അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വിഴിഞ്ഞം തുറമുഖത്തിന്റെ രണ്ടും മൂന്നും ഘട്ട വികസനം 2028ല്‍ പൂര്‍ത്തിയാകുമെന്നും പാസഞ്ചര്‍ കാര്‍ഗോ ഷിപ്പ്മെന്റ് സൗകര്യങ്ങള്‍ കൂടി വരുന്നതോടെ വിഴിഞ്ഞം ഇന്റഗ്രേറ്റഡ് ലോജിസ്റ്റിക് ഹബ്ബ് കേരളത്തിന്റെ വികസനത്തിന്റെയും പുരോഗതിയുടെയും പ്രവേശന കവാടമായി തീരുമെന്നും മന്ത്രി വി.എന്‍. വാസവന്‍ പറഞ്ഞു. തിരുവനന്തപുരത്ത് നടന്ന ദ്വിദിന വിഴിഞ്ഞം അന്താരാഷ്ട്ര കോണ്‍ക്ളേവിന്റെ സമാപന സമ്മേളനം ഉദ്ഘാടനം ചെയ്യുകയായിരുന്നു മന്ത്രി.
വല്ലാര്‍പാടം കണ്ടെയ്നര്‍ ടെര്‍മിനലും വിഴിഞ്ഞം തുറമുഖവും മറ്റ് 17 ഓളം ചെറിയ തുറമുഖങ്ങളും ചേരുന്നതോടെ കേരളം സൗത്ത് ഏഷ്യയിലെ തുറമുഖങ്ങളുടെ നായകനായി മാറും. ആഗോള വിതരണശൃംഖലയില്‍ വല്ലാര്‍പാടവും വിഴിഞ്ഞവും കേരളത്തിന് ഇരട്ടിക്കരുത്തേകും.വിഴിഞ്ഞം തുറമുഖ പദ്ധതിയുടെ രണ്ടും മൂന്നും ഘട്ടം പൂര്‍ത്തിയാകുന്നതോടെ കേരളം സുസ്ഥിര പരിസ്ഥിതി സൗഹാര്‍ദ്ദ വികസനത്തിന് ലോക മാതൃകയായി മാറും. വിഴിഞ്ഞത്തേക്കുള്ള ചരക്ക് നീക്കത്തിന്റെ കണക്ടവിറ്റിയില്‍ വ്യാവസായികള്‍ക്കുള്ള ആശങ്കകള്‍ പരിഹരിക്കാന്‍ വിഴിഞ്ഞത്തേക്ക് റെയില്‍ – റോഡ് കണക്ടവിറ്റി ഉറപ്പാക്കാന്‍ സര്‍ക്കാര്‍ പ്രതിജ്ഞാബദ്ധമാണ്. ബാലരാമപുരത്ത് നിന്നും വിഴിഞ്ഞം തുറമുഖത്തേക്കുള്ള 10 കിലോ മീറ്റര്‍ പോര്‍ട്ട് റെയില്‍ ടണല്‍ ടെര്‍മിനല്‍ നാലുവര്‍ഷത്തിനകം യാഥാര്‍ത്ഥ്യമാകുമെന്ന് മന്ത്രി പ്രഖ്യാപിച്ചു. ഇത് ലോഡിംഗ് ആന്‍ഡ് അണ്‍ലോഡിംഗ് അടക്കമുള്ള ചരക്കുനീക്കം സുഗമമാക്കും. കൂടാതെ വിഴിഞ്ഞം തുറമുഖത്ത് നിന്നും ദേശീയ പാത 66ലേക്കുള്ള കണക്ടിവിറ്റി രണ്ടുവര്‍ഷത്തിനുള്ളില്‍ പൂര്‍ത്തിയാക്കും. ഇത് സംബന്ധിച്ച് ദേശീയപാതാ അതോറിറ്റിയുമായി സംസാരിച്ച് ധാരണയിലെത്തിയിട്ടുണ്ട്. അതുവരെ എന്‍.എച്ച് -66ലേക്ക് താത്കാലിക ഗതാഗതത്തിനുള്ള സൗകര്യങ്ങള്‍ ഏര്‍പ്പെടുത്തുന്നതിന് തീരുമാനമായതായും ഇത് സുഗമമായ ചരക്ക് നീക്കത്തിന് സഹായകരമാണെന്നും മന്ത്രി പറഞ്ഞു.
