അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
സ്വതന്ത്ര ഇന്ത്യയുടെ ചരിത്രത്തിലെ ഏറ്റവും വലിയ അഴിമതിയുടെ വിവരങ്ങൾ ഇപ്പോൾ പുറത്തുവന്നുകൊണ്ടിരിക്കുകയാണല്ലോ.
എല്ലാ രാഷ്ട്രീയ പാർട്ടികളും കണക്കാണെന്നും എല്ലാവരും അഴിമതിക്കാരാണെന്നും പറയുന്ന ഒരു വിഭാഗം നമ്മുടെ നാട്ടിലുണ്ട്. എല്ലാവരുടെയും ഗണത്തിൽ ഉൾപ്പെടുന്നവരല്ല കമ്മ്യൂണിസ്റ്റുകാർ എന്ന് അഭിമാനത്തോടെ തന്നെ ഞങ്ങൾ എന്നും പറയാറുമുണ്ട്. അത് വെറും അവകാശവാദമല്ല എന്ന് തെളിയിക്കുന്നതാണ് ഇപ്പോൾ പുറത്തു വന്നിട്ടുള്ള ഇലക്ടറൽ ബോണ്ട് സംബന്ധിച്ച വിശദാംശങ്ങൾ.
രാജ്യത്തെ വൻകിട കമ്പനികളിൽ നിന്ന് ഇലക്ടറൽ ബോണ്ട് സംഭാവന സ്വീകരിക്കാത്ത രണ്ടേ രണ്ട് പാർട്ടികളേ ഉള്ളൂ; സിപിഐഎമ്മും സിപിഐയും. എങ്ങനെയാണ് കമ്മ്യൂണിസ്റ്റുകാർ ഇന്ത്യൻ രാഷ്ട്രീയത്തിൽ വേറിട്ടു നിൽക്കുന്നത് എന്നതിൻ്റെ മറ്റൊരു ഉദാഹരണം. ഈ രണ്ടു പാർട്ടികൾ ഒഴികെ വലുതും ചെറുതുമായ പ്രധാന ദേശീയ, പ്രാദേശിക പാർട്ടികളെല്ലാം വൻകിട കോർപ്പറേറ്റ് സംഭാവനകൾ സ്വീകരിച്ചിട്ടുണ്ട്. ഇതുവരെ വന്ന കണക്കനുസരിച്ച് 75 ശതമാനവും പണം ഒഴുകിയിട്ടുള്ളത് ബിജെപിയിലേക്കാണ്. മറ്റെല്ലാവരും കൂടി സ്വന്തമാക്കിയിട്ടുള്ളത് ബാക്കി 25 ശതമാനം സംഭാവനകളാണ്. ലഭ്യമായ കണക്കനുസരിച്ച് ബിജെപിക്ക് മാത്രം കിട്ടിയത് 6551 കോടി രൂപയാണ്.
ഭരണഘടനാ വിരുദ്ധമെന്ന് സുപ്രീംകോടതി വിധിച്ച ഈ നിയമവിരുദ്ധ സംഭാവനകൾ സി പി ഐ എമ്മും സിപിഐയും കൈപ്പറ്റിയിട്ടില്ല എന്നത് കമ്യൂണിസ്റ്റ് പാർട്ടികളുടെ ഉന്നതമായ ധാർമികതയുടെ സാക്ഷ്യമാണ്. കളങ്കിതമായ പണം കൈപ്പറ്റാത്ത ധാർമിക ബലമാണ് നീണ്ട നാല് വർഷം ഇലക്ടറൽ ബോണ്ടിനെതിരെ നിയമയുദ്ധം നടത്താൻ സിപിഐഎമ്മിന് കരുത്തായത്. കേന്ദ്ര സർക്കാർ പഠിച്ച പണി പതിനെട്ടും നോക്കിയിട്ടും സുപ്രീംകോടതിയിൽ അവർക്ക് പിടിച്ചു നിൽക്കാനായില്ല. കോടതി ഇലക്ടറൽ ബോണ്ട് റദ്ദാക്കി. അത് ഭരണഘടനാ വിരുദ്ധവും നിയമവിരുദ്ധവുമാണെന്ന് പ്രഖ്യാപിച്ചു. സംഭാവന നൽകിയവരുടെ പട്ടിക എസ് ബി ഐയോട് കൈമാറാൻ നിർദ്ദേശിച്ചപ്പോൾ അത് അട്ടിമറിക്കാനും കേന്ദ്രസർക്കാർ ഇടപെട്ടു. കോടതി നിർദേശിച്ച സമയപരിധിക്കകത്ത് എസ് ബി ഐ സംഭാവന നൽകിയവരുടെ പേര് കൈമാറാൻ കൂട്ടാക്കിയില്ല. അവിടെയും സിപിഐഎം ഇടപെട്ടു. എസ് ബി ഐക്കെതിരായി വീണ്ടും സുപ്രീംകോടതിയെ സമീപിച്ചു. കേന്ദ്രത്തിലെ ബി ജെ പി സർക്കാരിന് എത്രത്തോളം ഒളിക്കാനും ഭയക്കാനും ഉണ്ട് എന്ന് തെളിയിക്കുന്നതാണ് സംഭാവന നൽകിയവരുടെ പേര് പുറത്ത് വരാതിരിക്കാൻ നടത്തിയ നീക്കങ്ങൾ. സിപിഐഎമ്മിന്റെ ഉറച്ച നിലപാടും വിട്ടുവീഴ്ചയില്ലാത്ത പോരാട്ടവും മൂലം ഇപ്പോൾ ആരെല്ലാമാണ് ആയിരക്കണക്കിന് കോടികൾ ഇന്ത്യയുടെ രാഷ്ട്രീയ പാർട്ടികൾക്ക് സംഭാവന നൽകിയത് എന്ന വിവരം പുറത്തുവന്നിരിക്കുന്നു.
വൻകിട കുത്തകകൾ ആയിരക്കണക്കിന് കോടി ബിജെപിക്കും മറ്റു പാർട്ടികൾക്കും സംഭാവന നൽകുന്നത് അടുത്ത ജന്മത്തിൽ പുണ്യം കിട്ടുമെന്ന് വിചാരിച്ചിട്ടല്ല. ഭരണം ഉപയോഗിച്ച് കൊള്ളലാഭം നേടുന്നതിനും ജനങ്ങളെ ചൂഷണം ചെയ്യുന്നതിന് ഭരണകൂട പിന്തുണക്കും വേണ്ടിയാണ്. അതായത് ഈ സഹസ്രകോടികളുടെ സംഭാവന ജനങ്ങളെ ഒറ്റുകൊടുത്ത പണമാണ്. അത് കൈപ്പറ്റാത്ത രണ്ടേ രണ്ട് പാർട്ടികളേയുള്ളൂ; സിപിഐ എമ്മും സിപിഐയും. എല്ലാവരും കണക്കാണെന്ന് ഇനിയും പറയുന്നവരെ സൂക്ഷിക്കുക. അവർ അഴിമതിക്കാരുടെ വക്കാലത്തെടുത്തവരും അഴിമതിക്കാരെ വെള്ളപൂശുന്ന വരുമാണ്. ഞങ്ങൾ അഭിമാനത്തോടെ തന്നെ പറയും; കമ്മ്യൂണിസ്റ്റുകാർ വ്യത്യസ്തരാണ്.
Read more ….
