അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.വേറിട്ട പല കഥാപാത്രങ്ങളുമായി മലയാളികളുടെ മനസ്സില്‍ ഇടം പിടിച്ചിട്ടുള്ള നടനാണ് നന്ദലാല്‍ കൃഷ്ണമൂര്‍ത്തി. ഇപ്പോളിതാ മോഹൻലാലുമൊത്തുളള അഭിനയ അനുഭവങ്ങളെക്കുറിച്ച് സംസാരിക്കുകയാണ് നടന്‍. ലാലേട്ടനൊപ്പം രണ്ട് മിനിറ്റില്‍ കൂടുതല്‍ നില്‍ക്കാന്‍ കഴിയില്ലെന്നും ഒരുപാട് തമാശകള്‍ പറയുന്ന ആളാണെന്നും നന്ദലാല്‍ പറയുന്നു. കളിപ്പാട്ടം എന്ന ചിത്രത്തില്‍ ഒരുമിച്ചഭിനയിച്ച അനുഭവം പങ്കുവെയ്ക്കുകയാണ് നന്ദലാല്‍.
‘ലാലേട്ടനുമൊത്ത് എനിക്ക് ഒരുപാട് എക്‌സ്പീരിയന്‍സ് ഉണ്ട്. ഞങ്ങള്‍ ഒരുമിച്ച് യാത്ര ചെയ്തിട്ടുണ്ട്. ലാലേട്ടന്റെ കൂടെ കുറെ സിനിമകള്‍ ചെയ്തിട്ടുണ്ട്. 40 സിനിമകളോളം ഒരുമിച്ച് ചെയ്തിട്ടുണ്ട്, ചെറുതും വലുതും ആയിട്ട്. ധാരാളം വിദേശയാത്രകളും ചെയ്തിട്ടുണ്ട്. ഒരിക്കല്‍ ലാലേട്ടനൊപ്പം കളിപ്പാട്ടം എന്ന സിനിമയില്‍ അഭിനയിക്കുകയായിരുന്നു. ഞാന്‍ ആ സിനിമയില്‍ അസിസ്റ്റന്റ് ഡയറക്ടര്‍ ആയിട്ടും ജോലി ചെയ്യുന്നുണ്ട്. കളിപ്പാട്ടത്തില്‍ വേണു ചേട്ടന്റെ അസിസ്റ്റന്റ് ഡയറക്ടറാണ് ഞാന്‍. കളിപ്പാട്ടത്തിന്റെ ഷൂട്ടിംഗ് നടക്കുന്ന സമയത്ത് ഉര്‍വശിയും ലാലേട്ടനും കൂടി ഒരു പാട്ട് സീന്‍ എടുത്തുകൊണ്ടിരിക്കുകയാണ്.’
‘ഊട്ടിയില്‍ നിന്നും 40 കിലോമീറ്റര്‍ ദൂരെയായിരുന്നു ആ സിനിമയുടെ ഷൂട്ടിംഗ്. രണ്ടുമൂന്ന് ഡ്രസ് ചെയ്ഞ്ച് കഴിഞ്ഞു ലാലേട്ടനും ഉര്‍വശിയും ഒരു സ്ഥലത്ത് നില്‍ക്കുകയാണ്. അവിടെനിന്ന് ക്യാമറ വളരെ ദൂരെയാണ്. വൈഡ് ഫ്രെയിമിലാണ് എടുത്തുകൊണ്ടിരിക്കുന്നത്. അപ്പോള്‍ ഞാന്‍ ഇവരുടെ കൂടെ തന്നെ കാണും എപ്പോഴും. ആ സമയത്ത് ക്ലാപ്പ് ഒന്നും വേണ്ടായിരുന്നു. ഞാന്‍ അവിടെ ഏതെങ്കിലും ചെടിയുടെ പുറകില്‍ മറഞ്ഞിരിക്കും, ഷോട്ട് കഴിയുമ്പോള്‍ പിന്നെയും നമ്മള്‍ മൂന്നുപേരും കൂടെ നില്‍ക്കും. ലാലേട്ടന്റെ കൂടെ രണ്ടു മിനിറ്റില്‍ കൂടുതല്‍ നില്‍ക്കാന്‍ കഴിയില്ല. ഇങ്ങനെ തമാശ പറഞ്ഞു കൊണ്ടേയിരിക്കും. അപ്പോള്‍ ഉര്‍വശിയാണെങ്കില്‍ ചിരിച്ചു കൊണ്ടേയിരിക്കും.’
‘അങ്ങനെ ബ്രേക്ക് വന്നപ്പോള്‍ ഉര്‍വശി വീണ്ടും ഡ്രസ്സ് മാറാന്‍ പോയി അപ്പോള്‍ ഡയറക്ടര്‍ ലാലേട്ടനോട് ചോദിച്ചു ഒരു ഡ്രസ്സ് ചേഞ്ച് നടത്തിയാലോ എന്ന്. പക്ഷേ അദ്ദേഹത്തിന് മാറാന്‍ ഡ്രസ്സ് ഒന്നും ഉണ്ടായിരുന്നില്ല അവിടെ. അപ്പോള്‍ ഞാന്‍ അവിടെ ഒരു പച്ച ടീഷര്‍ട്ട് ഇട്ടു നില്‍ക്കുന്നത് ലാലേട്ടന്‍ കണ്ടു. എന്നോട് പറഞ്ഞു അത് ഊരി തരാന്‍, ഞാന്‍ പറഞ്ഞു ഇല്ല ഞാന്‍ വിയര്‍ത്തു എന്ന്. അപ്പോള്‍ എന്നോട് പറഞ്ഞു അതൊന്നും കുഴപ്പമില്ല എന്ന്. അങ്ങനെ ഞാന്‍ ഇട്ടിരുന്ന ടീഷര്‍ട്ട് അദ്ദേഹത്തിന് കൊടുത്തു. അദ്ദേഹം വിട്ടിരുന്ന ഷര്‍ട്ട് എനിക്കും തന്നു. സാധാരണഗതിയില്‍ മറ്റുള്ളവര്‍ ഇങ്ങനെ ചെയ്യുമോ എന്ന് എനിക്കറിയില്ല. അപ്പോള്‍ അങ്ങനെ ഒരു സ്‌നേഹബന്ധമുണ്ട്.’, നന്ദലാല്‍ പറഞ്ഞു.
STORY HIGHLIGHTS: Nandalal Krishnamurthy about Mohanlal
