അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കൊല്ലം: ജില്ലാ ആശുപത്രി പരിസരത്ത് പ്രവർത്തിച്ചുവരുന്ന കാൻസർ മുൻകരുതൽ പരിശോധനാ കേന്ദ്രം ഇന്നലെ പെട്ടെന്നാണ് പ്രവർത്തനം നിർത്തിയത്. മുന്നറിയിപ്പോ പൊതുജനങ്ങൾക്ക് നൽകിയ അറിയിപ്പോ ഒന്നുമില്ലാതെ കേന്ദ്രം അടച്ചുപൂട്ടിയതോടെ പരിശോധനാഫലം വാങ്ങാനെത്തിയ രോഗികൾ തിരിച്ചുപോകേണ്ടി വന്നു.
കേന്ദ്രത്തിലെ ജീവനക്കാരും രോഗികളും പതിവുപോലെ രാവിലെ എത്തിയപ്പോഴാണ് കെട്ടിടം പൂട്ടിയ നിലയിൽ കണ്ടത്. പ്രധാന വാതിലിൽ “കെട്ടിടം അപകടാവസ്ഥയിൽ; പ്രവേശനം നിരോധിച്ചിരിക്കുന്നു” എന്ന പോസ്റ്റർ പതിച്ചിരിക്കുകയായിരുന്നു. കെട്ടിടത്തിന് ബലക്ഷയം ഉണ്ടെന്ന് ചൂണ്ടിക്കാട്ടി 15-ാം തീയതിയിലായിരുന്നു ജില്ലാ ആശുപത്രി സൂപ്രണ്ട് നോട്ടീസ് നൽകിയിരുന്നത്. പക്ഷേ, കേന്ദ്രത്തെ മറ്റെവിടെയെങ്കിലും മാറ്റി പ്രവർത്തിക്കാനുള്ള ക്രമീകരണങ്ങൾ ഒന്നും തന്നെ ചെയ്തിരുന്നില്ല.
കെട്ടിടത്തിന്റെ രണ്ടാമത്തെ നിലയിൽ പ്രവർത്തിച്ചിരുന്ന ലാബും അടച്ചതോടെ, പരിശോധനാഫലങ്ങൾ സൂക്ഷിച്ചിരുന്ന കമ്പ്യൂട്ടർ മുറിയിലേക്കും ജീവനക്കാർക്ക് കയറാനായില്ല. ഫലം വാങ്ങാനെത്തിയ ചിലരിൽ, മുൻപരിശോധനയുടെ റിപ്പോർട്ട് ടെക്നീഷ്യൻമാരുടെ മൊബൈൽ ഫോണിൽ ഉണ്ടായിരുന്നതുകൊണ്ട്, അതിനെ ആശ്രയിച്ചാണ് കൈയെഴുത്തിൽ റിപ്പോർട്ട് തയാറാക്കി നൽകേണ്ടിവന്നത്. ബാക്കിയുള്ളവർ നിരാശയോടെ മടങ്ങുകയായിരുന്നു.
വിക്ടോറിയ ആശുപത്രിയിലും ജില്ലാ ആശുപത്രിയിലും നിന്നും പ്രതിദിനം നിരവധി പേർ ഗർഭാശയ അർബുദം, സ്തനാർബുദം ഉൾപ്പെട്ട പരിശോധനകൾക്കായി ഈ കേന്ദ്രത്തിൽ എത്താറുണ്ട്. കാൻസർ കൺട്രോൾ സൊസൈറ്റിയുടെ കീഴിലാണ് പ്രവർത്തനം, ജില്ലാ കളക്ടർ ചെയർമാനാണ്. പാത്തോളജി ഡോക്ടർ, രണ്ട് ടെക്നീഷ്യൻമാർ, ഒരു ഹെൽപർ, ഒരു അക്കൗണ്ടന്റ് എന്നിവരാണ് സ്റ്റാഫ്.
മുമ്പ് ജില്ലാ ആശുപത്രിയുടെ സ്കാൻ സെന്ററിന് സമീപം പ്രവർത്തിച്ചിരുന്ന പരിശോധനാ കേന്ദ്രം, സ്കാൻ സെന്ററിന്റെ വികസനപ്രവർത്തനങ്ങൾ മൂലം സ്ഥലം കുറവായത് പിന്നാലെ, 1970ൽ നിർമ്മിച്ച പഴയ കെട്ടിടത്തിലേക്കായിരുന്നു രണ്ട് വർഷം മുൻപ് മാറ്റിയത്. ആ കെട്ടിടത്തിലാണ് ഇപ്പോൾ അപകടാവസ്ഥ ചൂണ്ടിക്കാട്ടി പ്രവർത്തനം മുഴുവൻ നിർത്തിയിരിക്കുന്നത്.
പുതിയ അന്തിസൗകര്യ സ്ഥലമൊരുക്കാതെ പെട്ടെന്ന് പൂട്ടിയ നടപടി ശക്തമായ വിമർശനങ്ങൾക്ക് ഇടയാക്കിയിരിക്കുകയാണ്. കാൻസർ പരിശോധന അനിവാര്യമായവരിൽ പലരും ഇന്ന് നിർണായക പരിശോധനകൾ നഷ്ടപ്പെടുത്തി തിരികെ പോയി.
