അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.”ഒരു തെറ്റ് ചെയ്തയാൾ അത് മറയ്ക്കാൻ വേണ്ടി നൂറു തെറ്റുകൾ ചെയ്തേക്കാം. എന്നാൽ ഒരു സത്യം അവർ പലപ്പോഴും വിസ്മരിക്കുന്നു: ഏത് കുറ്റകൃത്യവും ഒരുനാൾ മറനീക്കി പുറത്തുവരിക തന്നെ ചെയ്യും, ശിക്ഷയില്ലാതെ ആർക്കും ഒളിച്ചോടാൻ കഴിയില്ല. താൻ ചെയ്ത അപരാധം മറ്റുള്ളവർ അറിഞ്ഞാൽ ഉണ്ടാകുന്ന ഭയം കാരണം, അത് മറച്ചുവെക്കാൻ കൊലപാതകം പോലും ചെയ്യാൻ മടിക്കാത്തവരുടെ എണ്ണം നമ്മുടെ സമൂഹത്തിൽ വർധിച്ചു വരികയാണ്. തെറ്റ് മറയ്ക്കാൻ നടത്തിയ കൊലപാതകങ്ങളുടെ കഥകൾ നമുക്ക് ചുറ്റും ഏറെയുണ്ട്.
ശരിക്കും, ആ കൊലപാതകം കൊണ്ട് അവർ എന്താണ് നേടുന്നത്? ഒരു നിരപരാധിയുടെ ജീവനെടുക്കുന്നതിലൂടെ, തങ്ങളുടെ കുറ്റബോധത്തെ അവർ എന്നെന്നേക്കുമായി കൊലപ്പെടുത്തുകയാണോ?
അത്തരത്തിൽ, താൻ ചെയ്ത ഒരു രഹസ്യം പുറത്താകാതിരിക്കാൻ വേണ്ടി, ഒഡിഷയിലെ ഹരിപുരം ഗ്രാമത്തിലെ കുട്ടികൾക്ക് അക്ഷരം പകർന്നു നൽകിയ ഒരു യുവ അധ്യാപികയെ കൊലപ്പെടുത്തിയ സംഭവം. ആ ക്രൂരകൃത്യം ചെയ്തയാൾ മറ്റാരുമായിരുന്നില്ല; വർഷങ്ങളായി തന്നോട് പ്രണയമുണ്ടെന്നും വിവാഹം കഴിക്കാൻ താല്പര്യമുണ്ടെന്നും പറഞ്ഞ് പിന്നാലെ നടന്നിരുന്ന വ്യക്തി തന്നെയായിരുന്നു അത്. താൻ ഒരുപാട് കാലം ഇഷ്ടപ്പെട്ടിരുന്ന ഒരു വ്യക്തിയെ, തൻ്റെ തെറ്റ് പുറത്തറിയാതിരിക്കാൻ വേണ്ടി, ഏറ്റവും ഹീനമായ രീതിയിൽ ഇല്ലാതാക്കിയ ആ സംഭവം മനുഷ്യ മനസ്സിൽ ഭീതി നിറയ്ക്കുന്ന ഒരു ഓർമയായി മാറിയിരിക്കുകയാണ്.
ഒഡിഷയിലെ ഹരിപുരം ഗ്രാമം. സമയം ഏകദേശം ആറര. പതിവുപോലെ ആ ഗ്രാമം ഉണർന്ന് വരികയാണ്. എന്നാൽ, ആ ദിവസത്തെ പുലരിക്ക് ഒരു മരണത്തിന്റെ ഗന്ധമുണ്ടായിരുന്നു. ഗ്രാമത്തിലെ കർഷകരിലൊരാൾ പതിവുപോലെ തൻ്റെ കൃഷിയിടത്തിലേക്ക് നടന്നുപോകുമ്പോഴാണ് വഴിയരികിലെ കുറ്റിക്കാട്ടിൽ ഒരു കാഴ്ച കണ്ടത്.
