2021 ലായിരുന്നു നടൻ ബാല തൃശൂർ സ്വദേശിയും ഡോക്ടറുമായ എലിസബത്തിനെ വിവാഹം കഴിക്കുന്നത്. എലിസബത്താണ് തന്നോട് ഇഷ്ടം പങ്കുവെച്ചതെന്നും ഒടുവിൽ വിവാഹം കഴിക്കാൻ തീരുമാനിക്കുകയായിരുന്നുവെന്നും ബാല പറഞ്ഞിരുന്നു. കഴിഞ്ഞ വർഷം നടനെ കരൾമാറ്റ ശസ്ത്രക്രിയക്ക് വിധേയനാക്കിയപ്പോഴും ബാലയെ പരിചരിച്ചത് എലിസബത്തും കുടുംബവുമായിരുന്നു. എന്നാൽ ബാല ചികിത്സ പൂർത്തിയാക്കിയതിന് പിന്നാലെ ബാലയ്ക്കൊപ്പം എലിസബത്തിനെ പ്രേക്ഷകർ കണ്ടില്ല.
പലപ്പോഴായി രണ്ടുപേരുടേയും സോഷ്യൽ മീഡിയ പേജുകളിൽ ആരാധകർ ഇതിനെ കുറിച്ച് ചോദിച്ചെങ്കിലും രണ്ട് പേരും മൗനം തുടർന്നു. അതിനിടയിലാണ് ഒരു ചാനൽ അഭിമുഖത്തിനിടെ ഇനി എലിസബത്ത് തന്റെ ഒപ്പം ഇല്ലെന്ന് ബാല വെളിപ്പെടുത്തിയത്. പക്ഷെ എന്തിന് വേണ്ടി പിരിഞ്ഞുവെന്നതിന്റെ കാരണം നടൻ വ്യക്തമാക്കിയില്ല. ബാല ഇക്കാര്യം തുറന്നപറഞ്ഞെങ്കിലും എലിസബത്ത് ഇതിനോടൊക്കെ മൗനം തുടർന്നു.
ഇടയ്ക്കിടെ തന്റെ യുട്യൂബ് ചാനലിൽ പ്രത്യക്ഷപ്പെട്ട് മാതാപിതാക്കളുടേയും സ്വന്തം വീട്ടിലേയും വിശേഷങ്ങൾ പങ്കുവെയ്ക്കുന്ന എലിസബത്തിനെയാണ് പിന്നീട് പ്രേക്ഷകർ കണ്ടത്. ബാലയുമായി വിവാഹം ചെയ്തതോടെ അവസാനിപ്പിച്ച തന്റെ കരിയർ എലിസബത്ത് വീണ്ടും പൊടിതട്ടിയെടുത്തു. ജോലിക്ക് പോകാൻ തുടങ്ങിയാതും എലിസബത്ത് പറഞ്ഞു. എന്നാൽ എവിടെയാണ് താൻ ജോലി ചെയ്യുന്നതെന്ന് മാത്രം എലിസബത്ത് പറഞ്ഞില്ല.
അടുത്തിടെ ബാല നാലാമതും വിവാഹിതനായതിന് പിന്നാലെയാണ് തന്റെ ആശുപത്രിയെ കുറിച്ചും ജോലി ചെയ്യുന്ന സ്ഥലത്തെ കുറിച്ചുമെല്ലാം എലിസബത്ത് വെളിപ്പെടുത്തിയത്. ഗുജറാത്തിലാണ് താരം ഇപ്പോൾ. ഡോക്ടർ എന്ന നിലയിലുള്ള തന്റെ പ്രവർത്തനത്തെ കുറിച്ചും ആളുകൾ തന്നോട് കാണിക്കുന്ന സ്നേഹത്തെ കുറിച്ചുമെല്ലാം എലിസബത്ത് പറഞ്ഞിരുന്നു.
ഇപ്പോഴിതാ ഗുജറാത്തിൽ നിന്നുള്ള മറ്റൊരു സന്തോഷം പങ്കിടുകയാണ് എലിസബത്ത്. ജോലി ചെയ്യുന്ന ആശുപത്രിക്ക് സമീപത്ത് തന്നെ താൻ ഒരു കുഞ്ഞ് ഫ്ലാറ്റെടുത്തു എന്നാണ് എലിസബത്ത് വീഡിയോയിൽ പറയുന്നത്. വലിയ വാടകയുള്ളതല്ല, ഫർണിഷ്ഡ് ആണ്, അടുക്കളയും സൗകര്യങ്ങളുമൊക്കെ ഉണ്ട്, അമ്മ തനിക്കൊപ്പം ഈ ഫ്ലാറ്റിൽ വന്ന് നിൽക്കുമെന്നും എലിസബത്ത് പറയുന്നു. അമ്മ ഇല്ലാത്ത സമയങ്ങളിൽ താൻ ആശുപത്രിയുടെ ഹോസ്റ്റലിൽ കഴിയുമെന്നും എലിസബത്ത് വ്യക്തമാക്കി.
പുതിയ സന്തോഷം പങ്കുവെച്ചതോടെ എലിസബത്തിനെ അഭിനന്ദിച്ച് നിരവധി പേരാണ് കമന്റ് ചെയ്തത്. ചില കമന്റുകൾ ഇങ്ങനെ-‘തളരരുത് എല്ലാത്തിനെയും അതിജീവിച്ച് മുന്നോട്ടു പോവുക ദൈവം അനുഗ്രഹിക്കട്ടെ ജീവിതം മനോഹരമാണ് സമാധാനവും സന്തോഷവും നമ്മളെ സ്നേഹിക്കുന്നവർക്ക് കൊടുക്കുക എന്നും ജീവിതത്തിൽ സമാധാനം ഉണ്ടാകട്ടെ’, ‘നമ്മളെ കുറ്റം പറയാൻ ഒരുപാട് ആളുകൾ ഉണ്ടാകും, അവർക്കും മുമ്പിൽ ജീവിച്ചു കാണിക്കുക. വിജയത്തിലേക്കുള്ള യാത്ര ദൈവം നമ്മൾക്ക് തരട്ടെ. തീർച്ചയായും അനുഗ്രഹവും ഉണ്ടാകും തളരാതെ മുന്നോട്ടു പോകൂ’, ‘നമ്മുടെ കുറ്റം പറയാൻ ഒരുപാട് ആളുകൾ ഉണ്ടാകും അവർക്കു മുന്നിൽ ജീവിച്ചു കാണിക്കുക വിജയത്തിലേക്കുള്ള യാത്ര ദൈവം നമ്മൾക്ക് തരും തീർച്ചയായും എല്ലാവിധ ആശംസകളും’, ഇങ്ങനെ പോകുന്നു കമന്റുകൾ.
content highlight: balas-ex-wife-elizabath