അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.29-ാമത് കേരള രാജ്യാന്തര ചലച്ചിത്രമേളയുടെ അന്താരാഷ്ട്ര ജൂറി അംഗങ്ങളെ പ്രഖ്യാപിച്ചു. മാര്‍ക്കോസ് ലോയ്‌സ, നാനാ ജോര്‍ജഡ്‌സെ, മിഖായേല്‍ ഡോവ്‌ലാത്യന്‍, മൊഞ്ചുള്‍ ബറുവ എന്നിവരടങ്ങിയ ജൂറിയുടെ ചെയര്‍പേഴ്‌സണ്‍ ഫ്രഞ്ച് ഛായാഗ്രാഹക ആഗ്‌നസ് ഗൊദാര്‍ദാണ്. അന്താരാഷ്ട്ര മത്സര വിഭാഗത്തില്‍ സെലക്ഷന്‍ കമ്മിറ്റി തിരഞ്ഞെടുത്ത 14 ചിത്രങ്ങളും ജൂറി കണ്ടു വിലയിരുത്തും. സിനിമാപ്രേമികള്‍ക്ക് ജൂറി അംഗങ്ങളെ പരിചയപ്പെടുത്തുക എന്ന ലക്ഷ്യത്തോടെ ഇവരുടെ സിനിമകള്‍ മേളയില്‍ പ്രദര്‍ശിപ്പിക്കും.
ടെക്‌സ്ച്വല്‍ ഫോട്ടോഗ്രഫിയുടെയും ക്ലോസപ്പ് ഷോട്ടുകളുടെയും കരുത്തില്‍ തന്റെ സിനിമയിലെ കഥാപാത്രങ്ങളെ വ്യത്യസ്തമായി അവതരിപ്പിച്ച ഫ്രഞ്ച് ഛായാഗ്രാഹകയും ഫോട്ടോഗ്രാഫറുമാണ് ആഗ്‌നസ് ഗൊദാര്‍ദ്.1951 മെയ് 28ന് ഫ്രാന്‍സില്‍ ജനിച്ച ആഗ്‌നസ് ഗൊദാര്‍ദിന് 2001 ല്‍ മികച്ച ഛായാഗ്രാഹകയ്ക്കുള്ള സീസര്‍ അവാര്‍ഡ് ലഭിച്ചു. ലാ ഫെമി ഫിലിം സ്‌കൂളില്‍ നിന്ന് പഠനം പൂര്‍ത്തിയാക്കിയ ആഗ്‌നസ് വിം വെന്‍ഡേഴ്‌സ് ചിത്രങ്ങളില്‍ ക്യാമറ സാങ്കേതിക സഹായിയായി പ്രവര്‍ത്തിച്ചു കൊണ്ടാണ് സിനിമാലോകത്തേക്ക് കടന്നുവരുന്നത്. ബ്യു ട്രവയല്‍ (1999),ഹോം (2008) വിങ്സ് ഓഫ് ഡിസൈര്‍ (1987 ) തുടങ്ങിയവ ആഗ്‌നസ് ഛായാഗ്രഹണം നിര്‍വഹിച്ച പ്രധാന ചിത്രങ്ങളാണ്.
