അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പ്രതിപക്ഷ ഉപനേതൃ പദവിയുമായി ബന്ധപ്പെട്ട ജനയുഗത്തിലെ ലേഖനം ശ്രദ്ധയില്പ്പെട്ടതായി മുന് മന്ത്രിയും സിപിഎം നേതാവുമായ വി. ശിവന്കുട്ടി. ഇതൊരു പിടിവാശി മാത്രമാണെന്നും പ്രതിപക്ഷ നേതാവ് പിണറായി വിജയന് സ്വീകരിച്ച നിലപാട് ജനാധിപത്യപരമാണെന്നും ശിവന്കുട്ടി പറഞ്ഞു.
പ്രായോഗിക രാഷ്ട്രീയ സാഹചര്യം വെച്ചുകൊണ്ടാണ് ഇങ്ങനെയൊരു തീരുമാനം കൈക്കൊണ്ടത്. എന്നാല് ജനയുഗത്തില് പ്രസിദ്ധീകരിച്ച ലേഖനത്തിലൂടെ സിപിഐയും സത്യന് മൊകേരിയും രാഷ്ട്രീയ മര്യാദ ലംഘിച്ചു. പ്രതിപക്ഷ നേതാവിനെ സിപിഐ അപമാനിച്ചുവെന്നും ശിവന്കുട്ടി പ്രതികരിച്ചു.
മുന്നണിയിലെ വിഷയങ്ങള് പത്രങ്ങളില് ചര്ച്ച ചെയ്യുന്നത് ശരിയല്ല. ഉപനേതാവ് പദവി ലഭിക്കാത്തതില് സിപിഐ നടത്തുന്നത് അടിസ്ഥാനരഹിതമായ നീക്കമാണ്. ഇത്തരം അഭിപ്രായപ്രകടനം രാഷ്ട്രീയ മര്യാദക്ക് യോജിച്ചതല്ല. നിയമസഭാ ഉപനേതൃ സ്ഥാനം നേരത്തെ മുതല് വഹിക്കുന്നത് സിപിഎമ്മാണ്. സിപിഐക്ക് ഉള്ള മന്ത്രിസ്ഥാനം വേറെ ആര്ക്കെങ്കിലും കൊടുക്കാന് പറ്റുമോ? മുന്നണി നിയമങ്ങള് പാലിച്ചുകൊണ്ടുള്ള കാര്യമാണ് പിണറായി വിജയന് പറഞ്ഞതെന്നും ശിവന്കുട്ടി ചൂണ്ടിക്കാട്ടി.
സിപിഐയില് മുന്നണി വിപുലീകരണത്തിനുള്ള താത്പര്യം കാണുന്നില്ലെന്നും ശിവന്കുട്ടി പറയുന്നു. പിണറായി വിജയനെ വ്യക്തിപരമായി ലക്ഷ്യം വച്ചുകൊണ്ടുള്ള നീക്കമാണ് ഇപ്പോള് നടക്കുന്നത്. മുന്നണിയില് ചര്ച്ച ചെയ്യേണ്ട വിഷയങ്ങള് പത്രങ്ങളിലൂടെ അല്ല പറയേണ്ടത്. പിഎം ശ്രീ വിഷയത്തിലും പ്രശ്നം വഷളാക്കിയത് സിപിഐയാണ്. സിപിഐ ഇപ്പോള് അധികാരത്തിന് വേണ്ടി ആശയം മാറ്റുന്ന സ്ഥിതിയിലായി.
ജനയുഗത്തിലെ ലേഖനം കൂട്ടായി ആലോചിച്ച് തയ്യാറാക്കിയതാണെന്നും അല്ലെന്ന് ആണെങ്കില് നേതാക്കള് മറുപടി പറയാന് തയ്യാറാകണമെന്നും ശിവന്കുട്ടി ആവശ്യപ്പെട്ടു. അതേസമയം പിണറായി വിജയനെതിരെ മുന് മന്ത്രിയും സിപിഐ നേതാവുമായ പി. പ്രസാദും രംഗത്തെത്തി. ഉപനേതൃ പദവിയില് ഏകപക്ഷീയമായി ഒരാള്ക്കും തീരുമാനമെടുക്കാന് കഴിയില്ല. മുതിര്ന്ന നേതാക്കള് മുന്നണി മര്യാദ ലംഘിച്ചു.
തീരുമാനങ്ങള് മുന്നണിയില് ആലോചിക്കണം. ഏറ്റവും കൂടുതല് വിട്ടുവീഴ്ച ചെയ്ത പാര്ട്ടിയാണ് സിപിഐ. മുന്നണിയില് കെട്ടുറപ്പ് ഉറപ്പുവരുത്തണം. രാഷ്ട്രീയ പാര്ട്ടികള്ക്ക് ലഭിക്കേണ്ട പരിഗണനയാണ് സിപിഐ ആവശ്യപ്പെടുന്നതെന്നും പി. പ്രസാദ് പറഞ്ഞു.
ഉപനേതൃപദവിക്ക് സിപിഐക്ക് അര്ഹതയുണ്ട്. ഘടകക്ഷിയുടെ ആവശ്യങ്ങള് വാര്ത്താസമ്മേളനത്തില് തള്ളിപ്പറയുന്നത് മുന്നണിയുടെ കെട്ടുറപ്പിനെ ബാധിക്കും. പ്രതിപക്ഷത്തിന്റെ പരാജയമെന്ന യുഡിഎഫിന്റെ ആരോപണം ഭരണ പരാജയം മറച്ചുവെക്കാനുള്ള തന്ത്രമാണെന്നും തങ്ങളുടെ ഗുരുതര പോരായ്മകള് മറച്ചുവെക്കാനാണ് അവര് ശ്രമിക്കുന്നതെന്നും പി. പ്രസാദ് ചൂണ്ടിക്കാട്ടി.
