അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മധ്യപ്രദേശിലെ നഗരസഭകളിലെയും തദ്ദേശ സ്ഥാപനങ്ങളിലെയും വന്‍ അഴിമതിയെയും ക്രമക്കേടുകളെയും കുറിച്ചുള്ള ചോദ്യങ്ങള്‍ ചോദിച്ച സാമൂഹിക പ്രവര്‍ത്തകനെയും ഭാര്യയെയും ബി.ജെ.പി റാലിക്കിടെ പൊലീസിനെ ഉപയോഗിച്ച് ബലമായി കസ്റ്റഡിയിലെടുപ്പിച്ചു. ഇന്‍ഡോറില്‍ ബി.ജെ.പി സംഘടിപ്പിച്ച ‘ലോക്തന്ത്ര ബച്ചാവോ, അരാജകതാ ഹട്ടാവോ’ (ജനാധിപത്യം സംരക്ഷിക്കുക, അരാജകത്വം തുരത്തുക) റാലിയിലാണ് അപ്രതീക്ഷിത നാടകീയ സംഭവങ്ങള്‍ അരങ്ങേറിയത്. നഗരവികസന-ഭവന നിര്‍മാണ വകുപ്പ് മന്ത്രി കൈലാഷ് വിജയവര്‍ഗിയയോടാണ് വേദിക്ക് മുന്നില്‍ വെച്ച് അഴിമതി ചോദ്യങ്ങളുമായി സാമൂഹിക പ്രവര്‍ത്തകനായ പ്രഹ്ലാദ് പാണ്ഡെയും ഭാര്യയും രംഗത്തെത്തിയത്.
ഒരു എല്‍.ഇ.ഡി ബള്‍ബിന് 30,000 രൂപ നിരക്കിലും, ഒരു ലിറ്റര്‍ ഫിനോയിലിന് 33,000 രൂപ നിരക്കിലും വാങ്ങിക്കൂട്ടിയതിനെ ചോദ്യം ചെയ്തുകൊണ്ടുള്ള പ്ലക്കാര്‍ഡുകളുമായാണ് ദമ്പതികള്‍ റാലി വേദിക്കരികില്‍ എത്തിയത്. പ്രഹ്ലാദ് പാണ്ഡെയുടെ ഭാര്യയുടെ കയ്യില്‍ ഒരു കുപ്പി ഫിനോയിലുമുണ്ടായിരുന്നു. മന്ത്രിയുടെ വകുപ്പിന് കീഴില്‍ നടന്ന ഈ തീവെട്ടിക്കൊള്ളയില്‍ മറുപടി വേണമെന്നായിരുന്നു ഇവരുടെ ആവശ്യം.
- വേദിയില്‍ പ്രകോപിതനായി മന്ത്രി; ആക്ഷേപകരമായ പരാമര്‍ശം
പ്രതിഷേധം കണ്ട് വേദിയിലിരുന്ന് പ്രസംഗിച്ചുകൊണ്ടിരുന്ന മന്ത്രി കൈലാഷ് വിജയവര്‍ഗിയ നിയന്ത്രണം വിട്ട് പ്രകോപിതനാവുകയായിരുന്നു. പ്രസംഗം പെട്ടെന്ന് നിര്‍ത്തിവെച്ച മന്ത്രി, പ്രഹ്ലാദ് പാണ്ഡെയെ അവിടെനിന്ന് എത്രയും വേഗം നീക്കം ചെയ്യാന്‍ പൊലീസിനോട് ആക്രോശിച്ചു. സാമൂഹിക പ്രവര്‍ത്തകനെ ‘ശല്യക്കാരന്‍’ എന്ന് വിശേഷിപ്പിച്ച മന്ത്രി, ഇയാളുടെ ചോദ്യങ്ങള്‍ക്ക് മറുപടി നല്‍കേണ്ടതുണ്ടെങ്കില്‍ അത് മറ്റെവിടെയെങ്കിലും വെച്ച് നല്‍കുമെന്നും, വേണമെങ്കില്‍ സൗജന്യമായി തന്നെ മറുപടി നല്‍കുമെന്നും ഭീഷണിപ്പെടുത്തുന്ന സ്വരത്തില്‍ പറയുന്നത് പ്രചരിക്കുന്ന വീഡിയോയില്‍ വ്യക്തമാണ്.
