അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ദക്ഷിണ റെയിൽവേയിൽ വിവിധ ട്രേഡുകളിലായി അപ്രന്റീസ് ഒഴിവുകളിലേക്ക് അപേക്ഷ ക്ഷണിച്ചു. അപ്രന്റീസ് ആക്ടിന്റെ ഭാഗമായി ഓൺലൈനായാണ് ഉദ്യോഗാർത്ഥികൾ അപേക്ഷ സമർപ്പിക്കേണ്ടത്. വിവിധ ഡിവിഷനുകൾ, വർക്ക്ഷോപ്പുകൾ, യൂണിറ്റുകൾ എന്നിവയുടെ കീഴിലായി ആകെ 4,471 പരിശീലന സ്ലോട്ടുകളാണ് വിജ്ഞാപനം ചെയ്തിട്ടുള്ളത്. ഇതിൽ 163 എണ്ണം പുതുമുഖങ്ങൾക്കും (ഫ്രഷേഴ്സ്), 4,308 എണ്ണം മുൻ ഐ.ടി.ഐ ഉദ്യോഗാർത്ഥികൾക്കുമായാണ് മാറ്റിവെച്ചിരിക്കുന്നത്. ഔദ്യോഗിക വിജ്ഞാപനപ്രകാരം യോഗ്യതയുള്ള ഉദ്യോഗാർത്ഥികൾക്ക് സെപ്റ്റംബർ 27-ന് വൈകുന്നേരം 5 മണി വരെ അപേക്ഷിക്കാൻ അവസരമുണ്ട്. അപേക്ഷിക്കുന്നവർ നിശ്ചിത വിദ്യാഭ്യാസ യോഗ്യതയും പ്രായപരിധിയും പാലിക്കേണ്ടതാണ്. ഈ നിയമനം സ്ഥിര ജോലിക്കുള്ളതല്ലെന്നും പൂർണ്ണമായും അപ്രന്റീഷിപ്പ് പരിശീലനത്തിനുള്ളതാണെന്നും ഉദ്യോഗാർത്ഥികൾ പ്രത്യേകം ശ്രദ്ധിക്കണം.
തിരഞ്ഞെടുക്കപ്പെടുന്നവർക്ക് വിഭാഗം അനുസരിച്ച് പ്രതിമാസ സ്റ്റൈപ്പൻഡ് ലഭിക്കും. ഫ്രഷർ (പത്താം ക്ലാസ്) വിഭാഗക്കാർക്ക് 8,200 രൂപയും, ഫ്രഷർ (പന്ത്രണ്ടാം ക്ലാസ്) വിഭാഗക്കാർക്ക് 9,600 രൂപയുമാണ് സ്റ്റൈപ്പന്റ്. എക്സ്-ഐ.ടി.ഐ വിഭാഗക്കാർക്കും പ്രതിമാസം 9,600 രൂപ സ്റ്റൈപ്പന്റായി ലഭിക്കും. 100 രൂപയാണ് ഓൺലൈനായി അടക്കേണ്ട അപേക്ഷാ ഫീസ്. എന്നാൽ എസ്.സി, എസ്.ടി, ഭിന്നശേഷിക്കാർ, വനിതാ ഉദ്യോഗാർത്ഥികൾ എന്നിവർക്ക് ഫീസ് അടയ്ക്കുന്നതിൽ നിന്ന് ഇളവ് നൽകിയിട്ടുണ്ട്. ഫ്രഷേഴ്സിനുള്ള പരിശീലന കാലയളവ് വെൽഡർ, മെഡിക്കൽ ലബോറട്ടറി ടെക്നീഷ്യൻ ട്രേഡുകൾക്ക് ഒരു വർഷവും മൂന്ന് മാസവുമായിരിക്കും. ഫിറ്റർ, പെയിന്റർ ട്രേഡുകൾക്ക് പരിശീലന കാലാവധി രണ്ട് വർഷവുമാണ്.