വിഴിഞ്ഞം തുറമുഖം വരും തലമുറയ്ക്ക് അഭിവൃദ്ധിയേകുന്ന ആഗോള സമുദ്ര ശക്തികേന്ദ്രമാകുമെന്നും കേരളത്തിന്റെ ഭാവിയില്‍ വിശ്വസിച്ച് ഇവിടെ നിക്ഷേപം നടത്തുന്ന വ്യവസായികള്‍ക്ക് യാതൊരു തൊഴില്‍ പ്രതിസന്ധികളും നേരിടേണ്ടിവരില്ലെന്നും മന്ത്രി വി. ശിവന്‍കുട്ടി പറഞ്ഞു. വിഴിഞ്ഞം അന്താരാഷ്ട്ര കോണ്‍ക്ളേവിന്റെ സമാപന സമ്മേളനത്തില്‍ അധ്യക്ഷത വഹിക്കുകയായിരുന്നു മന്ത്രി. ഈ വിഴിഞ്ഞം കോണ്‍ക്ലേവ് സമാപിക്കുമ്പോള്‍ കേരളത്തിന്റെ വ്യാവസായിക, സാമ്പത്തിക ഭൂപ്രകൃതിയെ പുനര്‍നിര്‍വചിക്കുന്ന ഒരു പരിവര്‍ത്തന യാത്രയുടെ പടിവാതില്‍ക്കലാണ് നാം നില്‍ക്കുന്നത്. 300-ലധികം പ്രതിനിധികളും 50-ലധികം നിക്ഷേപകരും പങ്കെടുത്ത ഈ കോണ്‍ക്ലേവ് അര്‍ത്ഥവത്തായ ചര്‍ച്ചകള്‍ക്ക് വഴിയൊരുക്കി. വലിയ തോതിലുള്ള നിക്ഷേപങ്ങള്‍, തൊഴിലവസരങ്ങള്‍ സൃഷ്ടിക്കല്‍, വ്യാവസായിക വികസനം എന്നിവയിലേക്കുള്ള വാതിലുകള്‍ തുറക്കുന്ന സാമ്പത്തിക വളര്‍ച്ചയുടെ ഒരു പുതിയ യുഗത്തിന്റെ തുടക്കം കുറിക്കുന്നതാണ് ഈ കോണ്‍ക്ളേവില്‍ നടന്ന ചര്‍ച്ചകള്‍. വിഴിഞ്ഞത്തിന്റെ സാധ്യതകളില്‍ ലോകത്തിനുളള ആത്മവിശ്വാസം ആഗോളതലത്തില്‍ അറിയപ്പെടുന്ന കമ്പനികളുടെ സാന്നിധ്യം അടിവരയിടുന്നു. ഈ തുറമുഖത്തിന്റെയും അനുബന്ധ വ്യവസായങ്ങളുടെയും വിജയം നേരിട്ടുള്ള തൊഴിലവസരങ്ങള്‍ക്ക് പുറമെ കേരളത്തിലെ പ്രാദേശിക സമൂഹങ്ങള്‍ക്ക് എണ്ണമറ്റ അവസരങ്ങളും സൃഷ്ടിക്കും. വിഴിഞ്ഞത്തെ സമഗ്രവും സുസ്ഥിരവുമായ വികസനത്തിന്റെ ഒരു മാതൃകയാക്കാനും ഈ പുരോഗതിയുടെ നേട്ടങ്ങള്‍ സമൂഹത്തിലെ എല്ലാ വിഭാഗങ്ങളിലും എത്തിച്ചേരുന്നുവെന്ന് ഉറപ്പാക്കാനും സര്‍ക്കാര്‍ പ്രതിജ്ഞാബദ്ധമാണെന്ന് അദ്ദേഹം പറഞ്ഞു. വ്യവസായ വകുപ്പ് പ്രിന്‍സിപ്പല്‍ സെക്രട്ടറി എപിഎം മുഹമ്മദ് ഹനീഷ്, ട്രിവാന്‍ഡ്രം ചേംബര്‍ ഓഫ് കൊമേഴ്‌സ് പ്രസിഡന്റ് എസ്.എന്‍. രഘുചന്ദ്രന്‍ നായര്‍, വിസില്‍ എം.ഡി ദിവ്യ എസ്. അയ്യര്‍ തുടങ്ങിയവര്‍ സംസാരിച്ചു.
