സംസ്ഥാനത്ത് ട്രോളിംഗ് നിലവില്‍ വരാന്‍ പോവുകയാണ്. ഇനി മൂന്നു ദിവസം കൂടി കഴിഞ്ഞാല്‍ കടലില്‍ യന്ത്രവത്കൃത ബോട്ടുകളും വലിയ വള്ളങ്ങള്‍ളും ഇറങ്ങില്ല. അതേസമയം, ഇപ്പോഴേ വറുതിയാണ് തീരത്തുണ്ടായിരിക്കുന്നത്. കടല്‍ക്ഷോഭവും മണ്‍സൂണ്‍ മഴയും, കൊച്ചിയില്‍ കപ്പല്‍ മുങ്ഹിയതുമെല്ലാം മത്സ്യത്തൊഴിലാളികള്‍ക്ക് തിരിച്ചടിയായിട്ടുണ്ട്. പുറം കടലില്‍ മത്സ്യബന്ധനത്തിനു പോയവര്‍ക്ക് വലയില്‍ മത്സ്യങ്ങള്‍ക്കൊപ്പം വലിച്ചു കയറ്റിയതില്‍ കസുവണ്ടിയും പ്ലാസ്റ്റിക് ക്രിസ്റ്റലുകളും തടികളുമൊക്കെയാണ്.
മുങ്ങിയ കപ്പലില്‍ നിന്നുള്ള വസ്തുക്കളാണ് പുറംകടലില്‍ പൊങ്ങിക്കിടക്കുന്നത്. ഇതുമൂലം മത്സ്യബന്ധന ബോട്ടുകള്‍ക്ക് കേടുപാടുകള്‍ സംഭവിക്കുന്നുണ്ടെന്ന വ്യാപക പരാതികളും ഉയര്‍ന്നുവന്നിട്ടുണ്ട്. ഇതിനിടയിലാണ് ട്രോളിംഗ് നിരോധനം വരുന്നത്. തീര മേഖലയാകെ ഇനി ഏതവസ്ഥയിലേക്കു പോകുമെന്നതാണ് പ്രശ്‌നം. ട്രോളിംഗ് കാലത്ത് മത്സ്യത്തൊഴിലാളികള്‍ക്ക് സര്‍ക്കാര്‍ എന്തൊക്കെ സഹായങ്ങളാണ് നല്‍കാന്‍ പോകുന്നത്.
എന്നാല്‍, ട്രോളിംഗ് നിരോധനം അനിവാര്യമായ കാര്യമാണ്. മത്സ്യസമ്പത്ത് വര്‍ദ്ധിപ്പിക്കാനും അതു വഴി മത്സ്യത്തൊഴിലാളികളുടെ വരുമാനമാര്‍ഗ്ഗം ഉറപ്പുവരുത്തുകയും പോഷകമൂല്യമുള്ള മത്സ്യങ്ങളുടെ വംശവര്‍ദ്ധനവ് നടപ്പിലാക്കുവാനും ഉദ്ദേശിച്ച് കേന്ദ്രസര്‍ക്കാര്‍ ഏര്‍പ്പെടുത്തിയ നിരോധനമാണ് ട്രോളിങ് നിരോധനം. 1988 – ലാണ് സര്‍ക്കാര്‍ ഈ നിരോധനം ഇന്ത്യയില്‍ നടപ്പിലാക്കിയത്. തുടര്‍ന്ന് ഇന്ത്യയില്‍ ആദ്യം കൊല്ലം തീരത്താണ് നിരോധനം പ്രാബല്യത്തില്‍ വരുത്തിയത്. തുടര്‍ന്ന് പരമ്പരാഗത മത്സ്യത്തൊഴിലാളികളെ ട്രോളിങ്
നിരോധനത്തില്‍ നിന്നൊഴിവാക്കുന്ന കേരളാ വര്‍ഷകാല മത്സ്യബന്ധന സംരക്ഷണ നിയമം 2007ല്‍ ആണു നിലവില്‍ വന്നത്. ചാള, അയല തുടങ്ങിയ മത്സ്യങ്ങളുടെ പ്രജനനസമയമായ മണ്‍സൂണ്‍ കാലത്താണ് ഈ നിരോധനം ഏര്‍പ്പെടുത്തുക. ഈ കാലത്ത് മുട്ടയിടാറായ മത്സ്യങ്ങള്‍ തീരങ്ങളില്‍ കൂടുതലായി ഉണ്ടാകും. ഈ സമയത്ത് വന്‍തോതില്‍ മത്സ്യബന്ധനം (ട്രോളിങ്) നടത്തിയാല്‍ മുട്ടയിടാറായ മത്സ്യങ്ങള്‍ കൂടുതലായി വലയില്‍ കുടുങ്ങുകയും അടുത്ത തലമുറ മത്സ്യകുഞ്ഞുങ്ങള്‍ പിറവി എടുക്കാതെ പോകുകയും ചെയ്യും. ഇത് തുടര്‍ന്നാല്‍