പാര്‍ശ്വവല്‍ക്കരിക്കപ്പെട്ട മനുഷ്യജീവിതങ്ങള്‍ അഭിമുഖീകരിക്കുന്ന വെല്ലുവിളികളെക്കുറിച്ച് വേറിട്ട കാഴ്ചപ്പാടുകള്‍ നല്‍കുന്ന പ്രമുഖ ബൊളീവിയന്‍ സംവിധായകനാണ് മാര്‍ക്കോസ് ലോയ്‌സ. ദാരിദ്ര്യം, അസമത്വം,തനത് സംസ്‌കാരം എന്നീ പ്രമേയങ്ങള്‍ അദ്ദേഹത്തിന്റെ സിനിമയിലെ പ്രത്യേകതകളാണ്. ലോകമെമ്പാടുമുള്ള ചലച്ചിത്ര മേളകളില്‍ ശ്രദ്ധേയമായ ലോയ്‌സിന്റെ ചിത്രങ്ങളാണ് എ മാറ്റര്‍ ഓഫ് ഫെയ്ത്ത്(1995), ദി ഹാര്‍ട്ട് ഓഫ് ജീസസ്(2003) ദി സ്ലീപിംഗ് ബ്യൂട്ടീസ് (2012). പ്രശസ്ത ജോര്‍ജിയന്‍ സംവിധായികയും തിരക്കഥാകൃത്തുമായ നാനാ ജോര്‍ജഡ്‌സെ, നിലവില്‍ യൂറോപ്യന്‍ ഫിലിം അക്കാദമി, അമേരിക്കന്‍ ഫിലിം അക്കാദമി, ജോര്‍ജിയന്‍ ഫിലിം അക്കാദമി തുടങ്ങിയവയില്‍ അംഗമാണ്.1993-96 കാലഘട്ടത്തില്‍ കാന്‍ ഫിലിം ഫെസ്റ്റിവലിന്റെ സിനിമ ആന്‍ഡ് ലിബര്‍ട്ടി അസോസിയേഷന്‍ പ്രസിഡന്റായിരുന്ന ജോര്‍ജഡ്‌സെ, ക്യാമറ ഡി ഓര്‍ ജേതാവ് കൂടിയാണ് .1996ല്‍ പുറത്തിറങ്ങിയ ‘എ ഷെഫ് ഇന്‍ ലവാണ്’ മേളയില്‍ പ്രദര്‍ശിപ്പിക്കുന്ന ജോര്‍ജഡ്‌സെയുടെ ചിത്രം.
ആസാമീസ് സംവിധായകനായ മൊഞ്ചുള്‍ ബറുവയാണ് ഇന്റര്‍നാഷണല്‍ ജൂറിയിലെ ഇന്ത്യന്‍ പ്രാതിനിധ്യം. അദ്ദേഹത്തിന്റെ ആദ്യ ചിത്രമായ അന്തരീന്‍ പ്രഗ് സൈന്‍ പുരസ്‌കാരവും ഇന്ത്യന്‍ സൈന്‍ ചലച്ചിത്ര മേളയില്‍ അവാര്‍ഡും കരസ്ഥമാക്കി. ഈ ചിത്രം മികച്ച പുതുമുഖ സംവിധായകനുള്ള അസം സംസ്ഥാന ചലച്ചിത്ര അവാര്‍ഡിന് മൊഞ്ചുളിനെ അര്‍ഹമാക്കി. അര്‍മേനിയന്‍ സിനിമാ സംവിധായകനും നടനും തിരക്കഥാകൃത്തുമായ മിഖായേല്‍ ഡോവ്‌ലാത്യന്‍, നാല് പതിറ്റാണ്ടുകളായി അര്‍മേനിയന്‍ സിനിമയിലെ സജീവ സാന്നിധ്യമാണ്.ലാ വല്ലേ ഡേ ല ലൂണ്‍(1994) ഡെമോക്കോവ് ഡെപ്പി പറ്റെ(1990) ഔര്‍ യാര്‍ഡ്(1996), ലാബറിന്ത് (1996) തുടങ്ങിയവയാണ് അദ്ദേഹത്തിന്റെ പ്രധാന ചിത്രങ്ങള്‍. അന്താരാഷ്ട്ര തലത്തില്‍ പ്രശസ്തരായ ജൂറി അംഗങ്ങളുടെ സാന്നിധ്യവും അവരുടെ സിനിമകളുടെ പ്രദര്‍ശനവും 29-ാമത് രാജ്യാന്തര ചലച്ചിത്ര മേളയെ വ്യത്യസ്ത അനുഭവമാക്കും.
