അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ബംഗാൾ ഉൾക്കടലിൽ രൂപം കൊണ്ട അതിതീവ്ര ചുഴലിക്കാറ്റായ ‘അർണബ്’ ആന്ധ്രാപ്രദേശിലെ കാക്കിനാഡയ്ക്ക് സമീപം കരതൊട്ടു. ബുധനാഴ്ച പുലർച്ചെ രണ്ട് മണിക്കും നാല് മണിക്കും ഇടയിലാണ് ചുഴലിക്കാറ്റ് കരതൊടുന്ന പ്രക്രിയ പൂർത്തിയായത്. ഇതിന്റെ പശ്ചാത്തലത്തിൽ ആന്ധ്രാപ്രദേശ്, ഒഡിഷ, ബംഗാൾ തീരങ്ങളിൽ തീവ്രമഴയും കാറ്റും തുടരുകയാണ്.
ചുഴലിക്കാറ്റ് വീശിയടിക്കാൻ സാധ്യതയുള്ള സ്ഥലങ്ങളിൽ നിന്ന് ആന്ധ്രയിൽ നിന്ന് ഒരു ലക്ഷത്തോളം പേരെയും ഒഡിഷയിൽ നിന്ന് 48,000 ആളുകളെയും മാറ്റിപ്പാർപ്പിച്ചു. ആന്ധ്രാപ്രദേശിൽ 2,199 ദുരിതാശ്വാസ ക്യാംപുകൾ തുറന്നിട്ടുണ്ട്. ഗർഭിണികൾക്ക് മുൻഗണന നൽകി 1,351 പേരെ സുരക്ഷിത കേന്ദ്രങ്ങളിലേക്ക് മാറ്റി. മുഖ്യമന്ത്രി എൻ. ചന്ദ്രബാബു നായിഡുവിന്റെ നേതൃത്വത്തിൽ സ്ഥിതിഗതികൾ വിലയിരുത്തിവരുന്നു.
ആന്ധ്രയിൽ 12 NDRF സംഘങ്ങളെയും 10 SDRF സംഘങ്ങളെയും വിന്യസിച്ചു. നാവികസേനയുടെയും കോസ്റ്റ് ഗാർഡിന്റെയും സേവനവും ഉറപ്പാക്കിയിട്ടുണ്ട്. വൈദ്യുതി ബന്ധം പുനഃസ്ഥാപിക്കാൻ 8,400 ജീവനക്കാരെയും, 1,087 മെഡിക്കൽ സംഘങ്ങളെയും, 1,274 ആംബുലൻസുകളെയും സജ്ജമാക്കിയിട്ടുണ്ട്. റേഷൻ കടകളിൽ രണ്ട് മാസത്തേക്ക് ആവശ്യമായ സാധനങ്ങൾ സ്റ്റോക്ക് ചെയ്തിട്ടുണ്ട്. ഒഡിഷയിൽ 16 ജില്ലകളിലെ സ്കൂളുകൾക്ക് അവധി പ്രഖ്യാപിച്ചു.
മുൻകരുതൽ നടപടിയുടെ ഭാഗമായി ഇന്ത്യൻ റെയിൽവേ 72 ട്രെയിനുകൾ റദ്ദാക്കി. കൂടാതെ ഇൻഡിഗോ, ആകാശ എയർ, എയർ ഇന്ത്യ എക്സ്പ്രസ് തുടങ്ങിയ വിമാന സർവീസുകളും റദ്ദാക്കിയിട്ടുണ്ട്. വിശാഖപട്ടണം, വിജയവാഡ എന്നിവിടങ്ങളിലെ ഇൻഡിഗോ സർവീസുകൾ പൂർണമായും നിർത്തിവെച്ചു. മണിക്കൂറിൽ 125 മുതൽ 150 കിലോമീറ്റർ വരെ വേഗതയിൽ കാറ്റ് വീശാൻ സാധ്യതയുള്ളതിനാൽ അതീവ ജാഗ്രതാ നിർദേശം തുടരുകയാണ്.
