അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഇടതുപക്ഷ സര്ക്കാരിന്റെ പത്തുവര്ഷം ഭരണ നേട്ടം കൊണ്ടും വികസന മാതൃകകള് കൊണ്ടും വലിയ മുന്നേറ്റമാണ് കേരളം നടത്തിയതെന്ന വ്യാജ പ്രചാരണങ്ങള് മാത്രമായിരുന്നുവെന്ന് സര്ക്കാരിന്റെ ഭാഗമായിരുന്ന ഐ.എ.എസ് ഉദ്യോഗസ്ഥന് ബി. അശോകിന്റെ വെളിപ്പെടുത്തല് ഞെട്ടിക്കുന്നു. വികസനമെന്നും, നേട്ടമെന്നും പറയുകയും ഉയര്ത്തിക്കാട്ടുകയും പ്രതിപക്ഷത്തെ വെല്ലുവിളിക്കുകയും ചെയ്ത സര്ക്കാരിന്റെ എല്ലാ പരിപാടികളും പദ്ധതികളും പൊള്ളയും തട്ടിപ്പുമായിരുന്നു എന്നാണ് സസ്പെന്ഷനിലായ അശോക് പറയുന്നത്. കഴിഞ്ഞ പത്തു വര്ഷവും സര്ക്കാരിന്റെ ഭാഗമായിരിക്കുകയും, സര്ക്കാര് പദ്ധതികള് നടപ്പാക്കുകയും ചെയ്ത ഐ.എ.എസ്.ഉദ്യോഗസ്ഥന്റെ വെളിപ്പെടുത്തലുകള് വെളിവാക്കുന്നത് ഇടതുപക്ഷത്തിന്റെ കപടപക്ഷത്തെയാണ്.
കിഫ്ബി പദ്ധതികള്, കടമെടുപ്പ്, ദുരന്തങ്ങളിലെ ഫണ്ട് ചെലവാക്കല്, ഊരാളുങ്കലുമായുള്ള ഇടപാട്, മുണ്ടക്കൈ ടൗണ്ഷിപ്പ് തുടങ്ങിയവയില് നടന്നിട്ടുള്ള കൈയ്യിട്ടു വരാല് തൊട്ട്, അടിച്ചുമാറ്റല് വരെ അശോഖ് എണ്ണിയെണ്ണി മാധ്യമങ്ങള്ക്കു മുമ്പില് പറയുകയാണ്. ഓരോ ദിവസവും അശോകിന്റെ വായ്മെഴികള് സര്ക്കാരിന്റെ ശവപ്പെട്ടിയില് അടിക്കുന്ന ആണികളായി തീരുന്നു. ഇതിനെ പ്രതിരോധിക്കാന് മാര്ഗങ്ങളില്ലാതെ നിശ്ചലമായിരിക്കുകയാണ് സര്ക്കരും സി.പി.എമ്മും. പിണറായി വിജയനെന്ന പരാജയപ്പെട്ട മുഖ്യമന്ത്രിയെ താന് ഇതുവരെ കണ്ടിട്ടില്ലെന്നാണ് അശോക് പറയുന്നത്. മാധ്യമങ്ങളിലൂടെയും സോഷ്യല് മീഡിയയിലൂടെയും മുഖ്യമന്ത്രി പിണറായി വിജയനും അദ്ദേഹത്തിന്റെ വിശ്വസ്തരായ ഉദ്യോഗസ്ഥ വൃന്ദത്തിനുമെതിരെ അശോക് നടത്തുന്ന വെളിപ്പെടുത്തലുകള് രണ്ടാം പിണറായി സര്ക്കാരിന്റെ ശവപ്പെട്ടിയിലെ അവസാന ആണിയാകുമോ എന്നാണ് രാഷ്ട്രീയ കേന്ദ്രങ്ങള് ഉറ്റുനോക്കുന്നത്.
സര്വീസില് നിന്ന് സസ്പെന്ഡ് ചെയ്യപ്പെട്ടിട്ടും ഒരടി പോലും പിന്നോട്ടില്ലെന്ന നിലപാടില് അശോക് ആഞ്ഞടിക്കുമ്പോള് മറുപടി പറയാനാകാതെ സിപിഎം നേതൃത്വവും സര്ക്കാരും വിയര്ക്കുകയാണ്. ഇത്രയും ക്രൂരവും ജനങ്ങളോട് നിസംഗതയും പുലര്ത്തുന്ന ഒരു ഭരണം തന്റെ സര്വീസ് കാലയളവില് കണ്ടിട്ടില്ലെന്നാണ് അശോക് തുറന്നടിക്കുന്നത്. മുഖ്യമന്ത്രിയുടെ നയമാറ്റങ്ങളും വഴിവിട്ട കൂട്ടുകെട്ടുകളുമാണ് സര്ക്കാരിനെ ഈ ഗതിയിലാക്കിയത്. നവകേരള സദസ്സും മയക്കുമരുന്ന് മാഫിയയും, ശബരിമലയിലെ ‘സ്വര്ണ്ണക്കൊള്ള, കിഫ്ബി പരസ്യം തുടങ്ങിയവയാണ് പ്രധാന തട്ടിപ്പുകള്. ആരോഗ്യവകുപ്പില് 40,000 കോടി രൂപ കുടിശിക ഉള്ളപ്പോഴാണ് കോടികള് ധൂര്ത്തടിച്ച് നവകേരള സദസ്സ് നടത്തിയത്. മന്ത്രിമാര്ക്ക് ഭക്ഷണം നല്കാന് പോലും മയക്കുമരുന്ന് മാഫിയയുടെ പണം ഉപയോഗിച്ചുവെന്ന അശോകിന്റെ ആരോപണം പിണറായി സര്ക്കാരിനെ പ്രതിക്കൂട്ടിലാക്കുന്നതാണ്.