കാലക്രമേണ കടലിലെ മത്സ്യസമ്പത്ത് ഗണ്യമായി കുറയുകയും ചെയ്യും. ഇതാണ് ഈ സമയത്ത് ട്രോളിങ് നിരോധിക്കാനുള്ള തീരുമാനത്തിന്റെ അടിസ്ഥാനം. നിരോധനകാലത്ത് തീരത്തു നിന്നും 22 കിലോമീറ്റര്‍ ദൂരെ വരെ മത്സ്യബന്ധനം അനുവദിക്കില്ല. എന്നാല്‍ പരമ്പരാഗത മത്സ്യത്തൊഴിലാളികള്‍ ഉപയോഗിക്കുന്ന ഇന്‍ബോര്‍ഡ് ഔട്ട്ബോര്‍ഡ് വള്ളങ്ങള്‍ക്ക് ഈ നിയമം ബാധകമല്ല. ഏകദേശം 50 ദിവസ കാലയളവിലേക്കാണ് ഈ നിരോധനം സാധാരണ നടപ്പിലാക്കുന്നത്. സംസ്ഥാനത്ത് ജൂണ്‍ 10 മുതലാണ് ട്രോളിങ് നിരോധനം. ഇന്നലെ ചേര്‍ന്ന
മന്ത്രിസഭായോഗത്തിലാണ് തീരുമാനം. ജൂണ്‍ 10 മുതല്‍ ജൂലൈ 31 വരെ 52 ദിവസത്തേക്കാണ് ട്രോളിങ് നിരോധനം ഏര്‍പ്പെടുത്തിയിരിക്കുന്നത്. ജൂണ്‍ ഒമ്പത് അര്‍ധരാത്രി മുതല്‍ നടപടി പ്രാബല്യത്തില്‍ വരും. ജൂലൈ 31 അര്‍ധരാത്രിയില്‍ നിരോധനം നീക്കും. ട്രോളിങ് നിരോധനം സംബന്ധിച്ച് വിജ്ഞാപനം പുറപ്പെടുവിച്ചു കഴിഞ്ഞു.ട്രോളിങ് നിരോധനത്തിന് മുന്നോടിയായി സംസ്ഥാനത്തെ എല്ലാ തീരദേശ ജില്ലകളിലും കണ്‍ട്രോള്‍ റൂമുകള്‍ പ്രവര്‍ത്തിക്കും. മെയ് 15 മുതല്‍ കണ്‍ട്രോള്‍ റൂമുകളുടെ പ്രവര്‍ത്തനം ആരംഭിച്ചിരുന്നു. ഇവ 24 മണിക്കൂറും
പ്രവര്‍ത്തിക്കും. നിരോധനം ലംഘിക്കുന്നുണ്ടോയെന്ന് അറിയാന്‍ പട്രോളിങ് അടക്കം നടത്തും. ഇതിനായി സ്വകാര്യ ബോട്ടുകളടക്കം വാടകയ്ക്കെടുക്കാനാണ് തീരുമാനം. വിവിധ ഫിഷറീസ് സ്റ്റേഷനുകള്‍ കേന്ദ്രീകരിച്ച് 3 മറൈന്‍ ആംബുലന്‍സുകള്‍ പ്രവര്‍ത്തിക്കും. വിഴിഞ്ഞം, ബേപ്പൂര്‍, വൈപ്പിന്‍ എന്നീ മൂന്ന് ഫിഷറീസ് സ്റ്റേഷനുകള്‍ കേന്ദ്രീകരിച്ചാകും പ്രവര്‍ത്തനം. നിരോധനം നടപ്പാക്കുന്നതിന് കഴിഞ്ഞ തവണ സ്വീകരിച്ച നടപടികള്‍ കാര്യക്ഷമമായി ഇത്തവണയും തുടരുമെന്ന് മന്ത്രി സജി ചെറിയാന്‍ നേരത്തെ വ്യക്തമാക്കിയിരുന്നു.
