അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ബോളിവുഡിലെ എക്കാലത്തെയും മികച്ച പ്രണയചിത്രങ്ങളിൽ ഒന്നായ ‘ഹം ദിൽ ദേ ചുകെ സനം’ ചിത്രീകരണത്തിനിടയിൽ സംവിധായകൻ സഞ്ജയ് ലീല ബൻസാലി സൽമാൻ ഖാനോട് ദേഷ്യപ്പെട്ടതിന്റെ രസകരമായ അനുഭവം പങ്കുവെച്ച് നടി സ്മിത ജയകർ രംഗത്ത്. ചിത്രത്തിലെ പ്രശസ്തമായ ഗാനരംഗത്തിനിടയിലാണ് ഈ രസകരമായ സംഭവം നടന്നത്.
1999ൽ പുറത്തിറങ്ങിയ ചിത്രത്തില്‍ ഐശ്വര്യ റായിയുടെ അമ്മ വേഷം ചെയ്തത് സ്മിത ജയകറായിരുന്നു. ഹം ദിൽ ദേ ചുകെ സനത്തിന്‍റെ സെറ്റില്‍ വെച്ച് സംവിധായകന്‍ സഞ്ജയ് ലീല ബന്‍സാലി സല്‍മാന്‍ ഖാനോട് ചൂടായെന്ന് സ്മിത പറയുന്നു. ചിത്രത്തിലെ പ്രശസ്തമായ ‘ആംഖോ കി ഗുസ്താഖിയൻ’ എന്ന ഗാനം ചിത്രീകരിക്കുന്നതിനിടയിലാണ് ഈ സംഭവം നടന്നത്.
ഗാനരംഗത്തിന്‍റെ ചിത്രീകരണത്തിനിടയിൽ സൽമാൻ ഖാൻ മേശയ്ക്കു ചുറ്റും നടന്ന് ഐശ്വര്യയുടെ അരികിലേക്ക് വരണം എന്നതായിരുന്നു സംവിധായകന്‍റെ പ്ലാൻ. എന്നാൽ സൽമാൻ സ്ക്രിപ്റ്റില്‍ ഇല്ലാതിരുന്നിട്ടും ഐശ്വര്യയുടെ കയ്യിൽ ചെന്ന് തൊടുകയായിരുന്നു. ഇത് ശ്രദ്ധയിൽ പെട്ട ഉടൻ തന്നെ സഞ്ജയ് ലീല ബൻസാലി ഷൂട്ടിങ്ങ് നിർത്തിവെപ്പിച്ച് സൽമാനോട് ദേഷ്യപ്പെടുകയായിരുന്നു.
‘സൽമാൻ, നീ എന്തിനാണ് അവളെ തൊട്ടത്? സീനിൽ അങ്ങനെ ചെയ്യേണ്ട ആവശ്യമില്ലല്ലോ’ എന്ന് ബൻസാലി ചോദിച്ചതായി സ്മിത ജയകർ പറഞ്ഞു. ഐശ്വര്യ റായിയും സല്‍മാന്‍ ഖാനും തമ്മില്‍ മികച്ച കെമിസ്ട്രിയായിരുന്നു ഉണ്ടായിരുന്നതെന്നും ഹം ദിൽ ദേ ചുകെ സനം വലിയ വിജയമായി മാറാന്‍ ഇതും ഒരു കാരണമായിരുന്നുവെന്നും സ്മിത കൂട്ടിച്ചേര്‍ത്തു.
