അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഭരണ നിർവഹണത്തിൽ നിർമിതബുദ്ധിയെ (AI) സമന്വയിപ്പിക്കുന്നതിൽ ലോകത്തിന് തന്നെ മാതൃകയാവുകയാണ് കിഴക്കൻ യൂറോപ്യൻ രാജ്യമായ അൽബേനിയ. അടുത്തിടെ അൽബേനിയൻ സർക്കാർ നിയമിച്ച ആദ്യത്തെ മനുഷ്യേതര AI മന്ത്രിയായ ഡിയെല്ല ‘ഗർഭിണി’ ആണെന്ന പ്രധാനമന്ത്രി എഡി റാമയുടെ പ്രഖ്യാപനം ലോകമെങ്ങുമുള്ള സാങ്കേതിക, രാഷ്ട്രീയ ലോകത്തെ അമ്പരപ്പിച്ചിരിക്കുകയാണ്. ജർമ്മനിയിലെ ബെർലിനിൽ നടന്ന ഗ്ലോബൽ ഡയലോഗിൽ (ബിജിഡി) സംസാരിക്കവെയാണ് ഈ ആലങ്കാരിക പ്രഖ്യാപനം. സോഷ്യലിസ്റ്റ് പാർട്ടിയിലെ 83 പാർലമെന്റ് അംഗങ്ങൾക്കായി 83 എഐ അസിസ്റ്റന്റുമാർക്ക് ഡിയെല്ല ജന്മം നൽകുമെന്നാണ് പ്രധാനമന്ത്രി വ്യക്തമാക്കിയത്. അൽബേനിയയുടെ നിയമനിർമ്മാണ പ്രക്രിയയെ സമൂലമായി പരിഷ്കരിക്കാൻ ലക്ഷ്യമിട്ടുള്ള ഈ നീക്കം, സാങ്കേതികവിദ്യയും ഭരണകൂടവും തമ്മിലുള്ള അതിരുകൾ മായ്ച്ചുകളയുന്നതിൽ ഒരു പുതിയ അധ്യായം കുറിക്കുകയാണ്.
- ആരാണ് ഡിയെല്ല?
‘സൂര്യൻ’ എന്ന് അർത്ഥം വരുന്ന ഡിയെല്ല, കോഡുകളും പിക്സലുകളും കൊണ്ട് നിർമ്മിക്കപ്പെട്ട ഒരു AI എന്റിറ്റി ആണ്. ഒരു പ്രത്യേക മന്ത്രാലയത്തിന്റെ ചുമതല വഹിക്കുന്ന ആദ്യത്തെ മനുഷ്യനല്ലാത്ത മന്ത്രിയാണ് ഡിയെല്ല. ഡിയെല്ലയെ 2023 സെപ്റ്റംബറിലാണ് അൽബേനിയൻ സർക്കാർ ഔദ്യോഗികമായി നിയമിച്ചത്. ഒരു മനുഷ്യനല്ലാത്ത എഐ മന്ത്രിയെ ഔദ്യോഗികമായി നിയമിക്കുന്ന ലോകത്തിലെ ആദ്യത്തെ രാജ്യമാണ് അൽബേനിയ. പരമ്പരാഗത അൽബേനിയൻ വസ്ത്രം ധരിച്ച ഒരു സ്ത്രീയായാണ് ഈ എഐ മന്ത്രിയെ പ്രതിനിധീകരിക്കുന്നത്. രാജ്യത്തെ പൊതു സംഭരണ സംവിധാനം പൂർണ്ണമായും സുതാര്യവും അഴിമതിരഹിതവുമാക്കുക എന്നതാണ് ഡിയെല്ലയുടെ പ്രധാന ദൗത്യം. പൊതു ടെൻഡറുകളുമായി ബന്ധപ്പെട്ട എല്ലാ തീരുമാനങ്ങളും എടുക്കാനുള്ള ഉത്തരവാദിത്തം ഡിയെല്ലക്കാണ്. ജനുവരിയിൽ ഇ-അൽബേനിയ പ്ലാറ്റ്‌ഫോമിൽ വെർച്വൽ അസിസ്റ്റന്റായി ആരംഭിച്ച ഡിയെല്ല, പൗരന്മാർക്കും ബിസിനസുകാർക്കും സർക്കാർ രേഖകൾ നേടാൻ നേരത്തെ സഹായം നൽകിയിരുന്നു.
- എന്താണ് ഈ ‘ഗർഭധാരണം’ അർത്ഥമാക്കുന്നത്?
