അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തദ്ദേശ സ്വയംഭരണ തിരഞ്ഞെടുപ്പിൽ ഭരണകക്ഷിയായ എൽ.ഡി.എഫിന് പലയിടത്തും അടിതെറ്റിയതിന് പിന്നിൽ, സോഷ്യൽ മീഡിയയിൽ തരംഗമായ ഒരു ‘പരിഹാസ പാട്ട് ബോംബ്’ ആണത്രേ പ്രധാന വില്ലൻ! ‘പോറ്റിയെ കേറ്റിയെ സ്വർണ്ണം ചെമ്പായി മാറ്റിയെ’ എന്ന് തുടങ്ങുന്ന ഈ പാട്ട്, അയ്യപ്പനെയും ശബരിമല വിഷയങ്ങളെയും കേന്ദ്രീകരിച്ചുള്ള ഒളിയമ്പുകളായിരുന്നു. സ്വർണ്ണം ചെമ്പാക്കൽ, ശാസ്താവിന്റെ ധനം ഊറ്റൽ, ആചാരലംഘനത്തിനായി ‘അമ്മിണിമാരെ മലകയറ്റൽ’ തുടങ്ങിയ തീപ്പൊരി ആരോപണങ്ങൾ ഹാസ്യാത്മകമായി അവതരിപ്പിച്ചപ്പോൾ, അത് വോട്ടർമാരുടെ മനസ്സിൽ ‘കൊണ്ടു’, പ്രത്യേകിച്ച് വിശ്വാസപരമായ വിഷയങ്ങൾ ചർച്ചയായ മണ്ഡലങ്ങളിൽ.
തെരഞ്ഞെടുപ്പ് ഫലം വന്നപ്പോൾ, എൽ.ഡി.എഫിന്റെ പല കോട്ടകളും തകർന്നടിഞ്ഞു. പല പ്രമുഖ സ്ഥാനാർത്ഥികളും അപ്രതീക്ഷിതമായി പരാജയപ്പെട്ടു. സൈബർ ഇടങ്ങളിൽ ഒരു രൂപ പോലും ചെലവില്ലാതെ വൈറലായ ഈ ‘സഖാക്കൾക്കെതിരെയുള്ള അയ്യപ്പ ഗാനം’, മറുവശത്ത് സർക്കാർ കോടികൾ മുടക്കി നടത്തിയ പി.ആർ. ഏജൻസികളുടെ പ്രചാരണങ്ങളെയും, കോൺക്ലേവുകളെയും, പത്ര-ദൃശ്യ മാധ്യമ പരസ്യങ്ങളെയും (ഉറുദു പത്രത്തിലെ പരസ്യം ഉൾപ്പെടെ!) നിഷ്പ്രഭമാക്കിയ കാഴ്ചയാണ് കണ്ടത്.
ജനങ്ങളിലേക്ക് സന്ദേശം എത്തിക്കാൻ എൽ.ഡി.എഫ് കോടികൾ മുടക്കി പരസ്യം നൽകിയപ്പോൾ, പ്രതിപക്ഷം ‘പോറ്റിയെ കേറ്റിയ’ പാട്ടിലൂടെ കാര്യങ്ങൾ എളുപ്പത്തിൽ ജനങ്ങളിലെത്തിച്ചു. ഫലത്തിൽ, കോടികളുടെ പി.ആർ. തന്ത്രങ്ങൾ ‘ചെമ്പായി’, ഒരു നാടൻ പാട്ട് ‘സ്വർണ്ണ’മായി തിളങ്ങി! ഇത് പ്രാദേശിക തിരഞ്ഞെടുപ്പിലെ ഏറ്റവും വലിയ പ്രചാരണ വൈരുദ്ധ്യമായി മാറുകയും ചെയ്തു.
ഈ പാട്ടിന്റെ വിജയത്തെക്കുറിച്ച് പ്രതിപക്ഷമായ യു.ഡി.എഫിന്റെ നേതാക്കൾക്കിടയിൽ അഭിമാനമുണ്ട്. പത്രസമ്മേളനത്തിൽ മാധ്യമപ്രവർത്തകരുടെ ചോദ്യങ്ങൾക്ക് മറുപടി പറയവേ, കോൺഗ്രസ് എം.എൽ.എ. പി.സി. വിഷ്ണുനാഥ് ഈ പാട്ടിന്റെ വരികൾ പാടിക്കൊണ്ടാണ് വിഷയത്തെ സമീപിച്ചത്.
പാടിയ ശേഷം അദ്ദേഹം ഇങ്ങനെ കൂട്ടിച്ചേർത്തു:
”ഇത് യഥാർത്ഥത്തിൽ ഞങ്ങൾക്കറിയില്ല. എഴുതിയ ആളെ അറിയില്ല സംഗീതം ചെയ്ത ആളെ അറിയില്ല. പാടിയാളെ അറിയില്ല. പിന്നെ സോഷ്യൽ മീഡിയയിൽ ഒക്കെ ചില ആളുകളെ കണ്ടു. ഞങ്ങൾക്ക്, ഞങ്ങൾ ജനങ്ങളിലേക്ക് പറയാൻ പറഞ്ഞ കാര്യങ്ങളുടെ campaign ഒരു രൂപ ചെലവില്ലാതെ മറുവശത്ത് ഗവർമെന്റ് പി.ആർ. ഏജൻസികളെ കൊണ്ട് കോടിക്കണക്കിന് conclave, വീഡിയോ, പത്രപരസ്യം, ടീവി പരസ്യം, പിന്നെ ഉറുദു പത്രത്തിൽ വരെ പരസ്യം കൊടുത്തു. ഉറുദുക്കാര് വന്നു വോട്ട് ചെയ്യുമോ ഇടുക്കി ജില്ലാ പഞ്ചായത്തിലേക്ക്.
പാട്ടിന്റെ വരികൾ ഇങ്ങനെ :
പോറ്റിയെ കേറ്റിയെ സ്വർണ്ണം ചെമ്പായി മാറ്റിയെ സ്വർണ്ണപ്പാളികൾ മാറ്റിയെ ശാസ്താവിൻ ധനം ഊറ്റിയെ.സ്വർണം കട്ടവൻ ആരപ്പാ സഖാക്കളാണെ അയ്യപ്പ ലോഹം മാറ്റിയതാരപ്പ സഖാക്കളാണ് അയ്യപ്പ പോറ്റിയെ കേറ്റിയ സ്വർണം ചെമ്പായി മാറ്റിയെ സ്വർണ്ണ പാളികൾ മാറ്റിയെ ശാസ്താവിന് ധനം ഊറ്റിയെ. ആചാരങ്ങളെ ലംഘിക്കാനായി അമ്മിണിമാരെ മലകയറ്റി അകവും പുറവും കൊള്ളയടിക്കാൻ നിയമിച്ചുള്ളത് ഒരു പോറ്റി. പോറ്റിയെ കേറ്റിയ സ്വർണം ചെമ്പായി മാറ്റിയെ സ്വർണ്ണ പാളികൾ മാറ്റിയെ ശാസ്താവിന് ധനം ഊറ്റിയെ
