അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഓച്ചിറ: വീടുകൾ കുത്തിത്തുറന്ന് മോഷണം നടത്തി വന്നിരുന്ന അന്തർസംസ്ഥാന മോഷ്ടാവിനെ കരുനാഗപ്പള്ളി പൊലീസ് പിടികൂടി. തമിഴ്നാട് മധുര മുനിയാണ്ടിപുരം സ്വദേശി വടിവേലു (45) ആണ് പിടിയിലായിരിക്കുന്നത്.
2024 മാർച്ചിൽ പാവുമ്പയിലെ ഒരു വീട്ടിലെ അടുക്കള വാതിൽ പൊളിച്ച് അകത്തുകയറി ആറ് പവന്റെ സ്വർണവും ₹15,000 രൂപയും മോഷണം പോയിരുന്നു. സംഭവസ്ഥലത്ത് നിന്ന് പൊലീസിന് ലഭിച്ച വിരലടയാളമാണ് കേസിന് നിർണായകമായത്. ശാസ്ത്രീയ പരിശോധനയിൽ വിരലടയാളം വടിവേലുവിന്റേതാണെന്ന് തിരിച്ചറിഞ്ഞു.
ഇതേ തുടർന്നാണ് പൊലീസ് സംഘം മധുരയിലേക്ക് യാത്ര തിരിച്ചത്. കുപ്രസിദ്ധമായ ‘തിരുട്ട് ഗ്രാമ’ എന്ന് പേരുകേട്ട പ്രദേശത്തുനിന്നാണ് പ്രതിയെ പിടികൂടിയത്. ദിവസങ്ങളോളം മധുരയിൽ തങ്ങിയ പൊലീസിന് സാഹസികമായ പ്രതിയെ അറസ്റ്റ് ചെയ്യാൻ കഴിഞ്ഞത്.
വടിവേലുവിനെതിരെ തമിഴ്നാട്ടിൽ മാത്രം 25-ഓളം മോഷണ കേസുകൾ ഇതിനകം രജിസ്റ്റർ ചെയ്തിട്ടുണ്ട്. തമിഴ്നാട്ടിൽ നിന്ന് കേരളത്തിലേക്ക് വരുന്ന ലോറികളിൽ ജോലിക്കാരനായെത്തി, മോഷണം നടത്തി പിന്നെ അതേ ലോറിയിൽ തിരിച്ച് പോകുന്ന രീതിയായിരുന്നു ഇയാളുടെത്. കരുനാഗപ്പള്ളി പൊലീസിന്റെ മികച്ച അന്വേഷണപ്രവർത്തനമാണ് ഈ അറസ്റ്റ് സാധ്യമാക്കിയത്.
ജില്ല പൊലീസ് മേധാവി കിരൺ നാരായണൻ്റെ നിർദേശപ്രകാരം, എ.സി.പി വി.എസ്. പ്രദീപ്കുമാർ മേൽനോട്ടത്തിൽ ഇൻസ്പെക്ടർ അനൂപ്, എസ്.ഐമാരായ ഷമീർ, ആഷിഖ്, അമൽ പ്രസാദ്, എസ്.സി.പി.ഒമാരായ ഹാഷിം, സരൺ തോമസ് എന്നിവരടങ്ങിയ പ്രത്യേക സംഘമാണ് പ്രതിയെ പിടികൂടിയത്.
