അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അമരാവതി: ആന്ധ്രാപ്രദേശ് മുൻ മുഖ്യമന്ത്രിയും വൈഎസ് ആർ കോൺഗ്രസ് നേതാവുമായ ജഗൻ മോഹൻ റെഡ്ഡിക്കെതിരെ ആരോപണവുമായി ടിഡിപി. ജഗൻ തന്റെ ഭരണകാലയളവിൽ മുട്ട പഫ്സിനായി മാത്രം 3.62 കോടി രൂപ ചെലവഴിച്ചുവെന്നാണ് ടിഡിപിയുടെ ആരോപണം. എന്നാല് സ്നാക്സിന്റെ ബില്ലിനെ മുട്ട പഫ്സാക്കി അപമാനിക്കാനുള്ള ശ്രമമാണെന്നാണ് ജഗന്റെ പാര്ട്ടിയുടെ വിശദീകരണം
2019 മെയ് 30 മുതൽ 2024 ജൂൺ 11 വരെ ജഗൻ ഭരണത്തിലിരുന്ന അഞ്ച് വർഷക്കാലം മുട്ട പഫ്സിനായി 3.62 കോടി ചെലവഴിച്ചെന്നാണ് ടിഡിപിയുടെ ആരോപണം. റിപ്പോർട്ട് അനുസരിച്ച് ജഗന്റെ ലഘുഭക്ഷണത്തിനായുള്ള വാർഷിക ശരാശരി ചെലവ് 72 ലക്ഷം രൂപയാണ്. ഇത് പ്രതിദിനം 993 മുട്ട പഫ്സിന്റെ ഉപയോഗത്തിന് തുല്യമാണ്. അങ്ങിനെയെങ്കിൽ അഞ്ച് വർഷത്തിനിടെ 18 ലക്ഷം മുട്ട പഫ്സുകൾ എന്ന നിലയിലായിരിക്കും കണക്കുകളെന്നാണ് ടിഡിപിയുടെ ആരോപണം.
ലഘുഭക്ഷണത്തിനായി ചിലവഴിച്ച തുക പെരുപ്പിച്ച് കാണിച്ച് ജഗൻ മോഹൻ റെഡ്ഡിയെ അപമാനിക്കാനുള്ള ശ്രമങ്ങളാണ് നടത്തുന്നതെന്നും ആരോപണം വ്യാജമാണെന്നും വൈഎസ്ആർ കോൺഗ്രസ് പ്രതികരിച്ചു. ആരോപണം തെളിയിക്കാനും പാർട്ടി വെല്ലുവിളിച്ചു. 2014 -19 കാലയളവിൽ ചന്ദ്രബാബു നായിഡുവിനും മകൻ ലോകേഷിനുമുള്ള ലഘുഭക്ഷണത്തിനായി സർക്കാർ 8.6 കോടി രൂപ ചിലവഴിച്ചെന്നും വൈഎസ്ആർ കോൺഗ്രസ് ആരോപിച്ചു.
