അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ശബരിമലയിലേക്ക് നിയന്ത്രിക്കാൻ സാധിക്കാത്ത വിധം ഭക്തജനപ്രവാഹം തുടരുന്ന സാഹചര്യത്തിൽ, തിരക്ക് നിയന്ത്രിക്കാൻ പ്രായോഗിക നടപടികളുമായി സർക്കാരും ദേവസ്വം ബോർഡും. ഇന്ന് മുതൽ തീർഥാടകരുടെ പ്രതിദിന പ്രവേശനം 75,000 ആയി നിജപ്പെടുത്തി.
ഇന്ന് മുതൽ സ്പോട്ട് ബുക്കിങ് എണ്ണം 5,000 ആയി വെട്ടിച്ചുരുക്കി. സ്പോട്ട് ബുക്കിങ് കുറച്ചതോടെ ഇന്നലെ രാത്രി നിലയ്ക്കലിൽ എത്തിയ മുഴുവൻ തീർഥാടകരും പമ്പയിലേക്ക് നീങ്ങിയത് തിരക്ക് വർധിക്കാൻ കാരണമായി.
നിലയ്ക്കലിൽ മാത്രമാകും ഇനി സ്പോട്ട് ബുക്കിങ് അനുവദിക്കുക. അടുത്ത മാസം 13 വരെയുള്ള ഓൺലൈൻ വെർച്വൽ ക്യൂ ബുക്കിങ് പൂർണ്ണമായി കഴിഞ്ഞു.
അതിനിടെ 40 എൻഡിആർഎഫ് സേനാംഗങ്ങൾ കൂടി സന്നിധാനത്തെത്തി. ഇന്നലെ സ്പോട്ട് ബുക്കിങ്ങിന് എത്തിയത് 14000ത്തിൽ അധികം പേരാണ്. സ്പോട്ട് 5000 ആക്കുന്നതോടെ തീർഥാടകർ കാത്തു നിൽക്കേണ്ടിവരും. മറ്റു ദിവസങ്ങളിൽ ബുക്ക് ചെയ്തു നേരത്തെ എത്തിയവർ 28,000 പേരാണ്. മറ്റു ദിവസങ്ങളിൽ ബുക്ക് ചെയ്തവർ കാത്തു നിൽക്കേണ്ടിവരും.
ഇന്ന് സന്നിധാനത്ത് പതിവു തിരക്ക് മാത്രമാണ് അനുഭവപ്പെട്ടത്. ശബരിമലയിലെ അനിയന്ത്രിതമായ ഭക്തജനത്തിരക്കിൽ ഹൈക്കോടതിയുടെ വിമർശനം ഉൾക്കൊള്ളുന്നുവെന്ന് ദേവസ്വം ബോർഡ് പ്രസിഡന്റ് കെ. ജയകുമാർ പ്രതികരിച്ചിരുന്നു.വരും ദിവസങ്ങളിൽ ശബരിമലയിൽ ഭക്തർക്ക് സുഗമമായ ദർശനം സാധ്യമാക്കും.
പാതിവഴിയിൽ ഭക്തർ മടങ്ങിപ്പോയ സംഭവത്തിൽ പശ്ചാത്താപം ഉണ്ട്. നിലയ്ക്കലും പമ്പയിലും നിയന്ത്രണങ്ങൾ അല്ല, ക്രമീകരണങ്ങൾ വരുമെന്നും അദ്ദേഹം സൂചിപ്പിച്ചിരുന്നു. ഒരു ലക്ഷത്തിലധികം ആൾക്കാർ അവിടെ എത്തരുത്, അത്രയും ആൾക്കാരെ മാത്രമേ ആ സ്ഥലത്തു ഉൾക്കൊള്ളാൻ സാധിക്കുകയുള്ളൂവെന്ന് ജയകുമാർ അറിയിച്ചു.
കാനനപാതയിലൂടെ വരുന്നവർ നേരിട്ട് ക്യൂവിൽ ചേരുന്നു. അപ്പോൾ ആൾക്കാരുടെ എണ്ണം വർദ്ധിക്കുന്നു. ആദ്യദിവസം തന്നെ ഇത്രയും ആൾക്കാരെ പ്രതീക്ഷിച്ചില്ല. അയ്യപ്പൻ തന്നെ കാണിച്ച് തന്നതാണ്, നിയന്ത്രിച്ചില്ലെങ്കിൽ അനിഷ്ടങ്ങൾ സംഭവിക്കും. പമ്പയിലെ ക്രമീകരണം ശക്തിപ്പെടുത്തും. കാനനപാതയിലൂടെ വരുന്നവരെ നിയന്ത്രിക്കാനുള്ള ക്രമീകരണങ്ങൾ ചെയ്തിട്ടില്ലെന്നും ജയകുമാർ പറഞ്ഞു.
