Agriculture

മാമ്പഴത്തില്‍ പുഴു വരാതിരിക്കാന്‍…

മാമ്പഴക്കാലമായി. വീട്ടുമുറ്റത്തെ മാവില്‍ പാകമെത്തിയ മാങ്ങമുതല്‍ കണ്ണിമാങ്ങകള്‍ വരെ നിറഞ്ഞുനില്‍ക്കുന്നുണ്ടാവും. കേരളത്തിലെ ശുദ്ധമായ കാലാവസ്ഥയും സമൃദ്ധമായ മണ്ണും മാവ് പൂക്കാന്‍ അനുകൂലമാണ്. പലതരം മാങ്ങകള്‍ നാട്ടിലുണ്ട്. കിളിച്ചുണ്ടന്‍, മൂവാണ്ടന്‍, കോമാങ്ങ, നാട്ടുമാങ്ങ തുടങ്ങിയ മാങ്ങയിനങ്ങളാണ് ഒട്ടുമിക്ക ആളുകളുടേയും വീട്ടിലുണ്ടാവുക. എന്നാൽ മാമ്പഴങ്ങളിലെ പുഴു ശല്യം വലിയ ഒരു തലവേദനയാണ്.

മാമ്പഴത്തിലെ പുഴു ശല്യം പരിഹരിക്കാന്‍ ചില മാര്‍ഗങ്ങള്‍ നോക്കിയാലോ ? മാര്‍ച്ച്, ഏപ്രില്‍, മെയ് മാസങ്ങളാണ് മാമ്പഴത്തിന്റെ വിളവെടുപ്പ് കാലം. ഈ കാലത്താണ് മാമ്പഴ ഈച്ചകള്‍ ചെറിയ സുഷിരങ്ങളുണ്ടാക്കി മാമ്പഴത്തിനകത്ത് പ്രവേശിച്ച് മുട്ടയിടുന്നതും അവ വിരിഞ്ഞ് പുഴുക്കളുണ്ടാവുന്നതും. ഈ സാഹചര്യത്തെ തരണം ചെയ്യാനുള്ള മാര്‍ഗങ്ങള്‍ നോക്കാം. മാമ്പഴം ഉപ്പുവെള്ളത്തിലിട്ടു വെയ്ക്കാം.

മാമ്പഴങ്ങളിലെ പുഴു ശല്യം ഇല്ലാതാക്കുന്നതിന് ആറു ലിറ്റര്‍ തിളച്ച വെള്ളവും നാലു ലിറ്റര്‍ തണുത്ത വെള്ളവും ഒരു പാത്രത്തിലാക്കി 200 ഗ്രാം ഉപ്പ് ചേര്‍ത്ത് ഇളക്കിയ ലായനിയിലേക്ക് മൂപ്പെത്തി പറിച്ചെടുത്ത മാങ്ങകള്‍ 10 അല്ലെങ്കില്‍ 15 മിനിറ്റ് ഇട്ടുവയ്ക്കുക. ശേഷം മാങ്ങകള്‍ എടുത്ത് തുണികൊണ്ടു നന്നായി തുടച്ചു പഴുപ്പിക്കുക.

ഈ മിശ്രിതത്തില്‍ മാങ്ങ ഇടുമ്പോള്‍ പഴ ഈച്ചകള്‍ മാങ്ങയുടെ പുറംതൊലിയില്‍ ഉണ്ടാക്കിയ സുഷിരങ്ങള്‍ അല്‍പം വികസിക്കുകയും ഇതിലൂടെ ഉപ്പുവെള്ളത്തിന്റെ ചെറുകണികകള്‍ മാങ്ങയ്ക്കുള്ളില്‍ കയറുകയും ചെയ്യുന്നു. ഉപ്പുവെള്ളം വിരിയാനിരിക്കുന്ന മുട്ടകളെ നശിപ്പിക്കും. ഇത്തരത്തിലുളള പഴ ഈച്ചകളുടെ വര്‍ദ്ധനവ് നശിപ്പിക്കുന്നതിന് ചീഞ്ഞ മാങ്ങകള്‍ മണ്ണിട്ട് മൂടി സംസ്‌കരിക്കണം.