ചൂടുകുരു കൊണ്ട് ബുദ്ധിമുട്ടുന്നവരാണോ ? മാറാൻ ഇതാ ചില കിടിലൻ ടിപ്സ്……

വേനൽക്കാലത്ത് മിക്കയാളുകളെയും നേരിടുന്ന ഒരു പ്രധാന ചർമപ്രശ്നമാണ് ചൂടുകുരു അഥവാ മിലിയാരിയ. ശരീരത്തിലെ വിയർപ്പ് ഗ്രന്ഥികളുടെ നാളികൾ അടഞ്ഞുപോകുകയും, വിയർപ്പ് പുറത്തേക്ക് വരാൻ കഴിയാതെ ചർമത്തിനടിയിൽ കെട്ടിക്കിടക്കുകയും ചെയ്യുന്നതാണ് ചൂടുകുരുവായി പൊങ്ങുന്നത്.

ഇത് ചർമത്തിൽ ചെറിയ ചുവന്ന കുരുക്കൾ ഉണ്ടാകുന്നതിനും കഠിനമായ ചൊറിച്ചിലിനും ‘പ്രിക്കിളി ഹീറ്റ്’ എന്ന് വിളിക്കപ്പെടുന്ന കുത്തുന്നതുപോലെയുള്ള വേദനയ്ക്കും കാരണമാകുന്നു. മുൻകരുതലുകൾ സ്വീകരിക്കുന്നതും ലളിതമായ പ്രതിരോധ മാർ​ഗങ്ങളിലൂടെയും ചൂടുകുരു നിയന്ത്രിക്കാൻ സാധിക്കും.

ചൂടുകുരുവിനുള്ള ഏറ്റവും പ്രഥമശുശ്രൂഷ ചർമത്തിന്റെ താപനില കുറയ്ക്കുക എന്നതാണ്. തണുത്ത വെള്ളത്തിൽ കുളിക്കുന്നത് നല്ലതാണ്. കുളിക്കുമ്പോൾ ചർമത്തിലെ സുഷിരങ്ങൾ അടയ്ക്കാൻ സാധ്യതയുള്ള കഠിനമായ സോപ്പുകളോ മണമുള്ള ലോഷനുകളോ ഒഴിവാക്കി, വീര്യം കുറഞ്ഞ ക്ലെൻസറുകൾ ഉപയോ​ഗിക്കാൻ ശ്രദ്ധിക്കണം.

കുളി കഴിഞ്ഞ് തോർത്ത് അല്ലെങ്കിൽ ടവൽ ഉപയോ​ഗിച്ച് ചർമം ശക്തിയായി തുടയ്ക്കുന്നതിന് പകരം, വെള്ളം ഒപ്പിയെടുക്കുന്നതാണ് ഉചിതം. വൈദ്യശാസ്ത്രപരമായി അംഗീകരിക്കപ്പെട്ട ചില ലേപനങ്ങൾ ചൂടുകുരുവിൽ നിന്ന് പെട്ടെന്ന് ആശ്വാസം നൽകും. കലാമൈൻ ലോഷൻ ഇതിൽ പ്രധാനമാണ്. ഇത് ചർമത്തിന് തണുപ്പ് നൽകുകയും ചൊറിച്ചിൽ കുറയ്ക്കുകയും ചെയ്യുന്നു.

കഠിനമായ ചൊറിച്ചിലും വീക്കവുമുള്ള സാഹചര്യങ്ങളിൽ ഡോക്ടറുടെ നിർദേശപ്രകാരം ഹൈഡ്രോകോർട്ടിസോൺ (Hydrocortisone) അടങ്ങിയ ക്രീമുകൾ ഉപയോഗിക്കാവുന്നതാണ്. എന്നാൽ ഇത്തരം സ്റ്റിറോയിഡ് ക്രീമുകൾ മുഖത്ത് ഉപയോഗിക്കുമ്പോൾ ജാഗ്രത പാലിക്കണം. കൂടാതെ, വിയർപ്പ് ആഗിരണം ചെയ്യാനും ചർമം വരണ്ടതാക്കി നിലനിർത്താനും പ്രിക്കിളി ഹീറ്റ് പൗഡറുകൾ സഹായിക്കുമെങ്കിലും, അവ അമിതമായി ഉപയോഗിക്കുന്നത് സുഷിരങ്ങൾ വീണ്ടും അടയാൻ കാരണമായേക്കാം.

ചർമം ശ്വസിക്കാൻ അനുവദിക്കുന്ന തരത്തിലുള്ള വസ്ത്രധാരണം ചൂടുകുരു തടയാൻ സഹായിക്കും. സിന്തറ്റിക് വസ്ത്രങ്ങൾ ഒഴിവാക്കി വിയർപ്പ് ആഗിരണം ചെയ്യുന്ന കോട്ടൺ വസ്ത്രങ്ങൾ ധരിക്കുന്നത് വിയർപ്പ് ഗ്രന്ഥികളിലെ സമ്മർദം കുറയ്ക്കും. വീടിനുള്ളിൽ കഴിയുന്നത്ര വായുസഞ്ചാരമുള്ള അന്തരീക്ഷം ഉറപ്പാക്കുകയോ എയർ കണ്ടീഷണർ, ഫാൻ എന്നിവ ഉപയോഗിച്ച് ശരീരം വിയർക്കുന്നത് കുറയ്ക്കുകയോ ചെയ്യുന്നത് രോഗം വർധിക്കാതെ നോക്കാൻ സഹായിക്കും. അമിതമായ വ്യായാമവും ചൂടുള്ള സമയത്തുള്ള പുറംജോലികളും ഈ അവസ്ഥയിൽ ഒഴിവാക്കേണ്ടതാണ്.

ഭക്ഷണക്രമത്തിൽ ശരീരത്തിലെ ജലാംശം നിലനിർത്തുന്നത് ചൂടുകുരു പ്രതിരോധിക്കാൻ സഹായിക്കുമെങ്കിലും, ഇത് നേരിട്ട് ചർമത്തിലെ കുരുക്കൾ മാറ്റില്ല. അതിനാൽ ബാഹ്യമായ പരിചരണത്തിനാണ് മുൻഗണന നൽകേണ്ടത്. ചൂടുകുരു ബാധിച്ച ഭാഗം ചൊറിഞ്ഞു പൊട്ടിക്കുന്നത് ഒഴിവാക്കണം. ഇത് ബാക്ടീരിയൽ അണുബാധയ്ക്ക് കാരണമായേക്കാം. കുരുക്കളിൽ പഴുപ്പോ കഠിനമായ വേദനയോ അനുഭവപ്പെടുകയാണെങ്കിൽ ഒരു ഡെർമറ്റോളജിസ്റ്റിനെ കാണേണ്ടത് അത്യന്താപേക്ഷിതമാണ്.