അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പുനലൂർ-ഇടമൺ പാതയിൽ പാപ്പന്നൂരിന് സമീപം സ്കൂട്ടറിൽ സഞ്ചരിക്കുകയായിരുന്ന അമ്മയ്ക്കും മകനുമാണ് കാട്ടുപന്നിയുടെ അപ്രതീക്ഷിത ആക്രമണത്തിൽ ഗുരുതരമായി പരിക്കേറ്റത്. ഇടമൺ-34 ഉദയഗിരി പുളിമൂട്ടിൽ വീട്ടിൽ സോണിയ, മകൻ ആദിത്യൻ എന്നിവരാണ് ഈ ദുരന്തത്തിന് ഇരയായത്.
കഴിഞ്ഞ ദിവസം വൈകീട്ടായിരുന്നു നാടിനെ നടുക്കിയ ഈ സംഭവം. ആശുപത്രിയിൽ ചികിത്സയിൽ കഴിഞ്ഞിരുന്ന മകൻ ആദിത്യനെ ഡിസ്ചാർജ് ചെയ്ത് വീട്ടിലേക്ക് മടങ്ങുകയായിരുന്നു സോണിയ. പാപ്പന്നൂരിന് സമീപമെത്തിയപ്പോൾ പൊന്തക്കാടിനുള്ളിൽ നിന്നും ഒരു കാട്ടുപന്നി പാഞ്ഞുവന്ന് സ്കൂട്ടറിന് കുറുകെ ചാടുകയായിരുന്നു. ആഘാതത്തിൽ നിയന്ത്രണം തെറ്റിയ സ്കൂട്ടറിൽ നിന്നും ഇരുവരും ദൂരേക്ക് തെറിച്ചുവീണു.
അപകടം നടന്ന ഉടനെ ഇരുവരുടെയും നിലവിളി കേട്ട് ഓടിക്കൂടിയ നാട്ടുകാരാണ് പ്രാഥമിക രക്ഷാപ്രവർത്തനം നടത്തിയത്. ഉടൻ തന്നെ ഇരുവരെയും പുനലൂർ താലൂക്ക് ആശുപത്രിയിൽ എത്തിച്ചെങ്കിലും പരിക്കുകൾ ഗുരുതരമായതിനാൽ വിദഗ്ധ ചികിത്സയ്ക്കായി മാറ്റുകയായിരുന്നു. സോണിയ നിലവിൽ അഞ്ചലിലെ സ്വകാര്യ ആശുപത്രിയിലും, ആദിത്യൻ തിരുവനന്തപുരത്തെ സ്വകാര്യ ആശുപത്രിയിലും തീവ്രപരിചരണ വിഭാഗത്തിൽ ചികിത്സയിലാണ്. ഇരുവരുടെയും മുഖത്തിനും കൈകാലുകൾക്കും സാരമായ പരിക്കേറ്റിട്ടുണ്ട്.
ഇടമൺ, പാപ്പന്നൂർ മേഖലകളിൽ കാട്ടുപന്നി ശല്യം രൂക്ഷമായിട്ടും അധികൃതർ വേണ്ട നടപടികൾ സ്വീകരിക്കുന്നില്ലെന്ന പരാതിയുമായി നാട്ടുകാർ രംഗത്തെത്തിയിട്ടുണ്ട്.