അടുത്ത് ചെന്നു നോക്കിയ അയാൾ ഭയന്ന് വിറച്ചുപോയി. ചേതനയറ്റ ഒരു സ്ത്രീയുടെ മൃതദേഹം! മുഖം തിരിച്ചറിയാൻ കഴിയാത്തവിധം തകർക്കപ്പെട്ടിരിക്കുന്നു, കണ്ണുകൾ പുറത്തേക്ക് തള്ളിനിൽക്കുന്നു. ഭയം കൊണ്ട് ആ കർഷകൻ നിലവിളിച്ചു പോലീസും നാട്ടുകാരും ഓടിക്കൂടി. പോലീസ് നടത്തിയ അന്വേഷണത്തിൽ ഒടുവിൽ ആ സത്യം അവർ തിരിച്ചറിഞ്ഞു; അത് ജ്യോതി ദഗൂട്ടി ആയിരുന്നു എന്ന് – അവരുടെയെല്ലാം പ്രിയപ്പെട്ട അഞ്ജലി ടീച്ചർ.
ഈ കൊലപാതകം നടക്കുന്നത് തലേ ദിവസം ആയിരുന്നു. 28 വയസ്സുള്ള അഞ്ജലി, എന്നും വീട്ടിൽ നിന്ന് ഏകദേശം 5 കിലോമീറ്റർ അകലെയുള്ള സ്വകാര്യ സ്കൂളിലേക്ക് നടന്നു പോകുന്ന അധ്യാപികയായിരുന്നു. ജനുവരി 3-ാം തീയതി രാവിലെ 8:30-ന് അഞ്ജലി പതിവുപോലെ സ്കൂളിലേക്ക് ഇറങ്ങി. ‘വൈകുന്നേരം വരാം’ എന്ന് മാതാപിതാക്കളോട് പറഞ്ഞ് വാത്സല്യത്തോടെ യാത്ര പറഞ്ഞ മകൾ തിരിച്ചെത്തിയില്ല.
ആറരയും ഏഴരയും കഴിഞ്ഞിട്ടും മകളെ കാണാതായപ്പോൾ ആ അച്ഛൻ വെപ്രാളമായി. അങ്ങനെ സ്കൂളിൽ ചെന്ന് അന്വേഷിച്ചപ്പോൾ അഞ്ജലി നാലരയ്ക്ക് തന്നെ സ്കൂളിൽ നിന്ന് ഇറങ്ങിയിരുന്നു എന്ന് സഹപ്രവർത്തകർ പറഞ്ഞു. മകൾക്ക് എന്ത് സംഭവിച്ചു എന്നറിയാതെ പരിഭ്രാന്തനായി ആ അച്ഛൻ രാത്രി മുഴുവൻ കണ്ണീരോടെ കാത്തിരുന്നു. ഒടുവിൽ പിറ്റേന്ന് രാവിലെയാണ് ആ ദുരന്തവാർത്ത അച്ഛനെ തേടിയെത്തിയത്.
സംഭവം നാടാകെ ചർച്ചയായി. മാധ്യമങ്ങൾ വാർത്ത ഏറ്റെടുത്തു. കൊലപാതകം നടന്നിട്ട് ഒരാഴ്ച കഴിഞ്ഞിട്ടും പ്രതിയെക്കുറിച്ച് സൂചനയൊന്നും പോലീസിന് ലഭിച്ചില്ല. പോലീസിന് മേൽ വലിയ സമ്മർദ്ദമുണ്ടായി. സ്കൂളിലേക്കുള്ള വഴിയിലെ സ്ഥിരം യാത്രക്കാരെയും അയൽവാസികളെയും ചോദ്യം ചെയ്യുന്നതിനിടയിലാണ് പോലീസിന് ‘സോനു’ എന്ന ചെറുപ്പക്കാരനെക്കുറിച്ച് വിവരം ലഭിക്കുന്നത്.
27 വയസ്സുകാരനായ സോനു. അഞ്ജലിയുടെ സഹോദരിയുടെ ഗ്രാമത്തിൽ താമസിച്ചിരുന്ന വ്യക്തിയാണ്. അവൻ അഞ്ജലിയുമായി സൗഹൃദത്തിലായിരുന്നു. പോലീസ് അവനെ വിളിപ്പിച്ചു ചോദ്യം ചെയ്യിച്ചു. എന്നാൽ അവൻ ഒന്നുമറിയില്ല എന്ന ഉത്തരം തന്നു.എന്നാൽ പോലീസിനെ സംശയം തോന്നിച്ചത് അവൻ്റെ ഫോൺ സ്വിച്ച് ഓഫ് ആയതും സിം കാർഡ് മാറ്റിയതുമാണ്. ഒടുവിൽ ശാസ്ത്രീയമായ ചോദ്യം ചെയ്യലിൽ അവൻ കുറ്റം സമ്മതിച്ചു.
