ത്തിക്കുകയും ചെയ്യുകയായിരുന്നു. എന്നാല്‍, കണ്ണൂര്‍ ജില്ലാ കമ്മിറ്റിയിലേക്ക് സ്ഥിരം ക്ഷണിതാവായിരിക്കും നികേഷ് കുമാറെന്ന് അന്നത്തെ നിയമസഭാ തോല്‍വിക്കു ശേഷം പാര്‍ട്ടി പറഞ്ഞിരുന്നത് വലിയ വാര്‍ത്തയുമായിരുന്നു.
പിന്നീട് നികേഷ്‌കുമാറിന്റെ വാര്‍ത്താധിഷ്ഠിത പരിപാടികളില്‍ സി.പി.എമ്മിന് അനുകൂലമായി അവതാരക വേഷത്തില്‍ ഇരുന്നതല്ലാതെ പാര്‍ട്ടി പരിപാടികളില്‍ പ്രത്യക്ഷപ്പെടാന്‍ തയ്യാറായില്ല. ഈ സാഹചര്യത്തിലാണ് നികേഷ് കുമാര്‍ വീണ്ടും സി.പി.എമ്മിന്റെ സജീവ പ്രവര്‍ത്തകനായി മാറുന്നത്. ലോക്‌സഭാ തെരഞ്ഞെടുപ്പ് തോല്‍വിയും, പാലക്കാട് ഉപതെരഞ്ഞെടുപ്പും ഇതിന് കാരണമായി എന്നു തന്നെ പറയേണ്ടി വരും.
സി.പി.എം അണികള്‍ ഈ നീക്കത്തെ എത്രകണ്ട് സ്വീകരിക്കുമെന്നതാണ് മറ്റൊരു കാര്യം. കാരണം, പാര്‍ട്ടി നേതൃത്വത്തിന്റെ നടപടികള്‍ക്കെതിരേ ശക്തമായ പ്രതിഷേധം അറിയിക്കുകയാണ് ഓരോ ജില്ലാക്കമ്മിറ്റികളിലും. അതിനിടയില്‍ ഉപതെരഞ്ഞെടുപ്പുകള്‍ കൂടി പരാജയപ്പെടുന്ന സാഹചര്യം ആലോചിക്കാന്‍ പോലും കഴിയില്ല. മാത്രമല്ല, പാലക്കാട് ബ.ജെ.പി രണ്ടാം സ്ഥാനത്താണിപ്പോള്‍. ഉപതെരഞ്ഞെടുപ്പില്‍ ശക്തനായ സ്ഥാനാര്‍ത്ഥിയെ ഇറക്കിയില്ലെങ്കില്‍ എന്തും സംഭവിക്കാം.
അതുകൊണ്ട് ചേലക്കര സീറ്റ് നിലനിര്‍ത്തുന്നതോടൊപ്പം പാലക്കാട് നിയമസഭാ സീറ്റ് പിടിച്ചെടുക്കുകയോ വോട്ട് വര്‍ദ്ധനവ് ഉണ്ടാക്കുകയോ ചെയ്താല്‍ അത് 2026ലെ പൊതു തിരഞ്ഞെടുപ്പിനെ നേരിടാന്‍ ഇടതുപക്ഷത്തിന് കരുത്താകുമെന്നാണ് സി.പി.എം നേതൃത്വം കണക്ക് കൂട്ടുന്നത്. പാലക്കാട് സി.പി.എം പരിഗണനയില്‍ മുന്‍ എം.പി എന്‍.എന്‍ കൃഷ്ണദാസ് മുതല്‍ സി.പി.എം യുവനേതാവ് നിതിന്‍ കണിച്ചേരി വരെ ഉണ്ടെങ്കിലും, ഒരു താര പരിവേഷമുള്ള സ്ഥാനാര്‍ത്ഥി വേണമെന്ന ആവശ്യം ശക്തമായാല്‍ ഇപ്പോഴത്തെ സാഹചര്യത്തില്‍ എം.വി നികേഷ് കുമാറിനു തന്നെ നറുക്ക് വീഴാനാണ് സാധ്യത.
2019ല്‍ 3,859 വോട്ടുകള്‍ക്കാണ് ഷാഫി പറമ്പില്‍ പാലക്കാട് നിന്നും വിജയിച്ചത്. ഇപ്പോള്‍ നടന്ന ലോക്സഭ തിരഞ്ഞെടുപ്പിലെ കണക്കുകള്‍ പ്രകാരം, 9,707 വോട്ടിന്റെ ലീഡ് പാലക്കാട് നിയമസഭ മണ്ഡലത്തില്‍ യു.ഡി.എഫിന് ഉണ്ടെങ്കിലും ഉപതിരഞ്ഞെടുപ്പ് വന്നാല്‍ കാര്യങ്ങള്‍ കൂടുതല്‍ സങ്കീര്‍ണ്ണമാകും. ബി.ജെ.പി രണ്ടാം സ്ഥാനത്ത് നില്‍ക്കുന്ന പാലക്കാട് നിയമസഭാ മണ്ഡലത്തില്‍, ബി.ജെ.പി വിജയിക്കാതിരിക്കാന്‍ സി.പി.എം വോട്ടുകളും ഷാഫിക്ക് ലഭിച്ചിരുന്നു.
