അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.റഷ്യയിൽ നിന്നുള്ള എണ്ണ ഇറക്കുമതി ഇന്ത്യ അവസാനിപ്പിക്കുമെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ നടത്തിയ പ്രസ്താവനയെ തള്ളി വിദേശകാര്യമന്ത്രി എസ്. ജയശങ്കർ രംഗത്തെത്തി. മ്യൂണിക് സുരക്ഷാ സമ്മേളനത്തിൽ സംസാരിക്കവേ, ഇന്ത്യയുടെ തന്ത്രപരമായ സ്വയംഭരണത്തിൽ യാതൊരുവിധ വിട്ടുവീഴ്ചയുമില്ലെന്ന് അദ്ദേഹം അസന്നിഗ്ദ്ധമായി വ്യക്തമാക്കി. പുറത്തുനിന്നുള്ള സമ്മർദ്ദങ്ങൾക്കനുസരിച്ചല്ല, മറിച്ച് സ്വന്തം താൽപ്പര്യങ്ങൾക്കനുസരിച്ചാണ് ഇന്ത്യ തീരുമാനമെടുക്കുകയെന്നും അദ്ദേഹം കൂട്ടിച്ചേർത്തു.
റഷ്യൻ ഊർജ്ജ മേഖലയ്ക്കെതിരെ അമേരിക്ക പുതിയ ഉപരോധങ്ങൾ കർശനമാക്കിയ പശ്ചാത്തലത്തിലാണ് റൂബിയോയുടെ പരാമർശം വന്നത്. ഇന്ത്യ റഷ്യയെ കൈവിടുമെന്നും പകരം അമേരിക്കയിൽ നിന്ന് കൂടുതൽ എണ്ണ വാങ്ങുമെന്നും നേരത്തെ പ്രസിഡന്റ് ഡൊണാൾഡ് ട്രംപും അവകാശപ്പെട്ടിരുന്നു. എന്നാൽ, ഇത്തരം വാദങ്ങളിൽ യാഥാർത്ഥ്യമില്ലെന്നും ഇന്ത്യയുടെ വിദേശനയം സ്വതന്ത്രമാണെന്നും ജയശങ്കർ മറുപടി നൽകി.
എണ്ണ ഇറക്കുമതി എന്നത് കേവലം ഒരു രാഷ്ട്രീയ തീരുമാനമല്ലെന്നും മറിച്ച് വിപണിയിലെ സാഹചര്യങ്ങളെ അടിസ്ഥാനമാക്കിയുള്ള ഒന്നാണെന്നും അദ്ദേഹം വിശദീകരിച്ചു. എണ്ണയുടെ ലഭ്യത, അന്താരാഷ്ട്ര വിപണിയിലെ വില, ഗതാഗത ചെലവ് തുടങ്ങിയ സാങ്കേതിക വശങ്ങൾ പരിശോധിച്ചാണ് രാജ്യത്തെ എണ്ണക്കമ്പനികൾ തീരുമാനമെടുക്കുന്നത്. ജനങ്ങളുടെ ക്ഷേമത്തിനും രാജ്യത്തിന്റെ സാമ്പത്തിക ഭദ്രതയ്ക്കുമാണ് സർക്കാർ മുൻഗണന നൽകുന്നതെന്നും അദ്ദേഹം ഓർമ്മിപ്പിച്ചു.