സോനുവിന് അഞ്ജലിയോട് പ്രണയമായിരുന്നു. പലതവണ അവൻ അത് തുറന്നു പറഞ്ഞിരുന്നെങ്കിലും, വീട്ടുകാരുടെ സാഹചര്യം കൊണ്ടും, തനിക്ക് താൽപ്പര്യമില്ലാത്തതുകൊണ്ടും അഞ്ജലി അത് നിരസിച്ചിരുന്നു. ഈ പ്രണയനിരാസം സോനുവിൽ പകയായി കനൽപോലെ എരിഞ്ഞു.
എന്നാൽ, കൊലപാതകത്തിന് പെട്ടെന്നുണ്ടായ പ്രകോപനം മറ്റൊന്നായിരുന്നു. സംഭവദിവസം, ജനുവരി 3-ന്, അഞ്ജലി സ്കൂളിലേക്ക് പോകുന്ന വഴിയിലെ കുറ്റിക്കാട്ടിൽ വെച്ച് സോനുവിനെ കണ്ടു. അവൻ തനിച്ചായിരുന്നില്ല, പത്താം ക്ലാസ്സിൽ പഠിക്കുന്ന ഒരു പെൺകുട്ടിയും അവനൊപ്പം ഉണ്ടായിരുന്നു. അരുതാത്ത സാഹചര്യത്തിൽ അവരെ കണ്ട അഞ്ജലി ടീച്ചർ ദേഷ്യപ്പെട്ടു. “ഇത് ഞാൻ നിന്റെ വീട്ടിൽ പറയും” എന്ന് അഞ്ജലി ഭീഷണിപ്പെടുത്തി.
ആ വാക്കുകൾ സോനുവിനെ ഭയപ്പെടുത്തി. തൻ്റെ രഹസ്യം പുറത്താകുമെന്ന ഭയം അവനെ ഒരു കൊലയാളിയാക്കി മാറ്റി. വൈകുന്നേരം അഞ്ജലി തിരികെ വരുന്നതും കാത്ത് അവൻ വഴിയിൽ ഒളിച്ചിരുന്നു. വിജനമായ ആ സ്ഥലത്തെത്തിയപ്പോൾ, പിന്നിലൂടെ ചെന്ന് കയ്യിൽ കരുതിയ കരിങ്കല്ല് കൊണ്ട് അവൻ അഞ്ജലിയുടെ തലയ്ക്കടിച്ചു.
ബോധരഹിതയായി വീണ ടീച്ചറെ അവൻ കുറ്റിക്കാട്ടിലേക്ക് വലിച്ചിഴച്ചു കൊണ്ടുപോയി. ആരും തിരിച്ചറിയാതിരിക്കാൻ കല്ലുകൊണ്ട് മുഖം ഇടിച്ചു വികൃതമാക്കി. ഒരു ഗ്രാമത്തിന് അക്ഷരം പകർന്നു നൽകിയ ആ അധ്യാപികയുടെ ജീവൻ അവിടെ അവസാനിച്ചു. കൃത്യത്തിന് ശേഷം രക്തം പുരണ്ട വസ്ത്രങ്ങൾ മാറ്റി, ബാഗിൽ വെച്ച് അവൻ മീററ്റിലേക്ക് രക്ഷപ്പെട്ടു.
പ്രണയനിരാശയും, തൻ്റെ തെറ്റ് പുറത്തറിയുമെന്ന ഭയവുമാണ് സോനുവെന്ന കാമുകനെ ക്രൂരനായ കൊലയാളിയാക്കി മാറ്റിയത്. ഒടുവിൽ നിയമത്തിൻ്റെ കരങ്ങളിൽ അവൻ അകപ്പെട്ടപ്പോൾ, ബാക്കിയായത് ഹരിപുരം ഗ്രാമത്തിന്റെ തീരാത്ത നൊമ്പരവും അഞ്ജലിയെന്ന പേരുമാത്രമാണ്.
ഇവിടെ ഉയരുന്ന ചോദ്യം ഒന്നുമാത്രം: ഒരു തെറ്റ് മറയ്ക്കാൻ നടത്തിയ ഈ കൊലപാതകം കൊണ്ട് സോനുവിന് എന്ത് നേടാൻ കഴിഞ്ഞു? ശിക്ഷിക്കപ്പെടാതെ അയാൾക്ക് രക്ഷപ്പെടാൻ സാധിച്ചോ? ഇല്ല. കുറ്റം എന്നും മറനീക്കി പുറത്തുവരിക തന്നെ ചെയ്യും
