അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഇസ്രയേൽ പാർലമെന്റ് തിരഞ്ഞെടുപ്പിൽ പ്രധാനമന്ത്രി ബെന്യാമിൻ നെതന്യാഹുവിന്റെ സഖ്യത്തിന് വിജയം. 53 സീറ്റാണ് നെതന്യാഹുവിന്റെ ലിക്കുഡ് പാർട്ടി നയിക്കുന്ന വലതുപക്ഷ സഖ്യത്തിന് ലഭിച്ചത്. എന്നാൽ കേവലഭൂരിപക്ഷമായ 61 സീറ്റ് നേടാനാകാത്തതോടെ രാജ്യത്ത് രാഷ്ട്രീയ അനിശ്ചിതത്വം തുടരുകയാണ്.
. നെതന്യാഹുവിന്റെ പ്രധാന എതിരാളി ഗാദി ഐസൻകോട്ടിന്റെ യാഷർ പാർട്ടി നയിക്കുന്ന സഖ്യത്തിന് 48 സീറ്റാണ് ലഭിച്ചത്.
ലിക്കുഡ് പാർട്ടി നയിക്കുന്ന സഖ്യത്തിന് 64 സീറ്റ് ഉണ്ടായിരുന്നതാണ് 53 ആയി കുറഞ്ഞത്. അതേസമയം, 19 സീറ്റു നേടിയ അറബ് സഖ്യമാണ് ഇസ്രയേലിന്റെ ഗതി നിർണയിക്കുകയെന്ന് ഏറക്കുറെ വ്യക്തമായി.
ലിക്കുഡ് പാർട്ടിയാണ് ഏറ്റവും വലിയ ഒറ്റകക്ഷി. 27 സീറ്റാണ് ലഭിച്ചത്. ആർക്കും ഭൂരിപക്ഷം ലഭിക്കാത്ത സാഹചര്യത്തിൽ പുതിയ സഖ്യം രൂപീകരിച്ച് ഭരണം പിടിക്കാനുള്ള ചർച്ചകൾ സജീവമാണ്.
ലിക്കുഡ് പാർട്ടി നയിക്കുന്ന സഖ്യത്തിന് ഭൂരിപക്ഷം ലഭിക്കണമെങ്കിൽ ഇനി 8 സീറ്റും പ്രതിപക്ഷത്തിന് ഭൂരിപക്ഷം നേടാൻ 13 സീറ്റും വേണം. അറബ് പാർട്ടികളുടെ പിന്തുണയില്ലാതെ പ്രതിപക്ഷത്തിന് ഭരണം പിടിക്കാനാവില്ല. എന്നാൽ, അറബ് പാർട്ടികളുടെ പിന്തുണ വേണ്ടെന്നാണ് പ്രതിപക്ഷത്തിന്റെ നിലപാട്.
മുൻപ്രധാനമന്ത്രിമാരായ നഫ്താലി ബെന്നറ്റും യയ്ർ ലപീദും നയിക്കുന്ന പ്രതിപക്ഷ പാർട്ടിയായ ടുഗെതറിന് 9.07% വോട്ടുണ്ട്; 12 സീറ്റ് ഉറപ്പ്. അവിഗ്ദോർ ലീബർമാന്റെ ഇസ്രയേൽ ഔർ ഹോം പാർട്ടിക്ക് 5.93% വോട്ട്; 7 സീറ്റ്.
നെതന്യാഹുവിനൊപ്പമുള്ള ഇത്‌മർ ബെൻഗ്‌വിറിന്റെ പാർട്ടിക്ക് 5.58% വോട്ടു മാത്രം; 7 സീറ്റ്. ഇതേ സഖ്യത്തിലെ ബെസലേൽ സ്മോട്രിച്ചിന്റെ പാർട്ടിക്ക് 4.78% വോട്ടും 6 സീറ്റും.
തിരഞ്ഞെടുപ്പിൽ അറബ് പാർട്ടികൾ അട്ടിമറി നടത്തിയെന്നും വിദേശത്തുനിന്ന് വോട്ടർമാർക്ക് പണം നൽകിയെന്നും നെതന്യാഹു ആരോപിച്ചു. ഇക്കാര്യം അന്വേഷിക്കാൻ കേന്ദ്ര തിരഞ്ഞെടുപ്പ് കമ്മിറ്റി ഉത്തരവിട്ടിട്ടുണ്ട്. വോട്ടെണ്ണൽ ഇന്നു പൂർത്തിയാകുമെന്നും നവംബർ 4ന് ഔദ്യോഗിക ഫലം പുറത്തുവിടുമെന്നും പ്രതീക്ഷിക്കുന്നു.