ഭൂരിപക്ഷ വോട്ടുകള് ലക്ഷ്യമിട്ട് അയ്യപ്പ സംഗമം നടത്തിയ സര്ക്കാര്, ശബരിമലയിലെ സ്വര്ണ്ണക്കൊള്ളയിലൂടെ വിശ്വാസികളെ വഞ്ചിച്ചുവെന്നും ഇതിന് മാപ്പില്ലെന്നും അദ്ദേഹം കുറ്റപ്പെടുത്തുന്നു. ഉളുപ്പില്ലാത്ത സര്ക്കാര് ഖജനാവിലെ കോടികള് മുടിച്ച് കിഫ്ബിക്ക് വേണ്ടി പരസ്യം നല്കുകയാണെന്നും അദ്ദേഹം പരിഹസിച്ചു. നാലാം തീയതി വോട്ടെണ്ണല് കഴിയുന്നതോടെ ഇടതുമുന്നണിയില് വന് പൊട്ടിത്തെറി ഉണ്ടാകുമെന്നും സര്ക്കാര് മാറാന് മണിക്കൂറുകള് മാത്രമേ ബാക്കിയുള്ളൂവെന്നും അശോക് പ്രവചിക്കുന്നു. ഭരണം കൂടി പോയാല് പിണറായി വിജയനും സിപിഎമ്മിനും വരുംകാലം അത്ര ശുഭകരമാകില്ലെന്ന സൂചനയാണ് അശോകിന്റെ വാക്കുകള് നല്കുന്നത്. നിയമനടപടികള്ക്ക് കാത്തുനില്ക്കാതെ ജനകീയ കോടതിയില് സര്ക്കാരിനെ വിചാരണ ചെയ്യാനാണ് അദ്ദേഹത്തിന്റെ തീരുമാനം.
സസ്പെന്ഷന് ഉത്തരവ് പുറത്തുവന്നതിന് പിന്നാലെ മുഖ്യമന്ത്രിയെയും ചീഫ് പ്രിന്സിപ്പല് സെക്രട്ടറി കെ.എം. എബ്രഹാം അടക്കമുള്ള ഉന്നതരെയും പേരെടുത്ത് വിമര്ശിച്ചിട്ടും ഒരു സിപിഎം നേതാവോ മന്ത്രിയോ വാ തുറക്കാന് ധൈര്യപ്പെടുന്നില്ല. എല്ഡിഎഫ് കണ്വീനര് ടി.പി. രാമകൃഷ്ണനും കൃഷിമന്ത്രി പി. പ്രസാദും നിലവില് ‘മൗനിബാബ’മാരായി തുടരുകയാണ്. അശോകിന്റെ വെളിപ്പെടുത്തലുകള് വരാനിരിക്കുന്ന പുതിയ സര്ക്കാരിന് പിണറായിക്കെതിരെയുള്ള കൃത്യമായ ‘തുറുപ്പുചീട്ടാകുമെന്ന്’ രാഷ്ട്രീയ നിരീക്ഷകര് വിലയിരുത്തുന്നു. സെക്രട്ടേറിയറ്റിലെ ഫയലുകള്ക്കുള്ളിലെ രഹസ്യങ്ങള് അറിയാവുന്ന ഒരു ഐഎഎസ് ഉദ്യോഗസ്ഥന് തന്നെ സര്ക്കാരിനെതിരെ തെരുവിലിറങ്ങുന്നത് പിണറായി വിജയന്റെ രാഷ്ട്രീയ ജീവിതത്തിലെ ഏറ്റവും വലിയ വെല്ലുവിളിയായി മാറിക്കഴിഞ്ഞിട്ടുണ്ട്.
തിങ്കളാഴ്ച ആര്ക്കാണ് നറുക്കു വീഴുന്നത് എന്നുമാത്രം കണ്ടാല് മതിയാകും. കനല് ഒരു തരി മതി, എല്.ഡി.എഫ് വരും എല്ലാം ശരിയാകും, എല്.ഡി.എഫ് അല്ലാതെ മറ്റാരുണ്ട്, തുടരും തുടങ്ങിയ ആപ്തവാക്യങ്ങള് ചുട്ടെടുത്ത് ജനങ്ങള്ക്കു നല്കി പറ്റിച്ച സര്ക്കാരിനും ഇടതു മുന്നണിക്കും തിരിച്ചടിയാകുമോ എന്നതാണ് അറിയേണ്ടത്. വീണ്ടും ഭരണം കിട്ടണം എന്നാഗ്രഹിക്കുന്നതു പോലും, നിലവില് കാട്ടിക്കൂട്ടിയ തെറ്റുകളൊന്നും പുറത്തു വരാതിരിക്കാനും, അതിനേക്കാള് വലിയ തെറ്റുകള് ചെയ്യാനും വേണ്ടിയാണ് എന്നേ മനസ്സിലാക്കാന് കഴിയൂ. കാരണം, ഇതുവരെ ചെയ്തതെല്ലാം തട്ടിപ്പാണെന്ന് സര്ക്കാരിനു വേണ്ടി പണിയെടുത്ത ഉദ്യോഗസ്ഥന് തന്നെ തുറന്നു പറഞ്ഞിരിക്കുകയാണ്.