എന്നാല്‍ പുതിയ സാഹചര്യത്തില്‍ ഇത്തരം ഒരു വോട്ട് ഷിഫ്റ്റിനുള്ള സാധ്യത വളരെ കുറവാണ്. പരമാവധി വോട്ട് പിടിച്ച് കരുത്ത് കാട്ടാനാണ് ഇത്തവണ സി.പി.എം ശ്രമിക്കുക. ഇവിടെയാണ് നികേഷിനെ പോലെയുള്ളവരുടെ പേരിനും പ്രസക്തി വര്‍ദ്ധിക്കുന്നത്. എന്നാല്‍, അഴീക്കോട് നടത്തിയ പ്രചാരണ തന്ത്രവുമായി പാലക്കാട് പോയാല്‍ നികേഷ് പച്ചതൊടില്ലെന്നാണ് പാര്‍ട്ടി പ്രവര്‍ത്തകര്‍ പറയുന്നത്. ഗിമ്മിക്കുകളില്‍ വീഴുന്നവരല്ല പാലക്കാടുകാര്‍.
സത്യസന്ധരായ മനുഷ്യര്‍ക്കൊപ്പം നില്‍ക്കുന്നവരാണ്. 2016ലാണ് കണ്ണൂര്‍ ജില്ലയിലെ അഴീക്കോട് നിയമസഭാ മണ്ഡലത്തില്‍ ഇടതുപക്ഷ സ്ഥാനാര്‍ത്ഥിയായി എം.വി നികേഷ് കുമാര്‍ മത്സരിക്കുന്നത്. അന്ന് യു.ഡി.എഫ് സ്ഥാനാര്‍ത്ഥി കെ.എം ഷാജിയോട് 2462 വോട്ടുകള്‍ക്ക് പരാജയപ്പെട്ടിരുന്നത്. അതിനു ശേഷം മാധ്യമ പ്രവര്‍ത്തനത്തിലേക്ക് മടങ്ങിയ നികേഷ് കുമാര്‍ വീണ്ടും രാഷ്ട്രീയത്തിലേക്ക് ഇറങ്ങാന്‍, കഴിഞ്ഞ ദിവസമാണ് റിപ്പോര്‍ട്ടര്‍ ചാനലിനോട് വിട പറഞ്ഞത്.
28 വര്‍ഷത്തെ മാധ്യമപ്രവര്‍ത്തന ജീവിതത്തിന് ഇതോടെ പൂര്‍ണ്ണമായും നികേഷ് വിരാമമിട്ടു ഏഷ്യാനെറ്റ് ന്യൂസിലൂടെയാണ് നികേഷ് കുമാര്‍ മാധ്യമ പ്രവര്‍ത്തനം ആരംഭിക്കുന്നത്. 2003ല്‍ ഇന്ത്യാവിഷന്‍ ആരംഭിച്ചപ്പോള്‍ എക്‌സിക്യൂട്ടീവ് എഡിറ്ററായി ചുമതലയേറ്റു. 2011ല്‍ റിപ്പോര്‍ട്ടര്‍ ടിവിക്ക് തുടക്കം കുറിച്ചു. രാംനാഥ് ഗോയങ്ക അവാര്‍ഡുള്‍പ്പെടെ നിരവധി പുരസ്‌കാരങ്ങള്‍ അദ്ദേഹത്തിന് ലഭിച്ചിട്ടുണ്ട്. കമ്യൂണിസ്റ്റ് നേതാവും മുന്‍ മന്ത്രിയുമായിരുന്ന എം.വി രാഘവന്റെയും സി.വി ജാനകിയുടെയും മകനായി 1973 മെയ് 28 നാണ് എം.വി നികേഷ് കുമാറിന്റെ ജനനം.
അതേസമയം, തദ്ദേശ തിരഞ്ഞെടുപ്പിലും വരുന്ന നിയമസഭാ തിരഞ്ഞെടുപ്പിലും ബി.ജെ.പിയെ എന്തു വിലകൊടുത്തും തളയ്ക്കുക എന്നതിനാണ് സി.പി.എം പ്രാധാന്യം നല്‍കുന്നത്. അതിനായി പുതിയ പദ്ധതികളും പരിപാടികളും ഉണ്ടാകും. സ്ഥാനാര്‍ത്ഥി നിര്‍ണ്ണയത്തില്‍ പരമ്പരാഗത രീതി മാറ്റി ജനപ്രിയരായവര്‍ക്ക് മാത്രം മുന്‍ഗണന നല്‍കാനും സി.പി.എം ശ്രമിക്കുമെന്നാണ് സൂചന. ഉപതെരഞ്ഞെടുപ്പു മുതല്‍ ഇത് പീരക്ഷിക്കും.
