കമ്യൂണിസ്റ്റ് പാര്ട്ടി ഓഫ് ഇന്ത്യ മാര്ക്സിസ്റ്റിന്റെ തീരുമാനങ്ങളൊക്കെ കാലത്തിനൊപ്പം മാറുന്നതാണെന്ന് വീണ്ടും തെളിയിച്ചിരിക്കുകയാണ് സര്ക്കാര്. കമ്യൂണിസ്റ്റുകാര് കട്ടന്ചായയും പരിപ്പുവടയും എപ്പോഴും തിന്നുജീവിക്കണമെന്നാണോ പറയുന്നതെന്ന് പറഞ്ഞ് ഇ.പി ജയരാജാണ് കമ്യൂണിസ്റ്റുകാരെ അത്യാധുനിക രാഷ്ട്രീയക്കാരായി പ്രഖ്യാപിച്ചത്. പിന്നാലെ, സ്വാശ്രയ കോളേജുകളും, സ്വകാര്യ മാനേജ്മെന്റുകളെയും വിദേശ സര്വ്വകലാശാലകളെയും യഥേഷ്ടം കൊണ്ടുവരാനുള്ള നിയമം പാസാക്കി മന്ത്രി ആര്. ബിന്ദു. ചികിത്സയും ചിട്ടകളും (സൂംബാ പോലുള്ള) വിദേശത്തു നിന്നും വേണമെന്ന നിഷ്ക്കര്ഷയോടെ മന്ത്രി വീണാ ജോര്ജും, മന്ത്രി വി. ശിവന്കുട്ടിയും. ഇപ്പോഴിതാ റവാഡ ചന്ദ്രശേഖറിന്റെ ഡി.ജി.പിയാക്കിക്കൊണ്ട് മുഖ്യമന്ത്രി പിണറായി വിജയനും കമ്യൂണിസ്റ്റ് പാര്ട്ടിയുടെ പഴയകാല സമരങ്ങളെയും രക്തസാക്ഷികളെയും എടുത്ത് പുറത്തേക്കെറിഞ്ഞിരിക്കുന്നു.
ഇതാണ് പ്രതിയോഗികളുടെയും പഴയ കമ്യൂണിസ്റ്റുകാരുടെയുമൊക്കെ ആശങ്കയും പ്രതിഷേധവും. ഇതിനെല്ലാം വൈരുധ്യാത്മക ഭൗതീകവാദത്തില് അധിഷ്ഠിതമായ ന്യായീകരണങ്ങളും ക്യാപ്സ്യൂളുകളും ഉണ്ടാകുമെന്നുറപ്പാണ്. എങ്കിലും ആശങ്കപ്പെടാതെ വകയില്ല. അതാണ് പി. ജയരാജന് മാധ്യമങ്ങളോടും പറഞ്ഞത്. സര്ക്കാര് മെറിറ്റിന്റെ അടിസ്ഥാനത്തിലാണ് ഡിജിപിയെ സംബന്ധിച്ച് തീരുമാനം എടുത്തത് എന്ന്. എന്താണ് മെറിറ്റ്. കൂത്തുപറമ്പ് സമരത്തില് അന്നത്തെ മന്ത്രി എം.വി. രാഘവനെ സംരക്ഷിക്കാനായി വെടിവെയ്ക്കാന് ഉത്തരവിട്ടതോ. അതോ, ഡി.ജി.പിയാകാന് യോഗ്യന് എന്ന മെറിറ്റോ. രണ്ടും മെറിറ്റില് ഉള്പ്പെടുമെങ്കില് നിയമനത്തില് കൈയ്യടിക്കുകയല്ലാതെ മറ്റു വഴികളൊന്നുമില്ല.
പക്ഷെ, ഇടതുപക്ഷ സര്ക്കാര് എന്നത്, ഭരിക്കാന് യോഗ്യത നേടിയതിനു പിന്നില് കൂത്തുപറമ്പ് സമരവും രക്തസാക്ഷികളും, അതിനുപിന്നില് അണി നിരന്ന നിരവധി സഖാക്കളുടെ വേദനയും വിയപ്പുമൊക്കെയാണ്. അതിനു വിലയിടുമ്പോള് റവാഡ ചന്ദ്രശേഖരന് അടക്കമുള്ള പോലീസുകാരെല്ലാം പ്രതിസ്ഥാനത്തു തന്നെയാണ്. അതു മറക്കാനാവില്ല. റവഡ ചന്ദ്രശേഖറിനെതിരേ കേസ് കൊടുത്തത് സാമൂഹ്യ പ്രവര്ത്തകരോ പൊതു താല്പ്പര്യ ഹര്ജിക്കാരോ അല്ല. പാര്ട്ടിയാണ്. അതുകൊണ്ടാണ് കൂത്തുപറമ്പ് സംഭവം ഓര്മ്മിപ്പിച്ച് സിപിഎം നേതാവ് പി ജയരാജന് വന്നത്. കൂത്തുപറമ്പ് വെടിവെയ്പില് ഉണ്ടായ പൊലീസ് ഉദ്യോഗസ്ഥന്മാരുടെ കൂട്ടത്തിലൊരാളാണ് റവാഡ ചന്ദ്രശേഖര്. ഈ തീരുമാനത്തെക്കുറിച്ച് വിശദീകരിക്കേണ്ടത് സര്ക്കാരാണെന്നാണ് അദ്ദേഹം ലപറയുന്നത്.
