അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.തലസ്ഥാന നഗരത്തിലെ പുരാതനവും പേരുകേട്ടതുമായ ക്ലബ്ബാണ് ട്രിവാന്‍ഡ്രം ക്ലബ്ബ്. ഏകദേശം 4500 ഓളം അംഗങ്ങളുള്ള ഈ ക്ലബ്ബിന് കോടികളുടെ ആസ്തിയുമുണ്ട്. അംഗങ്ങള്‍ തെരഞ്ഞെക്കുന്ന ഭാരവാഹികളും എക്‌സിക്യൂട്ടീവ് കമ്മിറ്റിയുമാണ് ക്ലബ്ബിന്റെ നടത്തിപ്പു ചുമതല. ക്ലബ്ബിന് തലസ്ഥാനത്തിന്റെ ഹൃദയഭാഗത്ത് ഏക്കറുകളോളം വസ്തുവകകളുമുണ്ട്. ഇവിടെ കല്യാണം നടത്താനുള്ള വിശാലമായ എ.സി. ഹാള്‍ അടക്കം നിരവധി ഇവന്റുകള്‍ക്കുള്ള കെട്ടിടങ്ങളുമുണ്ട്. ക്ലബ്ബിന്റെ കീഴിലുള്ള സുബ്രഹ്മണ്യന്‍ ഹാള്‍, കല്യാണങ്ങളുടെ ഒരു ട്രേഡ് മാര്‍ക്കാണ്. ഇവിടെ നടക്കുന്ന ഫങ്ഷനുകള്‍ക്ക് ലക്ഷങ്ങളാണ് ക്ലബ്ബ് ഈടാക്കുന്നതും. കാരണം, സുബ്രഹ്മണ്യന്‍ ഹാളില്‍ നടക്കുന്ന ഫങ്ഷനുകള്‍ക്ക് അത്രമേല്‍ രാജകീയ പ്രൗഢി കല്‍പ്പിക്കുന്നുണ്ട്.
വര്‍ഷത്തില്‍ മിക്ക ദിവസങ്ങളിലും ഈ ഹാളില്‍ ഇവന്റുകള്‍ നടക്കാറുമുണ്ട്. ഇവന്റ് കമ്പനികള്‍ ഇവിടുത്തെ പ്രോഗ്ലാമിനു വേണ്ടി പിടിവലി കൂടാറുമുണ്ട്. അവരുടെ കമ്പനിക്കു തന്നെ വലിയ പേരാണ് ഇവിടുത്തെ പ്രോഗ്രാം കവറിംഗ്. ഇത് തിരിച്ചറിഞ്ഞാണ് ട്രിവാന്‍ഡ്രം ക്ലബ്ബ് ഭാരവാഹികള്‍ ക്ലബ്ബ് ബൈലോ പ്രകാരം ഒരു വര്‍ഷത്തേക്കുള്ള ടെന്‍ഡര്‍ ക്ഷണിച്ച് ഒരു വര്‍ഷത്തേക്ക് ക്ലബ്ബിലെ ഫങ്ഷനുകള്‍ ചെയ്യാന്‍ അനുമതി കൊടുക്കും. ടെന്‍ഡറില്‍ പങ്കെടുക്കുന്ന കമ്പനികള്‍ക്ക് മാനദണ്ഡമുണ്ട്. ഫങ്ഷന് ഹാള്‍ ബുക്ക് ചെയ്യാനെത്തുന്ന ക്ലൈന്‍സിന്റെ അഡ്രസും ഫോണ്‍ നമ്പരും ഇവന്റ് കമ്പനിക്ക് ക്ലബ്ബ് അധികൃതര്‍ കൈമാറും എന്നതാണ് വ്യവസ്ഥ. ഒരു വര്‍ഷത്തേക്ക് 30 ലക്ഷം മുതല്‍ 50 ലക്ഷം രൂപ വരെ ടെന്‍ഡര്‍ ക്വാട്ട് ചെയ്ത് അനുമതി നേടുന്ന കമ്പനികളുണ്ട്.
എന്നാല്‍, ഇത്രയും തുക നല്‍കി ടെന്‍ഡര്‍ പിടിക്കുന്ന കമ്പനിക്ക് ക്ലബ്ബില്‍ നടക്കുന്ന എല്ലാ കല്യാണങ്ങളോ, മറ്റു പരിപാടികളുടെ ഇവന്റുകളോ കിട്ടണമെന്നില്ല. അതുകൊണ്ടു തന്നെ ടെന്‍ഡര്‍ തുക നാലോ അഞ്ചോ തവണയായി ക്ലബ്ബിന് നല്‍കിയാല്‍ മതിയെന്നും വ്യവസ്ഥയുണ്ട്. പക്ഷെ, കുറഞ്ഞത് 5 കോടി രൂപയെങ്കിലും ക്ലബ്ബില്‍ നടക്കുന്ന ഫങ്ഷന് വഴി ഇവന്റ് കമ്പനിക്ക് ലഭിക്കുമെന്നാണ് ക്ലബ്ബ് അംഗങ്ങള്‍ പറയുന്നത്. എന്നാല്‍, ഇപ്പോള്‍ ടെന്‍ഡര്‍ നല്‍കിയ കമ്പനിയല്ല ക്ലബ്ബിന്റെ ഇവന്റുകള്‍ ചെയ്യുന്നത്. ആ കമ്പനി അഞ്ചു മാസം മാത്രമേ നിന്നുള്ളൂ. ടെന്‍ഡറിന്റെ ആദ്യ ഗഡുവായ 10 ലക്ഷം രൂപ മാത്രമാണ് ഇവന്റ് കമ്പനി ക്ലബ്ബിന് നല്‍കിയിട്ടുള്ളൂ. 2026-27 വര്‍ഷത്തെ ടെന്‍ഡര്‍ ലഭിച്ച ഇവന്റ് കമ്പനിയാണ് ഇട്ടിട്ടു പോയത്.