പ്രധാനമന്ത്രിയുടെ ഗർഭം എന്ന പ്രസ്താവന അക്ഷരാർത്ഥത്തിലുള്ളതല്ല, മറിച്ച് ഒരു സാങ്കേതിക പദ്ധതിയെ സൂചിപ്പിക്കുന്നതാണ്. സോഷ്യലിസ്റ്റ് പാർട്ടിയിലെ 83 പാർലമെന്റ് അംഗങ്ങൾക്കും ഓരോ AI അസിസ്റ്റന്റിനെ നൽകാനാണ് പദ്ധതി. “വലിയൊരു റിസ്‌ക് എടുത്തു, അതിനാൽ ആദ്യമായി ഡിയെല്ല ഗർഭിണിയായിരിക്കുന്നു, 83 കുട്ടികളോടൊപ്പം” എന്നായിരുന്നു റാമയുടെ വാക്കുകൾ. ഈ ‘കുട്ടികൾ’ അഥവാ സഹായികൾ ഡിയെല്ലയുടെ ‘അറിവ്’ പങ്കുവെക്കുന്നവരായിരിക്കും.
- 83 ‘ഡിജിറ്റൽ കുട്ടികൾ’ എങ്ങനെ പ്രവർത്തിക്കും?
പ്രധാനമന്ത്രി റാമയുടെ പ്രഖ്യാപനമനുസരിച്ച്, ഡിയെല്ലക്ക് പിറക്കുന്ന 83 ‘കുട്ടികൾ’ ഭരണകക്ഷിയായ സോഷ്യലിസ്റ്റ് പാർട്ടിയുടെ 83 പാർലമെന്റ് അംഗങ്ങളുടെ സഹായികളായി പ്രവർത്തിക്കും. ഈ എഐ അസിസ്റ്റന്റുമാർക്ക് അവരുടെ ‘അമ്മ’യായ ഡിയെല്ലയുടെ അറിവുണ്ടായിരിക്കും. ഇവരുടെ ചുമതലകൾ പാർലമെന്റിൽ നടക്കുന്ന കാര്യങ്ങൾ പൂർണ്ണമായി രേഖപ്പെടുത്തുക പിന്നെ പാർലമെന്റ് അംഗങ്ങൾക്ക് പങ്കെടുക്കാൻ കഴിയാത്ത ചർച്ചകളെക്കുറിച്ചും സംഭവങ്ങളെക്കുറിച്ചും വിവരങ്ങൾ നൽകുക. അതുപോലെ എംപിമാർക്ക് ആവശ്യമായ നിർദ്ദേശങ്ങൾ നൽകുക ഇവയൊക്കെയാണ്. ഉദാഹരണത്തിന്, ഒരു എംപി കാപ്പി കുടിക്കാൻ പോയി മടങ്ങിയെത്താൻ വൈകിയാൽ, ഹാളിൽ നടന്ന സംഭാഷണങ്ങൾ എന്തൊക്കെയാണെന്നും ആർക്കെതിരെ പ്രത്യാക്രമണം നടത്തണമെന്നും ഈ എഐ സഹായികൾ പറയും.
- ഭരണ സുതാര്യതയും പാർലമെന്ററി കാര്യക്ഷമതയും
ഡിയെല്ലയുടെ നിയമനത്തിന് പിന്നിൽ അൽബേനിയൻ സർക്കാരിന് വ്യക്തമായ ലക്ഷ്യങ്ങളുണ്ട്. രാജ്യത്തെ പൊതു സംഭരണ സംവിധാനം 100% സുതാര്യവും അഴിമതിരഹിതവുമാക്കുക എന്നതാണ് ഡിയെല്ലയുടെ പ്രാഥമിക ചുമതല. എല്ലാ പൊതു ടെൻഡറുകളുടെയും തീരുമാനങ്ങൾ പൂർണ്ണമായും ഈ AI സംവിധാനത്തിനാണ് നൽകിയിരിക്കുന്നത്.
ഈ പുതിയ സംവിധാനം 2026 അവസാനത്തോടെ പൂർണ്ണമായി പ്രവർത്തനക്ഷമമാകുമെന്നാണ് പ്രതീക്ഷിക്കുന്നത്. അഴിമതി നിർമാർജനത്തിനും ഭരണപരമായ കാര്യങ്ങൾ വേഗത്തിലാക്കാനും AI സാങ്കേതികവിദ്യയെ എങ്ങനെ ഉപയോഗിക്കാമെന്നതിനുള്ള ഒരു പരീക്ഷണമാണ് അൽബേനിയ ഇപ്പോൾ ലോകത്തിന് മുന്നിൽ അവതരിപ്പിക്കുന്നത്.
അൽബേനിയയുടെ ഈ AI പരീക്ഷണം ലോകമെമ്പാടുമുള്ള മറ്റ് സർക്കാരുകൾക്ക് ഒരു മാതൃകയാകുമോ, അതോ സാങ്കേതികവിദ്യയുടെ ഈ അമിതമായ ഉപയോഗം ഭരണത്തിൽ പുതിയ വെല്ലുവിളികൾ ഉയർത്തുമോ എന്ന് അറിയേണ്ടിയിരിക്കുന്നു.
