അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മലബാറിന്റെ തനതു സൗന്ദര്യങ്ങളെ വിനോദസഞ്ചാരികളിലേക്കെത്തിക്കാന്‍ ഇത്തവണ എട്ടു ദിവസം നീണ്ടുനില്‍ക്കുന്ന ഓണാഘോഷം സംഘടിപ്പിക്കും. സംസ്ഥാന വിനോദസഞ്ചാര വകുപ്പിന്റെയും ഒനീറോ സ്ട്രാറ്റജിസ്റ്റ്‌സിന്റെയും സഹകരണത്തോടെ കേരള ആര്‍ട്‌സ് ആന്‍ഡ് ക്രാഫ്റ്റ് വില്ലേജാണ് വിപുലമായ പരിപാടികളോടെ ഓണാഘോഷം സംഘടിപ്പിക്കുക. ‘മാവേലിക്കസ്’ എന്നു പേരിട്ട പരിപാടിയുടെ പ്രഖ്യാപനവും ലോഗോ ലോഞ്ചിംഗും മന്ത്രി പി.എ. മുഹമ്മദ് റിയാസ് നിര്‍വഹിച്ചു. റാപ്പര്‍ വേടന്‍ മുഖ്യാതിഥിയായിരുന്നു.
ഓഗസ്റ്റ് 31 മുതല്‍ സെപ്റ്റംബര്‍ ഏഴു വരെയാണ് പരിപാടി. ചാലിയം, കോഴിക്കോട് ബീച്ച്, മാനാഞ്ചിറ, സര്‍ഗാലയ തുടങ്ങി എട്ടു വേദികളിലായാണ് വിവിധ പരിപാടികള്‍ സംഘടിപ്പിക്കുക. സിദ്ധ് ശ്രീറാം, മംഗാനിയാര്‍ സെഡക്ഷന്‍, ക്യൂബോ തുടങ്ങിയ രാജ്യാന്തര സംഘങ്ങളുടെ കലാപരിപാടികള്‍, പ്രമുഖ സംഗീതജ്ഞരുടെ ക്യൂറേറ്റഡ് സംഗീത പരിപാടികള്‍, ചലച്ചിത്ര താരങ്ങള്‍ നേതൃത്വം നല്‍കുന്ന നൃത്ത പരിപാടികള്‍, പാരമ്പര്യ അനുഷ്ഠാന കലാരൂപങ്ങള്‍, മ്യൂസിക്കല്‍ ഫ്യൂഷന്‍, കണ്ടംപററി നൃത്ത പരിപാടികള്‍, നാടകങ്ങള്‍ തുടങ്ങിയവയാണ് ആഘോഷത്തിന് മാറ്റേകാനുണ്ടാകുക.
ജില്ലയിലെ മുഴുവന്‍ പഞ്ചായത്തുമേഖലകളേയും പങ്കെടുപ്പിച്ചുകൊണ്ടുള്ള പൂക്കള മല്‍സരം, പ്രദര്‍ശന വിപണന മേള, മലബാര്‍ വിഭവങ്ങള്‍ക്കൊപ്പം മറ്റു നാടുകളുടെ ഭക്ഷണരീതികള്‍ പരിചയപ്പെടുത്തുന്ന ഫുഡ് ഫെസ്റ്റിവല്‍, ഏഴു ദിവസങ്ങളില്‍ ഏഴു പാചകവിദഗ്ദ്ധര്‍ ക്യൂറേറ്റ് ചെയ്യുന്ന ഓണ സദ്യ, എം.ടിയോടുള്ള ആദരസൂചകമായി രാജ്യാന്തര പുസ്തകമേള തുടങ്ങിയവയും മാവേലിക്കസിന്റെ ഭാഗമായി സംഘടിപ്പിക്കും. വിവിധ സംസ്ഥാനങ്ങളുടെ ടൂറിസം സ്റ്റാളുകള്‍, കൈത്തറി കരകൗശല ഉല്‍പന്നങ്ങളുടെ പ്രദര്‍ശനവും വിപണനവും, കലാപ്രദര്‍ശനം, ശില്‍പശാലകള്‍ എന്നിവയ്‌ക്കൊപ്പം മലബാറിലെ നിക്ഷേപസാധ്യതകള്‍ സംരംഭകര്‍ക്ക് പരിചയപ്പെടുത്തുന്ന കോണ്‍ക്ലേവും ഇതോടനുബന്ധിച്ച് സംഘടിപ്പിക്കുന്നുണ്ട്.