തുടര്‍ന്ന് ടെന്‍ഡര്‍ വിളിക്കാതെ മറ്റൊരു ഇവന്റ് കമ്പനിക്ക് നിയമ വിരുദ്ധമായി(ക്ലബ്ബിന്റെ ബൈലോയ്ക്ക് വിരുദ്ധം) അനുമതി നല്‍കിയിരിക്കുകയാണ്. ഇത് ശരിയാണോ എന്നതാണ് ക്ലബ്ബ് അംഗങ്ങളില്‍ ചിലര്‍ ചോദിക്കുന്നത്. തിരഞ്ഞെടുക്കപ്പെട്ട ഭാരവാഹികള്‍ എങ്ങനെയാണ് ഒരു ഇവന്റ് കമ്പനിയെ ടെന്‍ഡര്‍ വിളിക്കാതെ കണ്ടെത്തുന്നത്. അതില്‍ പക്ഷാപാതമോ, സ്വജന പക്ഷപാതമോ, പണം വാങ്ങി അനുമതി നല്‍കിയതോ ആണെന്ന് ആരോപിച്ചാല്‍ ഭാരവാഹികള്‍ക്ക് മറുപടി ഉണ്ടാകുമോ. ക്ലബ്ബ് അംഗങ്ങള്‍ ചോദിക്കുന്നത് ഇതാണ്. മാത്രമല്ല, നേരത്തെ ട്രിവാന്‍ഡ്രം ക്ലബ്ബിലെ പരിപാടികള്‍ ചെയ്ത, ടെന്‍ഡറില്‍ നിയമപരമായി പങ്കെടുത്ത് അനുമതി ലഭിച്ച ഇവന്റ് കമ്പനികളും ഇതേ ചോദ്യം ചോദിക്കുന്നുണ്ട്.
വഴിവിട്ട ഇടപെടല്‍ നടത്തിയാണോ ഇപ്പോഴത്തെ ഇവന്റ് കമ്പനിക്ക് അനുമതി നല്‍കിയത് ?. കഴിഞ്ഞ കമ്മിറ്റിയില്‍ സെക്രട്ടറിയായിരുന്ന സന്തോഷ് കുമാറിനെതിരേ നേരത്തെ ഇവന്റ് ചെയ്തിരുന്ന ഇവന്റ് കമ്പനി അധികൃതര്‍ സാമ്പത്തിക തട്ടിപ്പിന് കേസ് വരെ കൊടുത്തിട്ടുണ്ട്. 2025-26ല്‍ ടെന്‍ഡര്‍ ലഭിച്ച ഇവന്റ് കമ്പനി അധികൃതരില്‍ നിന്നും 9 ലക്ഷം രൂപ അനധികൃതമായി വാങ്ങിയെന്നതാണ് കേസ്. മാത്രമല്ല, 2026-27 വര്‍ഷവും ഇതേ ക്യാറ്ററിംഗ് കമ്പനിക്ക് തന്നെ ടെന്‍ഡര്‍ നല്‍കാമെന്ന് പറഞ്ഞാണ് സന്തോഷ് പണം വാങ്ങിയിരുന്നതെന്നും ആക്ഷേപം ഉണ്ട്. എന്നാല്‍, 2026-27 കാലത്തേക്ക് ജേക്കബ് ക്യാറ്ററേഴ്സ് ക്വാട്ട് ചെയ്ത തുകയേക്കാള്‍ കുറഞ്ഞ തുക ക്വാട്ട് ചെയ്ത മറ്റൊരു കമ്പനിക്ക് ടെന്‍ഡര്‍ നല്‍കിയ ശേഷമാണ് സന്തോഷ് സെക്രട്ടറി സ്ഥാനത്തു നിന്നും ഒഴിഞ്ഞത്. 2026-27 വര്‍ഷത്തേക്ക് ടെന്‍ഡര്‍ കിട്ടിയ കമ്പനിയാണ് ഇട്ടിട്ടു പോയത്. ഇതോടെ പുതിയ ടെന്‍ഡര്‍ വിളിക്കാതെ മറ്റൊരു ഇവന്റ് കമ്പനിക്ക് അനുമതി നല്‍കിയെന്നതാണ് ആരോപണം.