കടലിലെ മത്സ്യസമ്പത്ത് സംരക്ഷിക്കുന്നതിനാണ് ട്രോളിങ് നിരോധനം നടപ്പിലാക്കുന്നത്. ഇതിനൊപ്പം മത്സ്യത്തൊഴിലാളികളുടെ വരുമാനമാര്‍ഗം ഉറപ്പുവരുത്തുന്നതിനും ഈ നടപടിയിലൂടെ ലക്ഷ്യമിടുന്നു. മത്സ്യങ്ങളുടെ പ്രജനന കാലമായതിനാലാണ് ജൂണ്‍-ജൂലൈ മാസങ്ങളില്‍ ട്രോളിങ് നിരോധനം ഏര്‍പ്പെടുത്തുന്നത്. 2015ല്‍ ജൂണ്‍ ഒന്ന് മുതല്‍ ജൂലൈ 31 വരെ കേന്ദ്രസര്‍ക്കാര്‍ രാജ്യമെമ്പാടും മത്സ്യബന്ധന നിരോധനം ഏര്‍പ്പെടുത്തിയിരുന്നെങ്കിലും പല സംസ്ഥാനങ്ങളും നടപടിയെ എതിര്‍ത്തു.
ഓരോ സംസ്ഥാനത്തും ഓരോ സമയത്താണ് ട്രോളിങ് നിരോധനം നടപ്പിലാക്കുന്നത് കേരളത്തില്‍ ജൂണ്‍ ആദ്യ പകുതിയില്‍ നിരോധനം ആരംഭിക്കുന്നതാണ് പതിവ്. ഇത്തവണയും ആ രീതിയില്‍ മാറ്റമുണ്ടായില്ല. പ്രാദേശിക പാരിസ്ഥിതി സാഹചര്യങ്ങള്‍ക്കനുസരിച്ചാണ് ഓരോ സംസ്ഥാനവും ദൈര്‍ഘ്യം നിശ്ചയിക്കുന്നത്.
യന്ത്രവല്‍കൃത ട്രോളറുകളെയാണ് പ്രധാനമായും ലക്ഷ്യമിടുന്നത്. പരമ്പരാഗത മോട്ടോര്‍ ഘടിപ്പിച്ചിട്ടില്ലാത്ത മത്സ്യബന്ധന ബോട്ടുകള്‍ക്ക് ഇളവുകളും നല്‍കാറുണ്ട്. മത്സ്യങ്ങളുടെ പ്രജനന കാലത്ത് നിരോധനം ഏര്‍പ്പെടുത്തുന്നതിലൂടെ കടലിലെ മത്സ്യസമ്പത്ത് വര്‍ധിക്കുമെന്നതാണ് ട്രോളിങ് നിരോധനത്തിന്റെ ഗുണം.
ട്രോളിംഗിന്റെ ആഘാതം പരിശോധിക്കാന്‍ കേരള സര്‍ക്കാര്‍ നിയോഗിച്ച ബാലകൃഷ്ണന്‍ നായര്‍ കമ്മിറ്റിയുടെ ശുപാര്‍ശകളുടെ അടിസ്ഥാനത്തില്‍ 1988-ലാണ് മണ്‍സൂണ്‍ കാലത്ത് ട്രോളിംഗ് ആദ്യമായി നിരോധിച്ചത്. തീരത്തുനിന്ന് 22 കി.മീ വരെ ദൂരത്ത് ഈ കാലയളവില്‍ മത്സ്യബന്ധനം അനുവദിക്കാറില്ല.
ട്രോളിങ് നിരോധനകാലത്ത് മത്സ്യത്തൊഴിലാളികള്‍ക്ക് സര്‍ക്കാര്‍ ആശ്വാസ നടപടികള്‍ പ്രഖ്യാപിക്കാറുണ്ട്. അതില്‍ പ്രധാനമാണ് സൗജന്യ റേഷന്‍. നിരോധനം ബാധിക്കുന്ന മത്സ്യത്തൊഴിലാളികള്‍ക്കാണ് റേഷന്‍ ഏര്‍പ്പെടുത്തുന്നത്. ഇത്തവണയും റേഷന്‍ വിതരണമുണ്ടാകും. ഇതുമായി ബന്ധപ്പെട്ട് വിവരങ്ങള്‍ ശേഖരിച്ചിരുന്നു.
CONTENT HIGH LIGHTS; Will the ban on trawling affect fishermen?: What is found in the sea is sand and plastic crystals; What is trawling?