അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഉപരാഷ്ട്രപതി തിരഞ്ഞെടുപ്പിലെ സംയുക്ത പ്രതിപക്ഷ സ്ഥാനാർത്ഥി ബി.സുദർശൻ റെഡ്ഡിക്ക് പ്രതീക്ഷിച്ചതിലും കുറഞ്ഞ വോട്ടുകൾ ലഭിച്ചതിനെ ചൊല്ലി പരസ്പരം പഴിചാരുകയാണ് ഇന്ത്യാ സഖ്യത്തിലെ പാർട്ടികൾ. ആം ആദ്മി പാർട്ടിയുടെ (എഎപി) നിരവധി എംപിമാർ എൻഡിഎ സ്ഥാനാർത്ഥി സി.പി.രാധാകൃഷ്ണന് വോട്ട് ചെയ്തതായി തൃണമൂൽ കോൺഗ്രസ് ജനറൽ സെക്രട്ടറിയും എംപിയുമായ അഭിഷേക് ബാനർജി ആരോപിച്ചു.
“ക്രോസ് വോട്ടിങ് ഉണ്ടായിരുന്നുവെന്ന് ഞാൻ അംഗീകരിക്കുന്നുണ്ടെങ്കിലും, എഎപി പോലുള്ള ചില പാർട്ടികളുണ്ട്, അവിടെ ഒരു വനിതാ എംപി പരസ്യമായി ബിജെപിയെ പിന്തുണയ്ക്കുകയും അരവിന്ദ് കെജ്രിവാളിനെതിരെ സംസാരിക്കുകയും ചെയ്യുന്നു. അത്തരം രണ്ടോ നാലോ എംപിമാരുണ്ട്,” കൊൽക്കത്ത വിമാനത്താവളത്തിൽ മാധ്യമപ്രവർത്തകരോട് അദ്ദേഹം പറഞ്ഞു.
അതേസമയം, പാർട്ടിയെ കുറ്റപ്പെടുത്തുന്നത് അസംബന്ധമാണെന്ന് മുതിർന്ന എഎപി നേതാവും എംപിയും ജനറൽ സെക്രട്ടറി (സംഘടന)യുമായ സന്ദീപ് പഥക് ഇന്ത്യൻ എക്സ്പ്രസിനോട് പറഞ്ഞു. “ഞങ്ങളുടെ എല്ലാ എംപിമാരും പ്രതിപക്ഷ സ്ഥാനാർത്ഥിക്ക് വോട്ട് ചെയ്തു, എല്ലാവർക്കും അറിയാവുന്ന ഒരാൾ (സ്വാതി മാലിവാൾ) ഒഴികെ.” മറ്റെന്തോ സംഭവിച്ചിട്ടുണ്ടെന്ന് പാർട്ടി വിശ്വസിക്കുന്നതായി പഥക് അവകാശപ്പെട്ടു. “തിരഞ്ഞെടുപ്പ് ഫലത്തിന് ശേഷം ചൊവ്വാഴ്ച വൈകുന്നേരം ഞങ്ങൾ കണക്കെടുത്തു. 27 പ്രതിപക്ഷ എംപിമാർ എൻഡിഎ സ്ഥാനാർത്ഥിക്ക് വോട്ട് ചെയ്തുവെന്നും 12 ബിജെപി എംപിമാർ പ്രതിപക്ഷ സ്ഥാനാർത്ഥിക്ക് വോട്ട് ചെയ്തുവെന്നും വിശ്വസിക്കാൻ കാരണമുണ്ട്.”
ഉപരാഷ്ട്രപതി തിരഞ്ഞെടുപ്പിൽ റെഡ്ഡിക്ക് 320-ലധികം വോട്ടുകൾ ലഭിക്കുമെന്ന് പ്രതിപക്ഷം പ്രതീക്ഷിച്ചിരുന്നു, പക്ഷേ അദ്ദേഹത്തിന് 300 വോട്ടുകൾ മാത്രമേ ലഭിച്ചുള്ളൂ. മറുവശത്ത്, രാധാകൃഷ്ണന് എൻഡിഎ പ്രതീക്ഷിച്ചിരുന്ന 440-ലധികം വോട്ടുകൾക്ക് പകരം 452 വോട്ടുകൾ ലഭിച്ചു. ചൊവ്വാഴ്ച ഫലം വന്നയുടനെ, എൻഡിഎയ്ക്ക് ലഭിച്ച വോട്ടെല്ലാം പ്രതിപക്ഷ എംപിമാരുടേതാണെന്ന അഭ്യൂഹങ്ങൾ പരന്നു. അതേസമയം, രാധാകൃഷ്ണൻ ഗവർണറായിരുന്ന മഹാരാഷ്ട്ര, ജാർഖണ്ഡ് എന്നിവിടങ്ങളിൽ നിന്നുള്ള എംപിമാർ പാർട്ടി വ്യത്യാസമില്ലാതെ അദ്ദേഹത്തിന് വോട്ട് ചെയ്തത് അദ്ദേഹത്തിന്റെ പക്ഷപാതരഹിതമായ പ്രവർത്തനത്തിന് ലഭിച്ച നല്ല മനസ്സ് കൊണ്ടാണെന്ന് ബിജെപി പറയുന്നു.
തങ്ങളുടെ 11 എംപിമാരും പ്രതിപക്ഷ സ്ഥാനാർത്ഥിക്ക് വോട്ട് ചെയ്തതായി ശിവസേന (യുബിടി) എംപി അരവിന്ദ് സാവന്ത് ദി ഇന്ത്യൻ എക്സ്പ്രസിനോട് പറഞ്ഞു. ബിജെപി വ്യാജ പ്രചാരണം നടത്തുകയാണെന്ന് ആരോപിച്ച സാവന്ത്, തങ്ങൾ (എൻഡിഎയിലേക്ക്) തിരിച്ചുവരണമെന്ന് അവർ ആഗ്രഹിക്കുന്നുവെന്നും വെളിപ്പെടുത്തി. “ആ എംപിമാർ നിരക്ഷരരായിരുന്നോ? അത് അന്വേഷിക്കണം. ആരാണ് അവരെ വാങ്ങിയത്? ഇതാണ് ബിജെപി ചെയ്യുന്നത്. അവർ സംസ്ഥാന സർക്കാരുകളെ പോലും തകർക്കുന്നു. മഹാരാഷ്ട്രയിൽ, അവർ പരസ്യമായി (എംഎൽഎമാരെ) വിലയ്ക്ക് വാങ്ങി,” വോട്ടുകൾ അസാധുവാക്കിയതിൽ സംശയം ഉന്നയിച്ചുകൊണ്ട് സാവന്ത് പറഞ്ഞു.
ഏകദേശം 35 പ്രതിപക്ഷ എംപിമാർ രാധാകൃഷ്ണന് വോട്ട് ചെയ്തുവെന്നാണ് ബിജെപി നേതാവും കേന്ദ്രമന്ത്രിയുമായ ഹർദീപ് സിങ് പുരി പറഞ്ഞത്. കേന്ദ്രത്തിലെ ബിജെപി സർക്കാർ വോട്ടിങ് മെഷീനുകളിൽ കൃത്രിമത്വം കാണിക്കുന്നുണ്ടെന്നാണ് അവകാശപ്പെടുന്നത്. പ്രതിപക്ഷം ആവശ്യപ്പെട്ടുകൊണ്ടിരിക്കുന്ന പേപ്പർ ബാലറ്റ് ആയിരുന്നു ഉപരാഷ്ട്രപതി തിരഞ്ഞെടുപ്പെന്ന് അദ്ദേഹം പരിഹസിച്ചു.