മന്ത്രി ആക്ഷേപകരമായ വാക്കുകള്‍ ഉപയോഗിച്ചതിന് പിന്നാലെ പൊലീസ് ദമ്പതികളെ ബലമായി പിടിച്ചുകൊണ്ടുപോയി കസ്റ്റഡിയിലെടുത്തു. തങ്ങള്‍ എന്ത് കുറ്റമാണ് ചെയ്തതെന്ന് പൊലീസിനോട് ഉറക്കെ ചോദിച്ചുകൊണ്ടാണ് പാണ്ഡെ സ്റ്റേഷനിലേക്ക് പോയത്. ‘ജനങ്ങള്‍ക്ക് ചോദ്യങ്ങള്‍ ചോദിക്കാന്‍ സ്വാതന്ത്ര്യമുള്ളപ്പോഴാണ് ജനാധിപത്യം നിലനില്‍ക്കുന്നത്. അധികാരത്തിലിരിക്കുന്നവര്‍ അതിന് മറുപടി പറയാന്‍ ബാധ്യസ്ഥരാണ്,’ കസ്റ്റഡിയിലായ ശേഷം പ്രഹ്ലാദ് പാണ്ഡെ മാധ്യമങ്ങളോട് പ്രതികരിച്ചു.
- 392 ജീവനക്കാര്‍ക്കെതിരെ അന്വേഷണം; തെളിയുന്നത് കോടികളുടെ കൊള്ള
മധ്യപ്രദേശിലെ മുനിസിപ്പല്‍ കോര്‍പ്പറേഷനുകളിലും തദ്ദേശ സ്ഥാപനങ്ങളിലും നടക്കുന്ന സാധനങ്ങള്‍ വാങ്ങല്‍ ഇടപാടുകളില്‍ വന്‍ അഴിമതിയാണ് നിലനില്‍ക്കുന്നത്. വകുപ്പുതലത്തില്‍ തയ്യാറാക്കിയ ആഭ്യന്തര റിപ്പോര്‍ട്ടില്‍ പോലും എല്‍.ഇ.ഡി ബള്‍ബുകള്‍, ഫിനൈല്‍, മറ്റ് ഉപകരണങ്ങള്‍ എന്നിവ ഭീമമായ തുകയ്ക്ക് വാങ്ങിയതില്‍ ഗുരുതരമായ ക്രമക്കേടുകള്‍ കണ്ടെത്തിയിരുന്നു. ക്രമക്കേടുകളുമായി ബന്ധപ്പെട്ട് 135 ചീഫ് മുനിസിപ്പല്‍ ഓഫീസര്‍മാര്‍ ഉള്‍പ്പെടെ 392 തദ്ദേശ ജീവനക്കാര്‍ നിലവില്‍ ആഭ്യന്തര അന്വേഷണം നേരിടുകയാണ്. ഇതുവരെ ഏഴ് ഉദ്യോഗസ്ഥരെ സര്‍വീസില്‍ നിന്ന് പിരിച്ചുവിട്ടു.
- ബി.ജെ.പിക്ക് ചോദ്യങ്ങളെ ഭയമെന്ന് കോണ്‍ഗ്രസ്; മുന്‍പും പ്രതിഷേധിച്ച ദമ്പതികള്‍
ജനാധിപത്യം സംരക്ഷിക്കാന്‍ എന്ന പേരില്‍ റാലി നടത്തിയ ബി.ജെ.പിയുടെ യഥാര്‍ത്ഥ മുഖമാണ് ജനങ്ങളുടെ ന്യായമായ ചോദ്യങ്ങളെ പൊലീസിനെക്കൊണ്ട് അടിച്ചമര്‍ത്തിയതിലൂടെ വ്യക്തമായതെന്ന് കോണ്‍ഗ്രസ് ആഞ്ഞടിച്ചു. ചോദ്യങ്ങള്‍ കേള്‍ക്കുമ്പോള്‍ തന്നെ വിറളിപിടിക്കുന്ന സ്വഭാവമാണ് ബി.ജെ.പിക്കെന്നും, സമാധാനപരമായി പ്രതിഷേധിച്ച സാധാരണക്കാരെ ജയിലിലടയ്ക്കാന്‍ ശ്രമിക്കുകയാണെന്നും പ്രതിപക്ഷം കുറ്റപ്പെടുത്തി. ഇതാദ്യമായല്ല പാണ്ഡെ ദമ്പതികള്‍ കൈലാഷ് വിജയവര്‍ഗിയക്കെതിരെ പ്രതിഷേധിക്കുന്നത്. നീറ്റ് പരീക്ഷാ വിവാദത്തില്‍ സമരം ചെയ്ത വിദ്യാര്‍ഥികള്‍ക്കെതിരെ മന്ത്രി നടത്തിയ പ്രസ്താവനകളില്‍ പ്രതിഷേധിച്ച് കഴിഞ്ഞ ജൂലൈയില്‍ ഭരണഘടനയുടെ പകര്‍പ്പുമായി മന്ത്രിയുടെ വീടിന് മുന്നില്‍ കുത്തിയിരുന്ന് സമരം ചെയ്തതിനും ഇവരെ പൊലീസ് അറസ്റ്റ് ചെയ്തിരുന്നു.
