സംഗീത സംവിധായകന്‍ ഗോപി സുന്ദറിന്റെ അമ്മയുടെ വേർപാടിൽ വൈകാരിക കുറിപ്പുമായി അദ്ദേഹം എത്തിയിരുന്നു. സോഷ്യല്‍ മീഡിയ പേജിലൂടെ പങ്കുവെച്ച് കുറുപ്പിലാണ് അമ്മ ലിവി സുരേഷ് മരണപ്പെട്ട വിവരം ഗോപി വെളിപ്പെടുത്തിയത്. പിന്നാലെയിതാ ഗോപി സുന്ദരിന്‍റെ മുന്‍ പങ്കാളികളും അദ്ദേഹത്തിന്റെ അമ്മയെക്കുറിച്ചുള്ള ഓര്‍മകളും ചിത്രങ്ങളും സമൂഹമാധ്യമത്തില്‍ പങ്കുവച്ചിരിക്കുകയാണ്.
ഗോപി സുന്ദറിനും അദ്ദേഹത്തിന്റെ മാതാപിതാക്കള്‍ക്കും ഒപ്പം നില്‍ക്കുന്ന ചിത്രമായിരുന്നു സോഷ്യല്‍ മീഡിയ പേജിലൂടെ അഭയ ഹിരണ്‍മയി പങ്കുവെച്ചത്. ‘ നിങ്ങളുടെ സംഗീതത്തിന്റെ നാള്‍വഴികള്‍ എനിക്കറിയാം. അമ്മയിലൂടെ കേട്ട റേഡിയോയിലെ തമിഴ് പാട്ടുകളിലൂടെ തുടങ്ങിയ യാത്രയാണത്.
ഇനിയുള്ള കാലവും നിങ്ങളുടെ വഴികാട്ടിയായി അമ്മ ഒപ്പമുണ്ടാവും. ഈ വേദന മറികടക്കാനുള്ള ശക്തി പ്രപഞ്ചം നല്‍കും. അമ്മയിലൂടെ തന്നെ ഏട്ടന്റെ മുറിവ് സുഖപ്പെടും,’ എന്നാണ് അഭയ ഹിരണ്‍മയി പങ്കുവെച്ച കുറുപ്പിലൂടെ പറയുന്നത്. തന്റെ വേദന പങ്കുവെച്ച് ഗോപി സുന്ദറിന്റെ അമ്മയ്‌ക്കൊപ്പം നില്‍ക്കുന്ന ചിത്രവും ആയിട്ടാണ് ഗായിക അമൃത സുരേഷും എത്തിയത്.
ഇരുവരുടെയും പോസ്റ്റുകള്‍ ശ്രദ്ധിക്കപ്പെട്ടതോടെ നിരവധി കമന്റുകളാണ് ഇതിന് താഴെ വരുന്നത്. താരമാതാവിന് ആദരാഞ്ജലികള്‍ അര്‍പ്പിക്കുന്നതിനൊപ്പം ചിലര്‍ ഇതിനു താഴെയും വിമര്‍ശനങ്ങളുമായി വന്നു. അഭയയും അമൃതയും മുന്‍ പങ്കാളികളായിരുന്നതിനാല്‍ ഇതിനെ പറ്റിയാണ് ചിലര്‍ അഭിപ്രായപ്പെടുന്നത്.
മുന്‍പ് എങ്ങനെയായിരുന്നു എന്നതിലല്ല ഇപ്പോള്‍ എന്താണെന്നാണ് നോക്കേണ്ടത്, മരണത്തില്‍ ശത്രുതയില്ല. ഒരുകാലത്ത് അമ്മയെപ്പോലെ നോക്കിയ സ്ത്രീയുടെ മരണത്തില്‍ അനുശോചനം രേഖപ്പെടുത്തിയതില്‍ യാതൊരു തെറ്റും കാണാനില്ല. അങ്ങനെയുള്ളപ്പോള്‍ ഇവരെ വിമര്‍ശിക്കാന്‍ മറ്റുള്ളവര്‍ക്ക് എന്ത് യോഗ്യത എന്നാണ് ചോദ്യം.
ആദ്യ ഭാര്യയുമായി വേര്‍പിരിഞ്ഞ അതിനുശേഷം ആണ് ഗോപി സുന്ദര്‍, അഭയ ഹിരണ്‍മായി ലിവിങ് റിലേഷന്‍ ആരംഭിക്കുന്നത്. 14 വര്‍ഷം ഒരുമിച്ച് ജീവിച്ച താരങ്ങള്‍ 2022ല്‍ വേര്‍പിരിയുകയായിരുന്നു. ഈ കാലയളവില്‍ അഭയ ഗായികയായി മലയാള സിനിമയില്‍ ചുവടുറപ്പിച്ചു.
അഭയയും ഗോപിയും വേര്‍പിരിഞ്ഞതിന് പിന്നാലെ അമൃത സുരേഷുമായി ഗോപി സുന്ദര്‍ പ്രണയത്തിലായി. ഇരുവരും ലിവിങ് ടുഗതറായി ജീവിക്കാന്‍ തുടങ്ങിയെങ്കിലും വളരെ പെട്ടെന്ന് തന്നെ ഈ ബന്ധം അവസാനിപ്പിച്ചു. ഇതോടുകൂടിയാണ് സമൂഹമാധ്യമങ്ങളിലൂടെ ഗോപി സുന്ദര്‍ വ്യാപകമായി വിമര്‍ശിക്കപ്പെടാന്‍ തുടങ്ങിയത്.
സുരേഷ് ബാബുവാണ് ഗോപിസുന്ദറിന്‍റെ അച്ഛന്‍. ഗോപി സുന്ദറിനെ കൂടാതെ ശ്രീ എന്നൊരു മകള്‍ കൂടി ഇവര്‍ക്കുണ്ട്. ശ്രീകുമാര്‍ പിള്ളയാണ് മരുമകന്‍.