ചാര്ജെടുത്തതിന് പിറ്റേന്ന് കൂത്തുപറമ്പ് വെടിവെയ്പിന് നേതൃത്വം നല്കിയ ഉദ്യോഗസ്ഥനാണയാള്. രാഷ്ട്രീയമായി നോക്കുമ്പോള് പല പൊലീസ് ഉദ്യോഗസ്ഥന്മാരും പല ഘട്ടങ്ങളിലും സിപിഎമ്മിനും ഇടതുപക്ഷത്തിന്റെ ഭാഗമായിട്ടുള്ള സംഘടനകള്ക്കുമെതിരെ എതിര്പ്പ് ഉയര്ത്തിയ നടപടികള് കൈക്കൊണ്ടിട്ടുള്ളവരുണ്ടാകാം. കൂത്തുപറമ്പ് വെടിവെയ്പിന്റെ കാര്യത്തില് റവാഡ ചന്ദ്രശേഖര് ഉള്പ്പെടെയുള്ള ഉദ്യോഗസ്ഥര്ക്കെതിരെയും ആക്ഷേപം ഉയര്ന്നിരുന്നു. ഡിജിപി ചുരുക്കപ്പട്ടികയിലെ ഒന്നാമത്തെ പേരുകാരനായ നിതിന് അഗര്വാളിനെതിരെയും സിപിഎം പരാതി നല്കിയിട്ടുണ്ടെന്ന് പി ജയരാജന് ഓര്മ്മിപ്പിച്ചു.
വെടിവെയ്പ് നടന്ന അതേ കാലത്ത് തലശ്ശേരിയില് ചുമതലയുണ്ടായിരുന്ന നിതിന് അഗര്വാള്, അന്ന് ആര്എസ്എസ്-സിപിഎം സംഘര്ഷ സമയത്ത് ഇപ്പോഴത്തെ സിപിഎം കൂത്തുപറമ്പ് ഏരിയാ സെക്രട്ടറിയായ എം സുകുമാരനെ ലോക്കപ്പിലിട്ട് ഭീകരമായി തല്ലിച്ചതച്ച ഉദ്യോഗസ്ഥനാണ്. മന്ത്രി എം വി രാഘവനെ തടയാനുള്ള സമരത്തിന് നേതൃത്വം നല്കിയത് എം വി ജയരാജന്, എം സുരേന്ദ്രന്, എം സുകുമാരന് തുടങ്ങിയവരാണ്. ലോക്കപ്പിലിട്ട് തല്ലിച്ചതച്ചതിന് സുകുമാരന് കൊടുത്ത കേസിലെ പ്രതിയാണ് നിതിന് അഗര്വാള് എന്നും പി ജയരാജന് പറഞ്ഞു.
അന്ന് അത്തരം സമീപനങ്ങള്ക്കെതിരെ സിപിഎം ശക്തമായ നിലപാട് സ്വീകരിച്ചിരുന്നു. വര്ഷങ്ങള്ക്ക് ശേഷം ഇപ്പോള് അവരുടെ യോഗ്യതകള് പരിശോധിച്ച് റവാഡ ചന്ദ്രശേഖറിനെ സംസ്ഥാന പൊലീസ് മേധാവിയാക്കാന് സര്ക്കാര് തീരുമാനിക്കുകയായിരുന്നു. ഇടതു സര്ക്കാരിന്റെ രാഷ്ട്രീയത്തിന് അതീതമായ ഇത്തരം തീരുമാനങ്ങളെക്കുറിച്ച് വിവാദം ഉണ്ടാക്കുന്നത് വലതുപക്ഷ മാധ്യമങ്ങളുടെ സ്ഥിരം പരിപാടിയാണ്. സര്ക്കാര് മെറിറ്റിന്റെ അടിസ്ഥാനത്തിലാണ് ഡിജിപിയെ സംബന്ധിച്ച് തീരുമാനം എടുത്തത്. നയപരമായ കാര്യങ്ങളാണ് പാര്ട്ടി തീരുമാനിക്കുക. ഭരണപരമായ കാര്യങ്ങള് സര്ക്കാരാണ് തീരുമാനിക്കുകയെന്നും പി ജയരാജന് പറയുന്നു.
