അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പോത്തന്കോട് – ആണ്ടൂര്ക്കോണം എല്.പി. സ്കൂളിനു സമീപത്തെ അപകട വളവില് വെളിച്ചക്കുറവു കാരണം അപകടങ്ങള് പതിവാകുന്നതിനെ കുറിച്ച് ട്രാഫിക് ഡി.വൈ.എസ്.പിയെ നിയോഗിച്ച് ജില്ലാ കളക്ടര് അന്വേഷിക്കണമെന്ന് മനുഷ്യാവകാശ കമ്മീഷന് ചെയര്പേഴ്സണ് ജസ്റ്റിസ് അലക്സാണ്ടര് തോമസ് ഉത്തരവിട്ടു.
അപകടമേഖലയായ വളവില് ഹൈമാസ്റ്റ് ലൈറ്റ് സ്ഥാപിക്കണമെന്ന നാട്ടുകാരുടെ ആവശ്യം അധികൃതര് അവഗണിച്ചതാണ് 6 മാസത്തിനിടെ അപകടങ്ങള് വര്ധിക്കാനുള്ള കാരണമെന്ന പത്രവാര്ത്തയുടെ അടിസ്ഥാനത്തില് കമ്മീഷന് സ്വമേധയാ രജിസ്റ്റര് ചെയ്ത കേസിലാണ് നടപടി. ഹൈമാസ്റ്റ് ലൈറ്റിന്റെ ആവശ്യകതയും അത് സ്ഥാപിക്കേണ്ടത് ആരാണെന്നും കമ്മീഷനെ അറിയിക്കണം. വളവിലുള്ള ഓട അപകടത്തിന് കാരണമാകുന്നുണ്ടോ എന്നും പരിശോധിക്കണം. ഇതേ വിഷയങ്ങള് പഞ്ചായത്ത് ജോയിന്റ് ഡയറക്ടറും പൊതുമരാമത്ത് എക്സിക്യൂട്ടീവ് എഞ്ചിനീയറും പ്രത്യേകം പരിശോധിക്കണമെന്നും കമ്മീഷന് ആവശ്യപ്പെട്ടു.
ജില്ലാ കളക്ടര്, അന്വേഷണ ഉദ്യോഗസ്ഥനായ ഡി.വൈ.എസ്.പി, പഞ്ചായത്ത് ജോയിന്റ് ഡയറക്ടര്, ആണ്ടൂര്ക്കോണം പഞ്ചായത്ത് സെക്രട്ടറി, എന്നിവര് ഒരു മാസത്തിനകം കമ്മീഷനില് റിപ്പോര്ട്ട് സമര്പ്പിക്കണം. ജില്ലാ കളക്ടര്, പഞ്ചായത്ത് ജോയിന്റ് ഡയറക്ടര് എന്നിവരുടെ പ്രതിനിധികളും, ട്രാഫിക് ഡി.വൈ.എസ്.പി, ആണ്ടൂര്ക്കോണം പഞ്ചായത്ത് സെക്രട്ടറി, പൊതുമരാമത്ത് അസിസ്റ്റന്റ് എക്സിക്യൂട്ടീവ് എഞ്ചിനീയര് എന്നിവരും മാര്ച്ച് 18 ന് രാവിലെ 10 ന് കമ്മീഷന് ഓഫീസില് നടക്കുന്ന സിറ്റിംഗില് നേരിട്ട് ഹാജരാകണം.
സ്വകാര്യ പരീക്ഷാ പരിശീലന കേന്ദ്രത്തിലെ ജീവനക്കാരന് അന്ഷാദ് കഴിഞ്ഞ ദിവസം സ്കൂട്ടര് മറിഞ്ഞ് മരിച്ചതാണ് ഒടുവിലത്തെ അപകടം. ഹമ്പില് കയറി നിയന്ത്രണം വിട്ട സ്കൂട്ടര് ഓടയിലേക്ക് മറിയുകയായിരുന്നു.
CONTENT HIGH LIGHTS; Human Rights Commission asks District Collector to investigate accidents at Andurkonam bend