യു.പി.എസ്.സി കൈമാറിയ മൂന്നംഗ പട്ടികയിലുള്ള യോഗേഷ് ഗുപ്തയെക്കുറിച്ച് മാധ്യമ പ്രവര്ത്തകര് ചോദിച്ചപ്പോള്, ഓരോരുത്തരുടേയും മെറിറ്റ് പരിശോധിക്കാന് താന് അധികാരത്തിന്റെ ഭാഗമായിട്ടുള്ള ആളല്ലെന്നാണ്് പി ജയരാജന് പറഞ്ഞത്. ആ പട്ടികയില് വന്ന രണ്ടുപേര്ക്കെതിരെ അന്ന് സിപിഎമ്മും ഡിവൈഎഫ്ഐ പോലുള്ള സംഘടനകളും എതിര്നിലപാട് സ്വീകരിച്ചിരുന്നു എന്നതാണ് താന് ഓര്മ്മിപ്പിക്കുന്നതെന്നും പി ജയരാജന് വ്യക്തമാക്കി. അതേസമയം റവാഡ ചന്ദ്രശേഖറിന്റെ നിയമനത്തെ പ്രതിപക്ഷ നേതാവ് വി ഡി സതീശന് സ്വാഗതം ചെയ്തു. ഒരു മന്ത്രിയുടെ ജീവന് അപകടത്തില്പ്പെടുമെന്ന ഘട്ടമെത്തിയപ്പോഴാണ് വെടിവെയ്പ് ഉണ്ടായത് എന്നും സതീശന് പറഞ്ഞു.
കുത്തു പറമ്പ് അന്വേഷണകമ്മീഷന്റെ റിപ്പോര്ട്ടാണ് സര്ക്കാര് ഇതിന് ആയുധമാക്കാന് പോകുന്നത്. ഈ കണ്ടെത്തലുകളില് ചില വസ്തുതകളുണ്ട്. അതുപയോഗിച്ച് സിപിഎം അണികളെ തൃപ്തിപ്പെടുത്താനാകും സര്ക്കാര് ശ്രമിക്കുക. 1994ല് 5 ഡിവൈഎഫ്ഐ പ്രവര്ത്തകര് കൊല്ലപ്പെട്ട കൂത്തുപറമ്പ് വെടിവയ്പ് കേസില് പ്രതിയായിരുന്ന റവഡ ചന്ദ്രശേഖറിനെ 2012ലാണ് ഹൈക്കോടതി കുറ്റവിമുക്തനാക്കിയത്. അന്ന് ഡിവൈഎഫ്ഐ നേതാക്കള്ക്കെതിരെ മൊഴി നല്കിയതുമായി ബന്ധപ്പെട്ട് സിപിഎമ്മിന് രവഡയോട് എതിര്പ്പുണ്ടായിരുന്നു. തദ്ദേശ, നിയമസഭാ തിരഞ്ഞെടുപ്പുകള് ആസന്നമായിരിക്കെ ഏറ്റവും വിശ്വസ്തനായ ഒരാളെ പൊലീസ് മേധാവി സ്ഥാനത്തേക്കു നിയോഗിക്കാനാണ് സര്ക്കാര് താല്പര്യപ്പെട്ടത്.
എന്നാല് യു.പി.എസ്.സി തയ്യാറാക്കിയ പട്ടികയില് അത്തരത്തില് ആരും ഉണ്ടായില്ല. ഇതോടെ റവഡയെ നിയോഗിക്കാന് പിണറായി സര്ക്കാര് നിര്ബന്ധിതമാവുകയായിരുന്നു. നിഥിന് അഗര്വാളിനെ ഒട്ടും താല്പ്പര്യമില്ല. അഴിമതിക്കെതിരെ നിലപാട് എടുത്ത യോഗേഷ് ഗുപ്തയെ ഒഴിവാക്കാനും തീരുമാനിച്ചു. ഇതോടെ കൂത്തുപറമ്പില് ആരോപണ സ്ഥാനത്ത് നിന്ന റവഡയെ പോലീസ് മേധാവിയുമാക്കാന് തീരുമാനിക്കുകയായിരുന്നു.
‘കൂത്തുപറമ്പ് വെടിവെപ്പ്: എന്താണ് യാഥാര്ത്ഥ്യം? അന്വേഷണ ‘കമ്മീഷന് റിപ്പോര്ട്ടിന്റെ ഉള്ളടക്കം (സംക്ഷിപ്തം)’ എന്ന പേരിലാണ് പബ്ളിക് റിലേഷന്സ് വകുപ്പ് പരസ്യം പത്രങ്ങള്ക്ക് നല്കിയിരുന്നു. ആ പരസ്യത്തില് എഎസ്പി റവഡയുടെ ഉത്തരവാദിത്വം അത് എത്രത്തോളം? എന്ന തലക്കെട്ടില് വിവരിച്ചിരിക്കുന്നത് ഇങ്ങനെയാണ്: ‘എക്സിക്യൂട്ടീവ് മജിസ്ട്രേറ്റിന്റെ വെടിവെക്കാനുള്ള ഉത്തരവ് നടപ്പിലാക്കിയത് എ.എസ്.പി ആര്.എ ചന്ദ്രശേഖറായിരുന്നു. വെടിവെപ്പിന്റെ കാര്യത്തില് അതിന് തുനിയണമോ വേണ്ടായോ എന്നതില് തീരുമാനം എടുക്കേണ്ട ചുമതല എക്സിക്യൂട്ടീവ് മജിസ്ട്രേറ്റിനാണ്. ഈ സംഭവത്തില് എക്സിക്യൂട്ടീവ് മജിസ്ട്രേറ്റ് ഉണ്ടായിരുന്നു.
അദ്ദേഹം ആവശ്യമായ ഉത്തരവ് നല്കുകയും ചെയ്തു. എ എസ് പി എക്സിക്യൂട്ടീവ് മജിസ്ട്രേറ്റിന്റെ ഉത്തരവ് നടപ്പാക്കുകയാണ് ചെയ്തത്. സംഭവത്തിന് രണ്ട് ദിവസം മുമ്പ് ചുമതലയേറ്റ പരിചയം കുറഞ്ഞ ജുനിയര് ഐപിഎസ് ഉദ്യോഗസ്ഥനാണ് എഎസ്പി. എന്നതിനാല് അദ്ദേഹത്തിന്റെ ഭാഗത്തു നിന്നുണ്ടായ ചില്ലറ വീഴ്ചകള് പൊറുക്കാവുന്നതാണ്. അതുകൊണ്ട് ‘അദ്ദേഹത്തിന്റെ ചുമലില് ഉത്തരവാദിത്തം ഏറ്റിവെക്കാന് കാരണമൊന്നും കാണുന്നില്ല.’ വെടിവെപ്പില് റവാഡയ്ക്ക് കാര്യമായ റോള് ഇല്ലായെന്ന് പരാമര്ശനം ഉണ്ടായിരുന്നെങ്കിലും കേസ് സംബന്ധിച്ച് അദ്ദേഹം കോടതിയില് നല്കിയ മൊഴിയെ ചൊല്ലി ഡിവൈഎഫ്ക്കാര്ക്ക് എതിര്പ്പുണ്ടായിരുന്നു.
കൂത്തുപറമ്പില് അര്ബന് ബാങ്ക് ശാഖ ഉദ്ഘാടനത്തിന് എത്തിയ മന്ത്രി എംവി രാഘവനെ തടയാനെത്തിയ ഡിവൈഎഫ്ഐ നേതാക്കള് ‘എം.വി. രാഘവനെ ഞങ്ങള് വിടില്ല, മന്ത്രി എന് രാമകൃഷ്ണനെ ഒഴിവാക്കും’ എന്നു തന്നോടു പറഞ്ഞതായി റവഡ ചന്ദ്രശേഖര് കോടതിയില് മൊഴി നല്കിയിരുന്നു. അവരില് തിരിച്ചറിഞ്ഞ എം സുരേന്ദ്രന്, പനോളി വല്സന്, എംവി ജയരാജന് തുടങ്ങി എട്ടുപേരുടെ വിവരങ്ങളാണ് എഫ്ഐആറില് ചേര്ത്തതെന്നും അദ്ദേഹം വ്യക്തമാക്കിയിരുന്നു. എക്സിക്യൂട്ടീവ് മജിസ്ട്രേട്ടിന്റെ നിര്ദേശപ്രകാരമാണു വെടിവച്ചതെന്നും മൊഴി നല്കി. ഈ മൊഴികളെല്ലാം അന്നത്തെ ഭരണകക്ഷിയായ സിപിഎമ്മിനെ ചൊടിപ്പിച്ച സംഭവങ്ങളാണ്. 2012ല് കേരള ഹൈക്കോടതി രവാഡ ചന്ദ്രശേഖറിനെ കുത്തുപറമ്പ് കേസില് നിന്ന് കുറ്റവിമുക്തനാക്കി. ഈ സാഹചര്യം ഉയര്ത്തിയാകും റവഡയെ ഇനി സിപിഎമ്മും സര്ക്കാരും സംരക്ഷിക്കുക.
CONTENT HIGH LIGHTS; Is the government equally fond of Rawada Chandrasekhar and the Koothuparamba shooting?: Back then, the minister was saved and the duty was fulfilled; today, the position is based on merit; P. Jayarajan reminds the government that the Koothuparamba incident should be explained in the appointment